اقتوبە وبلىسىندا وتكەن «ايبىن-2025» XI حالىقارالىق اسكەري-پاتريوتتىق جارىستا اباي وبلىسىنىڭ جاس ساربازدارى بىرنەشە جەڭىسكە جەتىپ, باس جۇلدەنى قانجىعالاپ قايتتى, دەپ حابارلايدى Egemen.kz.
ۇلى جەڭىستىڭ 80 جىلدىعى مەن كەڭەس وداعىنىڭ باتىرى ءاليا مولداعۇلوۆانىڭ 100 جىلدىعىنا وراي ۇيىمداستىرىلعان ايتۋىلى ءىس-شاراعا قازاقستان قارۋلى كۇشتەرىنىڭ باس قولباسشىسى, مەملەكەت باسشىسى قاسىم-جومارت توقاەۆ تا قاتىستى. بيىل قازاقستانمەن قاتار ازەربايجان, بەلارۋس, قىرعىزستان, رەسەي, وزبەكستاننان كەلگەن 800-گە جۋىق جاس باق سىناعان. ولار «ايبىن دارىنى» زياتكەرلىك سايىسى, «Smart Sarbaz» تەحنولوگيالىق جوبالار بايقاۋى, «ايبىن جۇلدىزى» شىعارماشىلىق كونكۋرسى, پنەۆماتيكالىق مىلتىقپەن اتۋ, اۆتومات بولشەكتەۋ جانە جيناۋ, اسكەري-تاكتيكالىق ويىندار مەن سپورتتىق جارىستار بويىنشا ءتۇرلى سايىسقا ءتۇستى.
بۇل جيىندا اباي وبلىسىنىڭ ساربازدارى ەرەكشە كوزگە ءتۇستى. جارما اۋدانى, قالباتاۋ اۋىلىنداعى ماياكوۆسكي مەكتەبىنىڭ 10-سىنىپ وقۋشىسى نيكا بريتنەر ۇتقىرلىق تانىتىپ, «ۇزدىك جاس سارباز» اتاندى. ۇزدىك سارباز پنەۆماتيكالىق ۆينتوۆكامەن ءدال كوزدەۋدە, اۆتومات بولشەكتەۋ مەن جيناۋدا شاشاسىنا شاڭ جۇقتىرماي, شالقاسىنان جاتىپ كەۋدەنى ءبىر مينۋتتا 88 رەت كوتەرىپ, «ايبىن» تاريحىندا جاڭا رەكورد ورناتتى. نيكا اسكەري شەبەرلىگى مەن ەپتىلىگىن تانىتىپ قويماي, «ايبىن جۇلدىزى» ساحناسىندا ونەر كورسەتىپ, شىعارماشىلىق قابىلەتى مەن تالانتىن دا كوپكە پاش ەتتى. اباي ەلىنىڭ نامىسىن قورعاعان جاس سارباز جەڭىسىن اباي قۇنانباي ۇلىنىڭ 180 جىلدىعى مەن ءاليا مولداعۇلوۆانىڭ 100 جىلدىق مەرەيتويىنا ارنايتىنىن جەتكىزدى. ء«اليا – جاۋىنگەر رۋحتىڭ سيمۆولى. مەنىڭ ءار جەتىستىگىم – سول رۋحتىڭ جالعاسى», دەيدى جەڭىمپاز.
اباي حالقى ءۇشىن قۋانىش مۇنىمەن شەكتەلگەن جوق. سەمەي قالاسى ش.ءۋاليحانوۆ اتىنداعى «جاس ۇلان» مامانداندىرىلعان مەكتەپ-ينتەرناتىنىڭ كومانداسى رەسپۋبليكالىق اسكەري مەكتەپتەر اراسىندا ءتورتىنشى جىل قاتارىنان گران-ءپريدى يەلەنىپ, جالپىكوماندالىق ەسەپتە ۇزدىك اتاندى. ال «اباي قىراندارى» اسكەري-پاتريوتتىق كلۋبى جالپىكوماندالىق ەسەپتە 1-ورىندى يەلەنىپ, «Smart Sarbaz» سايىسىندا 1-ورىن, باسقا دا بىرنەشە باعىتتا جۇلدەلى ورىندى ەنشىلەدى. بۇعان قوسا وبلىس نامىسىن قورعاعان «جاس بارلاۋشى» كومانداسى تۋرنيككە تارتىلۋدان 2-ورىندى قانجىعاسىنا بايلادى.
وسىلايشا اباي جاستارىنىڭ جەڭىسىنە ءسۇيسىنىپ, ايماقتا اسكەري-پاتريوتتىق تاربيەنىڭ جوعارى دەڭگەيدە بەرىلىپ جاتقانىنا تاعى ءبىر كوز جەتكىزدىك.
اباي وبلىسى