ءماجىلىس دەپۋتاتى جۇلدىز سۇلەيمەنوۆا قازاقستان پرەمەر-ءمينيسترى ولجاس بەكتەنوۆكە دەپۋتاتتىق ساۋال جولداپ, نازارباەۆ ۋنيۆەرسيتەتىندە قازاقستاندىق مامانداردىڭ ۇلەسىن ارتتىرۋدى جانە اۋىل تۇلەكتەرىنە ارنالعان دايىندىق باعدارلاماسىن ەنگىزۋدى ۇسىندى, دەپ حابارلايدى Egemen.kz.
ونىڭ ايتۋىنشا, نازارباەۆ ۋنيۆەرسيتەتى – ەلىمىزدىڭ زياتكەرلىك الەۋەتىنىڭ تىرەگى ءارى عىلىمي-تەحنولوگيالىق پروگرەستىڭ فلاگمانى.
«مەملەكەت باسشىسى قاسىم-جومارت توقاەۆ ءوزىنىڭ جولداۋلارىندا ءبىلىم مەن عىلىم ەل دامۋىنىڭ ستراتەگيالىق نەگىزى ەكەنىن بىرنەشە رەت اتاپ ءوتتى. پرەزيدەنت ء«بىز الەمدىك ستاندارتتارعا ساي كەلەتىن ۇلتتىق جوعارى ءبىلىم بەرۋ جۇيەسىن قالىپتاستىرۋىمىز قاجەت» دەپ ناقتى مىندەت جۇكتەدى», دەيدى دەپۋتات.
وسىعان بايلانىستى AMANAT پارتياسى فراكتسياسى بىرنەشە ناقتى ۇسىنىس ەنگىزىپ وتىر.
بىرىنشىدەن, دەپۋتاتتىڭ ايتۋىنشا, ۋنيۆەرسيتەتتىڭ باسشىلىق قۇرامىن قازاقستاندىق ماماندارمەن تولىقتىرۋ ماڭىزدى. «ۆيتسە-پرەزيدەنتتەر, مەكتەپ دەكاندارى مەن وزگە دە باسقارۋشى لاۋازىمدارعا كەمىندە 70 پايىز دەڭگەيىندە قازاقستاندىق ازاماتتاردى تاعايىنداۋ ماسەلەسىن قاراستىرۋ قاجەت. بۇل – ستراتەگيالىق باسىمدىقتاردى تەرەڭ تۇسىنەتىن ءارى زاماناۋي باسقارۋ تاجىريبەسىن يگەرگەن ۇلتتىق كادرلار كورپۋسىن قالىپتاستىرۋعا جول اشادى», – دەيدى جۇلدىز سۇلەيمەنوۆا.
ونىڭ ايتۋىنشا, بۇگىندە «بولاشاق» باعدارلاماسى ارقىلى شەتەلدە ءبىلىم العان, عىلىمي دارەجەلەرى بار جاس ماماندار ەلىمىزدە بار.
«ولارعا جوعارى جاۋاپكەرشىلىك جۇكتەلەتىن لاۋازىمدار ۇسىنۋ – ولاردىڭ شەتەلگە كەتۋىنىڭ الدىن الىپ, ەلىمىزدىڭ عىلىمى مەن ءبىلىم بەرۋ سالاسىنا قىزمەت ەتۋىنە مۇمكىندىك بەرەدى», دەيدى دەپۋتات.
ەكىنشىدەن, سۇلەيمەنوۆانىڭ ايتۋىنشا, نازارباەۆ ۋنيۆەرسيتەتىنىڭ جوعارى ءبىلىم مەكتەبى اياسىندا پەداگوگيكالىق مەنەدجمەنت بويىنشا جاڭا ءبىلىم بەرۋ باعدارلامالارىن ەنگىزۋ قاجەت.
«مەكتەپ ديرەكتورلارى, ولاردىڭ ورىنباسارلارى مەن تاربيە ىسىنە جاۋاپتى ماماندارعا ارنالعان ارنايى باكالاۆريات باعدارلاماسى ازىرلەنىپ, وعان مەملەكەتتىك ءبىلىم گرانتتارى بولىنسە, بۇل ءبىلىم بەرۋ سالاسىن باسقارۋعا قابىلەتتى ماماندار دايارلاۋعا ىقپال ەتەر ەدى», دەيدى ول.
ۇشىنشىدەن, دەپۋتات اۋىل مەكتەپتەرىنىڭ تۇلەكتەرىنە ارنالعان ارنايى دايىندىق باعدارلاماسىن ەنگىزۋدى ۇسىنادى. ونىڭ ايتۋىنشا, قازىرگى تاڭدا نازارباەۆ ۋنيۆەرسيتەتىنىڭ Foundation باعدارلاماسىنا نەگىزىنەن قالالىق جانە يننوۆاتسيالىق مەكتەپ تۇلەكتەرى عانا ءتۇسىپ ءجۇر.
«اۋىل تۇلەكتەرى ءۇشىن بۇل باعدارلاما ءبىلىم دەڭگەيى مەن ورتاداعى ايىرماشىلىقتار سالدارىنان قولجەتىمسىز. سوندىقتان 1,5 جىلدىق ارنايى دايىندىق باعدارلاماسىن ازىرلەۋ قاجەت. بۇل — وڭىرلىك تەڭسىزدىكتى ازايتىپ, دارىندى جاستاردىڭ الەۋەتىن اشاتىن, مەملەكەت باسشىسى اتاپ وتكەن الەۋمەتتىك ادىلەتتىلىك قاعيداتىن ىسكە اسىراتىن ماڭىزدى قادام», دەيدى جۇلدىز سۇلەيمەنوۆا.