الماتى قالاسىنداعى نازارباەۆ زياتكەرلىك مەكتەبىندە ورىن العان رەزونانستىق جاعدايعا بايلانىستى «نازارباەۆ زياتكەرلىك مەكتەپتەرى» دببۇ باسقارما توراعاسى انۋار جانعوزين وقۋشىمەن, ونىڭ اتا-اناسىمەن جانە پەداگوگيكالىق ۇجىممەن كەزدەسۋلەر وتكىزدى, دەپ حابارلايدى Egemen.kz.
تالقىلاۋعا قر وقۋ-اعارتۋ مينيسترلىگىنىڭ وكىلدەرى, وڭىرلىك بالا قۇقىقتارى جونىندەگى ۋاكىل جانە قوعامدىق كەڭەس مۇشەلەرى قاتىستى. ناتيجەسىندە وقۋشى مەملەكەتتىك جالپى ءبىلىم بەرۋ مەكتەبىنە اۋىستىرىلدى. اتا-انالار بۇل شەشىمگە قارسىلىق بىلدىرمەدى.
«نزم ءاردايىم وقۋشىلارعا ادالدىق تانىتا وتىرىپ, ءوزارا قۇرمەت پەن سىندارلى قارىم-قاتىناس ۇستانىمدارىن ۇستانادى, الايدا ۇستازدارعا دەگەن قۇرمەت ماسەلەسىندە قاتاڭ پوزيتسيانى ساقتايدى», دەدى انۋار جانعوزين.
وقۋ-اعارتۋ ءمينيسترىنىڭ تاپسىرماسىمەن الماتىعا بالا قۇقىقتارىن قورعاۋ كوميتەتىنىڭ توراعاسى دا باردى. مينيسترلىك وكىلدەرىنىڭ, وڭىرلىك ۋاكىل مەن جۇرتشىلىقتىڭ قاتىسۋىمەن وتكەن كوشپەلى كەزدەسۋلەر بارىسىندا جاعداي جان-جاقتى تالدانىپ, ونى شەشۋدىڭ جولدارى قاراستىرىلدى.
قر وقۋ-اعارتۋ مينيسترلىگى «پەداگوگ مارتەبەسى تۋرالى» قر زاڭىن قاتاڭ ساقتاۋدىڭ ماڭىزدىلىعىن ەسكە سالدى. مۇعالىمدى قۇرمەتتەۋ مەن قاۋىپسىز ءبىلىم بەرۋ ورتاسىن قامتاماسىز ەتۋ – ءبىلىم بەرۋ سالاسىنداعى مەملەكەتتىك ساياساتتىڭ بۇلجىماس باسىمدىقتارى بولىپ قالا بەرەدى.
ەسكە سالا كەتەيىك, الماتى قالاسىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى توقساندىق قورىتىندى باقىلاۋ كەزىندە اكادەميالىق ادالدىق ەرەجەسىن بۇزىپ, ۇيالى تەلەفون قولدانعان. ال ەسكەرتۋ جاساعان مۇعالىمدى بالاعاتتاعان. ناتيجەسىندە وقۋشى مەكتەپتەن شىعارىلىپ, جالپى ءبىلىم بەرۋ مەكتەبىنە اۋىستىرىلعان.