قوناەۆ قالاسىندا مەديتسينا قىزمەتكەرلەرى كۇنىنە ارنالعان مەرەكەلىك شارا ءوتتى

مەرەكەلىك ءىس-شاراعا ارنايى قاتىسقان دەنساۋلىق ساقتاۋ ءمينيسترىنىڭ ورىنباسارى تيمۋر مۇراتوۆ قۇتتىقتاۋ سوزىندە: "مەديتسينا تەك ماماندىق ەمەس, بۇل كاسىپ. بۇگىنگى تاڭدا مەديتسينا قىزمەتكەرلەرىنىڭ كاسىبيلىگىنىڭ ارقاسىندا كۇن سايىن مىڭداعان ادامنىڭ ءومىرى ساقتالۋدا. ءبىز بارلىق اق حالاتتى ابزال جاندارعا ادالدىقتارى, شىدامدىلىقتارى جانە اقىل-ويدان قۇرالعان كۇشتەرى ءۇشىن العىس ايتامىز",-دەدى.

وبلىس اكىمىنىڭ ءبىرىنشى ورىنباسارى نۇرلان ءابدىراحىم مەديتسينا وڭىرلىك ساياساتتىڭ باسىمدىقتارىنىڭ ءبىرى ەكەنىن اتاپ ءوتتى جانە بيىل 239 تەحنيكا مەن 15 سانيتارلىق ماشينا ساتىپ الۋعا 3,4 ملرد تەڭگە بولىنگەنىن جەتكىزدى. قازىردىڭ وزىندە اۋىلداردا 17 جاڭا مەديتسينالىق نىسان ىسكە قوسىلىپ, تاعى 21-ءى سالىنۋدا. مۇنىڭ بارلىعى دارىگەرلەردىڭ زاماناۋي جاعدايدا جۇمىس ىستەۋى جانە پاتسيەنتتەردىڭ ۇيگە جاقىن جەردە ساپالى كومەك الۋى ءۇشىن جاسالىپ جاتقاندىعىن جەتكىزدى.

ءىس-شارا بارىسىندا قاتىسۋشىلار وتاندىق مەديتسينالىق تەحنيكا جانە فارماتسەۆتيكا كورمەسىنە قاتىستى. مادەنيەت ۇيىندە سالتاناتتى قابىلداۋ وتكىزىپ, وندا ۇزدىك دارىگەرلەرگە ماراپاتتار تابىستادى. ءىس-شارانىڭ كۋاگەرلەرى بولعان كورەرمەندەر, شىعارماشىلىق ۇيىمداردىڭ اسەرلى كونتسەرتىن تاماشالادى.

ەسىك قالاسىنا بارعان دەلەگاتسيا, جاڭارتىلعان ەڭبەكشىقازاق اۋداندىق اۋرۋحاناسىمەن تانىستى. مۇندا كۇردەلى جوندەۋدەن كەيىن مەكەمە حالىقارالىق ستاندارتتارعا سايكەس كەلەتىن زاماناۋي جابدىقتار الىپ, قارقىندى تەراپيا بولىمشەلەرىن اشتى.

بۇل وزگەرىستەردىڭ كۇندەلىكتى جۇمىستا قالاي سەزىلەتىنى تۋرالى جالپى تاجىريبەلى دارىگەرى سابيروۆا اينۇر نۇريدينقىزى ايتىپ بەردى. دارىگەردىڭ سوزىنشە, سوڭعى جىلدارى اۋرۋحانادا ۋلترادىبىستىق اپپاراتتار, جاڭا اۆتوكولىكتەر, ىڭعايلى جۇمىس جاعدايلارى جاسالۋدا. تۇرعىنداردىڭ وزدەرى: "قازىر ءبىزدىڭ اۋرۋحانا قالالارداعى اۋرۋحانادان كەم ەمەس",-دەيدى. بۇنىڭ بارلىعى جاقسى سەبەپپەن جاسالاتىن ۇلكەن جۇمىستىڭ ناتيجەسى ەكەندىگىن العا تارتتى.

الماتى وبلىسىندا 3 مىڭعا جۋىق دارىگەر مەن مىڭداعان ورتا بۋىن قىزمەتكەرلەرى جۇمىس ىستەيدى. ولاردىڭ جۇمىسى مارتەبەلى ءارى تاپتىرماس بولىپ قالا بەرەتىندىگى ءسوزسىز.