اقمولا وبلىسى مەن ەستونيا رەسپۋبليكاسىنداعى Muuga Grain Terminal استىق تەرمينالى اراسىندا ءوزارا ىنتىماقتاستىق تۋرالى ەكىجاقتى مەموراندۋم قابىلداندى. قۇجات بيىلعى اقپاندا وبلىس اكىمىنىڭ ەستونياعا جاساعان جۇمىس ساپارى اياسىندا راسىمدەلگەن. بۇل كەلىسىم قازاقستاندىق ءونىمدى ەۋروپا نارىعىنا جاڭا لوگيستيكالىق باعىت ارقىلى جەتكىزۋگە مۇمكىندىك بەرىپ وتىر, دەپ حابارلايدى Egemen.kz.
وبلىستىڭ ىشكى ساياسات باسقارماسىنىڭ حابارلاۋىنشا, بۇگىندە العاشقى ناتيجەلەر دە بار. 2025 جىلدىڭ باسىنان بەرى اقمولا وبلىسىنىڭ ەكى كاسىپورنى يتالياعا 5,6 مىڭ توننا استىق ەكسپورتتاعان. ونىڭ ىشىندە 1,6 مىڭ توننا ءونىم «سودرۋجەستۆو ترەيد ۆوستوك» جشس تاراپىنان ەستونيا ارقىلى جونەلتىلگەن.
«ەۋروپا باعىتىنداعى ەكسپورتتىق لوگيستيكانى دامىتۋ – اۋىل شارۋاشىلىعى تاۋارىن وندىرۋشىلەرگە تەك تۇراقتى وتكىزۋ نارىعىن عانا ەمەس, سونىمەن قاتار ءونىمنىڭ باسەكەگە قابىلەتتىلىگىن ارتتىرۋعا دا مۇمكىندىك بەرەدى», دەلىنگەن حابارلامادا.
قازىرگى تاڭدا وبلىس اكىمدىگى بيزنەس وكىلدەرىمەن بىرگە ەكسپورتتىق گەوگرافيانى كەڭەيتۋ, سونداي-اق استىقتان وزگە اۋىل شارۋاشىلىعى ونىمدەرىن سىرتقى نارىققا شىعارۋعا باعىتتالعان جۇمىستاردى جالعاستىرىپ جاتىر.