اتالعان باستاما ەلدەردىڭ كۇشىن بىرىكتىرە وتىرىپ, تسيفرلىق قوعامدىق ينفراقۇرىلىمنىڭ (DPI) نەگىزگى ەلەمەنتتەرىن جەدەل ەنگىزۋدى ماقسات ەتەدى. بۇل تەحنولوگيالار زاماناۋي, ىڭعايلى, پرواكتيۆتى مەملەكەتتىك قىزمەتتەردى دامىتۋعا نەگىز بولىپ, ازاماتتاردىڭ ءومىر ءسۇرۋ ساپاسىن ارتتىرۋعا جانە تسيفرلىق ەكونوميكانى ىلگەرىلەتۋگە ىقپال ەتەدى, دەپ حابارلايدى Egemen.kz تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ ءباسپاسوز قىزمەتىنە سىلتەمە جاساپ.
تسيفرلىق قوعامدىق ينفراقۇرىلىم – بۇل تسيفرلىق تولەمدەر, سايكەستەندىرۋ جانە دەرەكتەر الماسۋ جۇيەلەرىنىڭ قاۋىپسىز ءارى ءوزارا ارەكەتتەسە الاتىن جيىنتىعى. تسيفرلىق داۋىردە بۇل جۇيەلەر ەكونوميكا مەن الەۋمەتتىك ومىرگە تولىققاندى قاتىسۋدىڭ باستى العىشارتىنا اينالدى. DPI بارلىق مەملەكەتتەردىڭ ورنىقتى ءارى يننوۆاتسيالىق ەكونوميكا قۇرىپ, ازاماتتاردىڭ ءال-اۋقاتىن قامتاماسىز ەتۋى ءۇشىن قاجەت.
«50-in-5» باستاماسىنىڭ نەگىزگى ماقساتى – 2028 جىلعا دەيىن 50 ەل كەم دەگەندە ءبىر DPI ەلەمەنتىن ەنگىزۋى. بۇل تاجىريبە الماسۋ جانە اشىق تسيفرلىق ونىمدەردى قولدانا وتىرىپ, بىرلەسكەن شەشىمدەر ازىرلەۋ شىعىنداردى ازايتىپ, ترانسفورماتسيانى جەدەلدەتۋگە مۇمكىندىك بەرەتىنىنە نەگىزدەلگەن.
«قازاقستانداعى تسيفرلىق ترانسفورماتسيانىڭ باستى وزەگى – ادام. ءبىز ءۇشىن تەحنولوگيا – جاي عانا تەحنولوگيا ەمەس, ول ازاماتتاردىڭ ءومىرىن جاقسارتۋعا باعىتتالعان قۇرال. وسى ماقساتتا ءبىز ءار قادامىمىزدى حالىق يگىلىگى ءۇشىن جاساي وتىرىپ, اشىق, تۇسىنىكتى جانە ءتيىمدى تسيفرلىق مەملەكەت قۇرىپ جاتىرمىز. تسيفرلىق شەشىمدەر قاشىقتىقتى قىسقارتادى, وسى ارقىلى ادامدار قايدا تۇرسا دا, ءبىز ولارعا جاقىنىراق بولا الامىز. «50-in-5» باستاماسىنا قوسىلۋ – ادامعا باعىتتالعان تسيفرلىق ترانسفورماتسيامىزدى ۇدەتىپ, شىعىنداردى ازايتۋعا مۇمكىندىك بەرەتىن ماڭىزدى قادام», دەدى سالا ءمينيسترى جاسلان ماديەۆ.
قازاقستاندا تسيفرلىق قوعامدىق ينفراقۇرىلىمنىڭ نەگىزگى ەلەمەنتتەرى تابىستى ەنگىزىلىپ, بۇكىل ەل اۋماعىندا كەڭەيتىلىپ جاتىر. تسيفرلىق سايكەستەندىرۋ جۇيەسىنىڭ (Digital ID) نەگىزگى بولىگى – eGov Mobile ءموبيلدى قوسىمشاسى. بۇل – رەسمي ەلەكتروندىق ۇكىمەتتىڭ سۋپەرموبيلدى قوسىمشاسى, ول قاۋىپسىز اۆتوريزاتسيا, قاشىقتان جەكە باسىن راستاۋ جانە مەملەكەتتىك قىزمەتتەردىڭ كەڭ اۋقىمىنا قول جەتكىزۋ مۇمكىندىگىن قامتاماسىز ەتەدى.
بۇگىندە eGov Mobile قوسىمشاسىن 10,9 ميلليوننان استام وتانداستارىمىز پايدالانادى, ونىڭ ىشىندە اي سايىنعى بەلسەندى اۋديتوريا 5,3 ميلليون ادامدى قۇرايدى, ال تاۋلىگىنە ورتا ەسەپپەن 354 مىڭ پايدالانۋشى قوسىمشاعا كىرەدى. «قىزمەتتەر» بولىمىندە 200 ءتۇرلى سەرۆيس قولجەتىمدى, ال eGov Mobile ارقىلى كورسەتىلگەن مەملەكەتتىك قىزمەتتەردىڭ جالپى سانى 82 ميلليوننان استى.
پايدالانۋشىلاردىڭ ەرەكشە قىزىعۋشىلىعىن «تسيفرلىق قۇجاتتار» ءبولىمى تۋدىرادى. وندا جەكە كۋالىكتەن باستاپ جۇرگىزۋشى كۋالىگىنە دەيىن 38 ءتۇرلى ەلەكتروندىق قۇجات قولجەتىمدى. بۇل فۋنكتسيا ىسكە قوسىلعاننان بەرى قۇجاتتار 25,7 ميلليوننان استام رەت قولدانىلعان.
قازاقستانداعى مەملەكەتتىك جۇيەلەر اراسىندا دەرەكتەر الماسۋ ءۇشىن Smart Data Ukimet اقپاراتتىق-تالدامالىق پلاتفورماسى جۇمىس ىستەيدى. وعان 124 مەملەكەتتىك ورگاننىڭ اقپاراتتىق جۇيەسى بىرىكتىرىلگەن. بۇل ينتەگراتسيا ازاماتتاردىڭ ومىرلىك جاعدايلارىنا اۆتوماتتى تۇردە جاۋاپ رەتىندە پرواكتيۆتى مەملەكەتتىك قىزمەتتەردى ازىرلەۋگە مۇمكىندىك بەرەدى.
بۇگىندە الەۋمەتتىك باعىتتاعى 45 پرواكتيۆتى مەملەكەتتىك قىزمەت ازىرلەنگەن. ولار ازاماتتارعا, اسىرەسە ومىرلىك قيىن جاعدايعا تاپ بولعان ادامدارعا باعىتتالعان اتاۋلى كومەك كورسەتۋگە ارنالعان. وسىنداي قىزمەتتەر 4,3 ميلليوننان استام رەت كورسەتىلدى. Smart Data Ukimet, ەلەكتروندىق ۇكىمەت ءشليۋزى جانە Smart Bridge بىرىگىپ, ۇلتتىق دەرەكتەر الماسۋ جۇيەسىنىڭ نەگىزىن قۇرايدى.
«50-in-5» – بۇل تسيفرلىق قوعامدىق ينفراقۇرىلىمدى ەنگىزۋ ارقىلى تسيفرلىق كۇن ءتارتىبىن جەدەلدەتۋگە باعىتتالعان ەلدەر باستاماسى. بۇل باستاما بيلل جانە مەليندا گەيتس قورى, تسيفرلىق قوعامدىق ينفراقۇرىلىم ورتالىعى, Co-Develop ۇيىمى, تسيفرلىق قوعامدىق يگىلىكتەر اليانسى جانە بۇۇ دامۋ باعدارلاماسىمەن (پروون) بىرلەسىپ جۇزەگە اسىرىلادى. بۇدان بولەك, باستاماعا GovStack, امەريكاارالىق دامۋ بانكى, يۋنيسەف جانە بۇۇ-ايەلدەر ۇيىمى قولداۋ كورسەتەدى.
«50-in-5» باستاماسى اياسىندا ەلدەر تسيفرلىق كوشباسشىلارمەن تاجىريبە الماسىپ, حالىقارالىق ۇزدىك تاجىريبەلەردى زەردەلەپ, تەحنيكالىق جانە ادىستەمەلىك قولداۋ الا الادى. قازاقستان ءۇشىن بۇل باستاماعا قاتىسۋ – ۇلتتىق تسيفرلىق الەۋەتتى نىعايتىپ, ءاربىر ازاماتتىڭ مۇددەسىنە جۇمىس ىستەيتىن ورنىقتى تسيفرلىق ينفراقۇرىلىمدى دامىتۋعا باعىتتالعان ماڭىزدى قادام.