ءماجىلىس دەپۋتاتى, قازاقستان حالىق فراكتسياسىنىڭ مۇشەسى كەنجەعۇل سەيتجان تۇركىستان وبلىسىندا جۇمىس ساپارىمەن ءجۇر. ءماجىلىس دەپۋتاتى مۇگەدەكتىگى بار جاندارعا ارنالعان «ساۋران» سپورت كلۋبىنىڭ جۇمىسىمەن تانىستى, دەپ جازادى Egemen.kz.
دەپۋتات «ساۋران» سپورت كلۋبىنىڭ ۇجىمىمەن كەزدەسىپ, ۇيىمنىڭ ىشكى جۇمىسى جانە جەتىستىكتەرىمەن تانىستى. كلۋب باسشىسى اباي قازيەۆ مۇمكىندىگى شەكتەۋلى جانداردى سپورتقا باۋلۋ, ولاردىڭ قوعامعا بەيىمدەلۋىنە ىقپال ەتىپ, سپورتتىق شەبەرلىكتەرىن شىڭداۋعا باعىتتالعان ءىس-شارالارعا توقتالدى. كلۋبتىڭ نەگىزگى ماقساتتارىنىڭ ءبىرى مۇگەدەك سپورتشىلاردىڭ كاسىبي شىڭدالۋىنا, رەسپۋبليكالىق جانە حالىقارالىق جارىستارعا دايىندالۋىنا جاعداي جاساۋ ەكەنى ايتىلدى.
كلۋب ۇجىمى مەن سپورتشىلار سپورت ينفراقۇرىلىمىن جاقسارتۋ, جاڭا سپورتتىق قۇرال-جابدىقتارمەن قامتاماسىز ەتۋ, جارىستارعا قاتىسۋعا قارجىلاي قولداۋ كورسەتۋ, باپكەرلەردىڭ بىلىكتىلىگىن ارتتىرۋ سىندى ماسەلەلەردى كوتەردى.
سونداي-اق سپورتشىلار مۇگەدەكتەر سپورتىنا قوعام نازارىن ارتتىرىپ, قارجىلاندىرۋدى ارتتىرۋ قاجەتتىگىن ايتتى. ولار وزدەرىنىڭ جەتىستىكتەرى ارقىلى قازاقستاننىڭ اتىن الەمگە تانىتۋعا دايىن ەكەندەرىن, بىراق بۇل ءۇشىن ءتيىستى قولداۋ مەن جاعداي جاسالۋى ماڭىزدى ەكەنىنە توقتالدى.
– ەل ءۇشىن مۇگەدەكتەر سپورتىن دامىتۋ ماڭىزدى. پارلامەنت كوتەرىلگەن ماسەلەلەردى شەشۋگە كومەكتەسەتىن بولادى. «ساۋران» كلۋبىنىڭ سپورتشىلارىنىڭ مۇڭ-مۇقتاجى دا ۇكىمەت دەڭگەيىنە جەتكىزىلەتىن بولادى, – دەدى دەپۋتات.
بۇدان سوڭ كەنجەعۇل سەيتجان سايرام اۋدانى مەن ارىس قالاسىندا دا بولىپ, جەرگىلىكتى تۇرعىندارمەن جۇزدەستى. دەپۋتاتتىڭ جۇمىس ساپارى ودان ءارى جالعاسادى.