جامبىل وبلىسى بايزاق اۋدانىنا قاراستى ۇلگىلى اۋىلىندا وڭىردەگى العاشقى شىڭدالعان شىنى شىعاراتىن زاۋىت ءوز جۇمىسىن باستادى. يندۋستريالىق جوبانى جەرگىلىكتى كاسىپكەر قارجىلاندىرىپ, ءساتتى ىسكە اسىردى, دەپ جازادى Egemen.kz.
جاڭا ءوندىرىس وشاعىنىڭ سالتاناتتى اشىلۋ راسىمىنە وبلىس اكىمى ەربول قاراشوكەەۆ, وبلىستىق ءماسليحات دەپۋتاتتارى, اۋدان اكىمشىلىگى مەن اۋىل تۇرعىندارى قاتىستى.
– مەملەكەت باسشىسى قاسىم-جومارت كەمەل ۇلى توقاەۆتىڭ ينۆەستيتسيالىق جوبالاردى قولداۋ جانە جاڭا ءوندىرىس ورىندارىن اشۋ جونىندەگى تاپسىرماسىن ورىنداۋ ماقساتىندا وڭىردە جۇيەلى جۇمىستار جۇرگىزىلۋدە. بۇگىن ىسكە قوسىلعان كاسىپورىن – وسى باستامالاردىڭ ناقتى جەمىسى. بۇل زاۋىت ەل ەكونوميكاسىنىڭ دامۋىنا جانە جەرگىلىكتى حالىقتىڭ ءال-اۋقاتىن جاقسارتۋعا باعىتتالعان ماڭىزدى جوبالاردىڭ ءبىرى.
«تۋعان جەرگە تۋىڭدى تىك» دەگەن حالىق دانالىعىن ۇستانا وتىرىپ, تۋعان ولكەسىنە ينۆەستيتسيا سالىپ, ىسكەرلىك تانىتقان ازاماتتارعا العىسىمدى بىلدىرەمىن! ءوندىرىس وشاعىنىڭ جۇمىسى جەمىستى بولسىن! – دەدى وبلىس اكىمى قۇتتىقتاۋ سوزىندە.
بۇدان سوڭ ەربول قاراشوكەەۆ اۋداندىق ارداگەرلەر كەڭەسىنىڭ توراعاسى بەردىبەك وماروۆپەن بىرگە زاۋىتتىڭ لەنتاسىن قيدى.
جوبانى «JS GLASS» جشس جۇزەگە اسىردى. ينۆەستيتسيا كولەمى – 1 ملرد تەڭگە. كاسىپورىن جىلىنا 100 مىڭ شارشى مەتر شىڭدالعان شىنى وندىرۋگە قاۋقارلى.
زاۋىت قۇرىلتايشىسى جامالحان يبراگيموۆتىڭ سوزىنشە, مۇندا ساپا مەن قاۋىپسىزدىك تالاپتارىنا ساي زاماناۋي تەحنولوگيالار قولدانىلادى. شىنى وڭدەۋ كەشەنىندە 40 اۋىل تۇرعىنى تۇراقتى جۇمىسپەن قامتىلىپ وتىر.
ءوندىرىس ورنى ءوڭىردىڭ ىشكى قاجەتتىلىگىن تولىق قامتاماسىز ەتىپ, ونىمدەرىن الماتى جانە تۇركىستان وبلىستارىنىڭ نارىعىنا شىعارادى.
– سوڭعى ۇلگىدەگى قوندىرعىلارمەن جۇمىس ىستەۋدى قىتايلىق مامانداردىڭ كومەگىمەن ءبىر اي ىشىندە مەڭگەردىك. اۋىلىمىزدا زاۋىتتىڭ اشىلعانىنا وتە قۋانىشتىمىن. جۇمىسىم وزىمە ۇنايدى, – دەيدى ۇلگىلى اۋىلىنىڭ تۇرعىنى, زاۋىت قىزمەتكەرى داستان ابدەليەۆ.