اۋىل تۇرعىندارىنا قولجەتىمدى ءارى ساپالى مەديتسينالىق قىزمەت كورسەتۋ ماقساتىندا قولعا الىنعان اۋىلدىق دەنساۋلىق ساقتاۋدى جاڭعىرتۋ جونىندەگى ۇلتتىق جوبا اياسىندا ەلىمىزدىڭ تۇكپىر-تۇكپىرىندە 479 العاشقى مەديتسينالىق-سانيتاريالىق كومەك (مساك) نىسانىنىڭ قۇرىلىسى اياقتالدى. بۇل تۋرالى بۇگىن قر دەنساۋلىق ساقتاۋ ۆيتسە-ءمينيسترى تيمۋر مۇراتوۆ مالىمدەدى, دەپ حابارلايدى Egemen.kz.
جاڭا نىسانداردىڭ 178-ءى بۇعان دەيىن مەديتسينالىق مەكەمەلەرى بولماعان اۋىلداردا سالىنسا, قالعان 301-ءى ەسكىرگەن جانە بەيىمدەلگەن عيماراتتاردىڭ ورنىنا بوي كوتەرگەن.
ۆيتسە-ءمينيستردىڭ ايتۋىنشا, 2025 جىلدىڭ سوڭىنا دەيىن تاعى 176 مساك نىسانىنىڭ قۇرىلىسى اياقتالادى دەپ جوسپارلانعان.
جوبانى ءتيىمدى ءارى جەدەل جۇزەگە اسىرۋ ءۇشىن ەلىمىزدەگى 5 كليماتتىق جانە سەيسميكالىق ايماقتى ەسكەرە وتىرىپ, تيپتىك (ەتالوندىق) جوبالار ازىرلەندى. مۇنداي ءتاسىل جوبالاۋ ۋاقىتىن قىسقارتىپ, قۇرىلىسقا بولىنگەن بيۋدجەتتەن 16,5 ملرد تەڭگەگە جۋىق قاراجاتتى ۇنەمدەۋگە مۇمكىندىك بەرگەن. بۇعان قوسا, ۇلتتىق وپەراتور ازىرلەگەن ستاندارتتى جوبالاردى قولدانۋ ارقىلى قۇرىلىس ساپاسى مەن تيىمدىلىگى ارتتى.
ەڭ باستىسى, ەتالوندىق جوبالار اياسىندا قولدانىلعان قۇرىلىس ماتەريالدارى مەن جابدىقتاردىڭ 80%-دان استامى — وتاندىق تاۋار وندىرۋشىلەردىڭ ونىمدەرى.