وڭىردە قالدىقتاردى باسقارۋ ينفراقۇرىلىمىن دامىتۋ ءۇشىن «جاسىل دامۋ» اق ارقىلى ەكى ينۆەستيتسيالىق جوبا قولعا الىنعان. كوگالداندىرۋ باعىتىندا 31 568 ءتۇپ اعاش وتىرعىزۋ جوسپارلانىپ, ونىڭ 45%-ى ورىندالعان, دەپ جازادى Egemen.kz.
ماڭعىستاۋ وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى ءسابيت دۇيسەكەنوۆتىڭ ايتۋىنشا ايماقتا «تازا قازاقستان» اكتسياسى اياسىندا اۋقىمدى جۇمىستار اتقارىلعان.
«بيىل ەكولوگيالىق ناۋقانعا وبلىس بويىنشا 25 مىڭنان استام تۇرعىن قاتىسىپ, 4200 ءتۇپ اعاش وتىرعىزىلدى. ءىس-شارا بارىسىندا 448 تەحنيكا جۇمىلدىرىلىپ, جالپى كولەمى 3540 توننا تۇرمىستىق جانە قۇرىلىس قالدىقتارى شىعارىلدى. سونداي-اق, ازاماتتاردىڭ ەكولوگياعا قاتىستى شاعىمدارى مەن ۇسىنىستارى «Tazaqazaqstan.kz» پلاتفورماسى ارقىلى تۇراقتى تۇردە قابىلدانىپ, ۋاقىتىلى جاۋاپتار بەرىلۋدە», دەدى ءسابيت دۇيسەكەنوۆ.
وتكەن جىلى عارىشتىق مونيتورينگ ناتيجەسىندە 68 قوقىس الاڭى انىقتالىپ, ونىڭ 64-ءى جويىلعان. «كىشى ويماشى» كولىنىڭ ماڭىندا 540 توننا قوقىس شىعارىلىپ, تازالىق جۇمىستارى جۇرگىزىلگەن.
سونداي-اق, «قوشقار-اتا» قالدىق قويماسىن قالپىنا كەلتىرۋ جۇمىستارى دايىندىق كەزەڭىندە. 2025-2027 جىلدارى 400 گەكتار اۋماققا سەكسەۋىل كوشەتتەرى وتىرعىزىلادى دەپ جوسپارلانعان.
الينا قايراتقىزى, ەۇۋ ستۋدەنتى