2025 جىلدىڭ 30 ماۋسىمىنان باستاپ قازاقستاندىقتار رەسەيگە ساپار شەگۋ ءۇشىن جاڭا تالاپتارعا ساي بيومەتريالىق تىركەۋدەن وتۋگە مىندەتتى. اۆياكومپانيالار جولاۋشىلاردى اۋەجايعا ەرتەرەك كەلۋگە شاقىرىپ وتىر, دەپ حابارلايدى Egemen.kz.
2025 جىلعى 30 ماۋسىمنان باستاپ رەسەي فەدەراتسياسى شەتەل ازاماتتارى ءۇشىن شەكارادان ءوتۋدىڭ جاڭا ءتارتىبىن ەنگىزەدى. ەندى قازاقستان ازاماتتارى دا رەسەيگە كىرۋ كەزىندە ساۋساق ىزدەرىن تاپسىرىپ, سۋرەتكە ءتۇسىپ, مىندەتتى بيومەتريالىق سايكەستەندىرۋدەن ءوتۋى ءتيىس.
بۇل تۋرالى Vietjet Qazaqstan اۆياكومپانياسى (بۇرىنعى Qazaq Air) جولاۋشىلارىنا رەسمي تۇردە حابارلادى. كومپانيا شەكارالىق باقىلاۋدان ءوتۋ كەزىندە كىدىرىستەر بولۋى مۇمكىن ەكەنىن ەسكەرتىپ, جولاۋشىلارعا اۋەجايعا كەمىندە ءۇش ساعات بۇرىن كەلۋگە كەڭەس بەرەدى.
– بيومەتريالىق دەرەكتەردى جيناۋ 30 ماۋسىمنان باستاپ مىندەتتى بولادى; – شەتەلدىكتەر ەسيا جۇيەسىندە (مەملەكەتتىك قىزمەتتەر پورتالى) الدىن الا تىركەلىپ, ارنايى ءموبيلدى قوسىمشادا ساۋالناما تولتىرۋى قاجەت; – ساۋالناما ۇشۋعا 72 ساعات قالعاندا جىبەرىلۋى ءتيىس.
ء«بىز جولاۋشىلارىمىزعا بارلىق راسىمدەردەن وتۋگە قوسىمشا ۋاقىت قاراستىرۋدى ۇسىنامىز. بۇل كۇتپەگەن كىدىرىستەر مەن رەيسكە كەشىگۋدىڭ الدىن الادى», دەدى Vietjet Qazaqstan حابارلاماسىندا.
جاڭا تالاپتار رەسەي ۇكىمەتىنىڭ 2024 جىلعى 7 قاراشاداعى قاۋلىسى نەگىزىندە ەنگىزىلىپ وتىر. بيومەتريالىق تىركەۋ – شەتەل ازاماتتارىنىڭ ەلگە كىرۋىن باقىلاۋدى كۇشەيتۋ ماقساتىنداعى پيلوتتىق جوبانىڭ ەكىنشى كەزەڭى. بۇل جۇيە قاۋىپسىزدىكتى ارتتىرۋدى جانە دەرەكتەردى اۆتوماتتى تۇردە تەكسەرۋدى كوزدەيدى.
ساراپشىلاردىڭ پىكىرىنشە, جاڭا جۇيە العاشقى كەزەڭدە پاسپورتتىق باقىلاۋ ۇزاقتىعىنىڭ ارتۋىنا, اۋەجايداعى ۇزاق كۇتۋلەر مەن كىدىرىستەرگە اكەلۋى مۇمكىن. وسىعان بايلانىستى جەكە جانە ىسكەرلىك ساپارلار كەزىندە الدىن الا دايىندالۋ قاجەت.
جاڭا تارتىپكە قاتىستى تولىق اقپارات پەن ساۋالنامانى تولتىرۋ نۇسقاۋلىعى رەسەيدىڭ مەملەكەتتىك قىزمەتتەر پورتالىندا جانە ءموبيلدى قوسىمشادا قولجەتىمدى.
جانەل تولەۋبەكوۆا, ەۇۋ ستۋدەنتى