اۋىر ماشينا جاساۋ سالاسى قازاقستاننىڭ يندۋستريالىق ءوسۋىنىڭ نەگىزگى قوزعاۋشى كۇشتەرىنىڭ ءبىرى بولىپ تابىلادى, دەپ جازادى Egemen.kz.
بۇل سەكتوردىڭ دامۋى ەل ەكونوميكاسىنىڭ جاڭعىرۋىنا, وندىرىستىك قۋاتتاردىڭ كەڭەيۋىنە جانە ەكسپورتتىق الەۋەتتىڭ ارتۋىنا ىقپال ەتەدى. اسىرەسە تەمىرجول ماشينا جاساۋ سالاسىندا ايتارلىقتاي ءوسىم بايقالادى, سوڭعى جىلدارى حالىقارالىق ينۆەستورلاردىڭ قاتىسۋىمەن بىرنەشە ءىرى جوبالار جۇزەگە اسىرىلدى.
سالانىڭ جەتەكشى كاسىپورىندارىنىڭ ءبىرى — استانادا ورنالاسقان «لوكوموتيۆ قۇراستىرۋ زاۋىتى» اق (لقز). 2009 جىلدان بەرى زاۋىت «قازاقستان تەمىر جولى» مەن تمد ەلدەرى ءۇشىن 500-دەن استام جۇك جانە جولاۋشى لوكوموتيۆتەرىن ءوندىردى. وندىرىستىك پروتسەستەر اقش ستاندارتتارىنا ساي, ال ماماندار شەتەلدە وقىتىلعان.
«ەلەكتروۆوز قۇراستىرۋ زاۋىتى» اق — فرانتسۋزدىق Alstom كومپانياسىنىڭ قاتىسۋىمەن قۇرىلعان كاسىپورىن. زاۋىت جىلىنا 70 ەلەكتروۆوزعا دەيىن شىعارىپ, تەمىرجول ماشينا جاساۋ نارىعىنىڭ شامامەن 30%-ىن قامتيدى. نەگىزگى ونىمدەرى — KZ8A, AZ8A جانە KZ4AT مودەلدەرى, ولار قازاقستان مەن ازەربايجانعا جەتكىزىلەدى.
«شتادلەر قازاقستان» جشس, شۆەيتساريالىق Stadler Rail Group قۇرامىنا كىرەدى جانە استانادا جولاۋشىلار ۆاگوندارىن ءوندىرۋ جوباسىن ىسكە اسىرۋدا. سەز «استانا – جاڭا قالا» اۋماعىندا ورنالاسقان زاۋىت جىلىنا 90 ۆاگون شىعارۋعا قابىلەتتى.
ەكىباستۇز قالاسىندا ورنالاسقان «قازاقستان ۆاگون جاساۋشى كومپانيا» جشس جىلىنا 3000-عا دەيىن جۇك تاسىمالداۋعا ارنالعان جارتىلاي ۆاگوندار شىعارادى. ونىمدەر ىشكى نارىققا جانە تمد ەلدەرىنە, سونىڭ ىشىندە تۇرىكمەنستانعا ەكسپورتتالادى.
اتىراۋ ۆاگونوسترويتەلنىي زاۋىتى (اۆسز) — وڭىرلىك ماڭىزدى كاسىپورىن. زاۋىت جارتىلاي ۆاگوندار مەن كونتەينەرلىك پلاتفورمالار ءوندىرىپ, جوبالاۋدان باستاپ جوندەۋ مەن جاڭعىرتۋعا دەيىن ۆاگوننىڭ بۇكىل ومىرلىك تسيكلىن قامتيدى.
سولتۇستىك قازاقستان وبلىسى, پەتروپاۆل قالاسىنداعى «زيكستو» جشس تەمىرجول جىلجىمالى قۇرامىن قۇراستىرۋ, دانەكەرلەۋ جانە بوياۋمەن اينالىسادى. قازىرگى تاڭدا زاۋىت جۇك ۆاگوندارىنىڭ ءتۇرلى ۇلگىلەرىن جوبالاۋ مەن ءوندىرۋ باعىتىندا يننوۆاتسيالىق جوبالاردى جۇزەگە اسىرۋدا.
وسىلايشا, اۋىر ماشينا جاساۋ سالاسى ەلىمىزدە قۋاتتى ونەركاسىپتىك نەگىز قالىپتاستىرىپ, جاڭا جۇمىس ورىندارىن اشۋعا, حالىقارالىق تەحنولوگيالاردى ەنگىزۋگە جانە قازاقستاننىڭ جاھاندىق نارىقتاعى باسەكەگە قابىلەتتىلىگىن ارتتىرۋعا ەلەۋلى ۇلەس قوسىپ وتىر.