قازاقستاندا كولىكتەردىڭ الدىڭعى بۇيىرلىك اينەكتەرىن قاراڭعىلاۋعا تىيىم سالىنعانىنا ون جىلدان استى. الايدا بۇل ماسەلە قايتا كۇن تارتىبىنە شىقتى. ءماجىلىس دەپۋتاتى ولجاس قۇسبەكوۆ بۇل تىيىمدى اقىلى نەگىزدە زاڭداستىرۋدى ۇسىندى, دەپ حابارلايدى Egemen.kz.
ونىڭ ايتۋىنشا, الدىڭعى بۇيىرلىك تەرەزەلەرگە تونيروۆكا جاساۋ قۇقىعىن اقشاعا ساتۋ – بيۋدجەتكە تۇراقتى تابىس كوزىنە اينالۋى مۇمكىن. ۇلتتىق ستاتيستيكا بيۋروسىنىڭ دەرەگىنە سۇيەنگەن دەپۋتات 2024 جىلدىڭ 1 مامىرىنا دەيىن ەلدە 6,1 ميلليون كولىك تىركەلگەنىن, ونىڭ 86,5 پايىزى جەڭىل كولىكتەر ەكەنىن ايتتى.
«اۆتوپاركتىڭ تەك 5 پايىزى عانا بۇل رۇقساتتى ساتىپ العان كۇننىڭ وزىندە, ورتاشا باعا 50 اەك (196 600 تەڭگە) بولسا, جىل سايىن بيۋدجەتكە 50 ميلليارد تەڭگەدەن استام قاراجات تۇسەدى. بۇل قاراجاتتى جول ينفراقۇرىلىمىن دامىتۋ مەن جوندەۋگە باعىتتاۋعا بولادى», دەدى قۇسبەكوۆ.
سونداي-اق دەپۋتات بۇل باستامادا مىندەتتى تالاپ رەتىندە جارىق وتكىزۋى كەمىندە 70 پايىز بولۋ كەرەك ەكەنىن باسا ايتتى. ول قىرعىزستان مەن وزبەكستاندا مۇنداي باستاما ءساتتى جۇزەگە اسقانىن مىسالعا كەلتىردى. سونىمەن قاتار, قۇسبەكوۆ كولىك ساناتىنا قاراي (ەكونوم, بيزنەس, پرەميۋم) ديففەرەنتسيالدى تاريفتەر ەنگىزۋدى دە ۇسىندى.
ءماجىلىس دەپۋتاتتارىنىڭ ۇسىنىسىنان كەيىن بۇل ماسەلە ورتالىق كوممۋنيكاتسيالار قىزمەتىندە وتكەن بريفينگتە كوتەرىلدى. وندا ىشكى ىستەر مينيسترلىگىنىڭ اكىمشىلىك پوليتسيا كوميتەتى توراعاسىنىڭ ورىنباسارى الەكسەي ميليۋك پىكىر ءبىلدىردى:
«بۇل ماسەلە شىنىمەن كوتەرىلدى. ءالى دە اۋقىمدى تالقىلاۋ وتەدى. دەپۋتاتتاردىڭ بۇل باستاماسىن جالپى قولدايمىز با, جوق پا – سونى شەشۋىمىز كەرەك», دەدى ول.
ايتا كەتەيىك, قازاقستاندا الدىڭعى تەرەزەلەردى قاراڭعىلاۋعا تىيىم 2010 جىلى ەنگىزىلگەن. ول كەزدە بۇل شەشىم جول ەرەجەلەرىن بۇزعان جۇرگىزۋشىلەردى جانە جولاۋشىلاردى انىقتاۋ قيىنعا سوققانىنا بايلانىستى قابىلدانعان ەدى.
وتكەن جىلى ءىىم ۆيتسە-ءمينيسترى مارات قوجاەۆ بۇل ماسەلە قايتا قارالىپ جاتقانىن ايتقان. ول كەدەن وداعىنىڭ تەحنيكالىق رەگلامەنتىندە الدىڭعى اينەكتەرگە بەلگىلى ءبىر مولشەردە تونيروۆكا جاساۋعا رۇقسات بار ەكەنىن اتاپ وتكەن بولاتىن.
ءماجىلىس دەپۋتاتتارىنىڭ باستاماسى قوعامدا قىزۋ تالقىلاۋ تۋدىرىپ وتىر. ەگەر ۇسىنىس قابىلدانسا, بۇل بيۋدجەتكە قوسىمشا تابىس اكەلۋىمەن قاتار, كولىك جۇرگىزۋشىلەرىنە بەلگىلى ءبىر ەركىندىك بەرمەك. الايدا ءىىم بۇل شەشىمنىڭ قاۋىپسىزدىكپەن تىكەلەي بايلانىستى ەكەنىن ەسكەرتىپ وتىر. الداعى ۋاقىتتا بۇل ماسەلە اشىق قوعامدىق جانە مەملەكەتتىك تالقىلاۋدان كەيىن عانا ناقتى شەشىمىن تاپپاق.
ارايلىم مىرزاحان,
ەۇۋ 2 كۋرس ستۋدەنتى