كۇنى كەشە ءتۇرلى باق-تاردا, الەۋمەتتىك جەلىلەردە قوناەۆ قالاسىنىڭ تۇرعىندارىنىڭ سانى سوڭعى ءبىر جىلدا 8,2%-عا ازايىپ, 65900-گە ءتۇسىپ كەتكەنى جايىندا اقپارات تارادى. Data Hub تىلشىلەرى بۇل قۇبىلىستىڭ ناقتى سەبەبىن تۇسىندىرە الماعان.
«وسىعان بايلانىستى قوناەۆ قالاسىنىڭ اكىمدىگى مالىمدەمە جاسادى» - دەپ حابارلايدى قوناەۆ قالاسى اكىمىنىڭ ءباسپاسوز قىزمەتى.
«بارشاعا ءمالىم, 2024 جىلدىڭ 9 قاڭتارىندا الاتاۋ قالاسى قۇرىلدى. وعان قوناەۆ قالاسى اۋماعىنداعى زارەچنىي, ارنا اۋىلدارى تولىعىمەن ەنگىزىلدى. سايكەسىنشە, قالا حالقىنىڭ سانى ازايدى. 2023 جىلى قوناەۆ تۇرعىندارىنىڭ سانى 70512 بولسا, 2024 جىلى بۇل كورسەتكىش 65024-كە تومەندەگەن. الايدا, حالىق سانى قايتا ءوسىپ كەلە جاتىر, قازىرگى كورسەتكىش 65934-ءتى قۇراپ وتىر. وسى سەبەپتەن, حالىق اراسىندا «وبلىس ورتالىعى ءومىر سۇرۋگە قولايسىز قالا» دەگەن جاڭساق پىكىر تۋدىرماۋلارىڭىزدى سۇرايمىز», - دەپ جازدى اكىمدىك.
«قوناەۆتا كۇندەلىكتى مادەني, سپورتتىق شارالار ءوتىپ جاتىر. ونىڭ ىشىندە جازعى جانە قىستىق دريفت شوۋ, وۋشەنمەن, ءتۇرلى مارافوندار, جارىستار بار. وسىنىڭ ءوزى-اق قالاعا جان بىتكەنىن كورسەتەدى. تۇرعىنداردىڭ دەمالۋىنا قولايلى ورتا جاسالىپ, دەنەشىنىقتىرۋشىلاردىڭ سانى ارتقان. ونىڭ دالەلى - كروسسفيت الاڭى مەن جاڭا جاعاجايلار. شومىلۋ ماۋسىمىنا دايىندىق قىزۋ ءجۇرىپ جاتىر. ينۆەستيتسيالىق جوبالار دا جۇزەگە اسۋدا. تۇرعىن ۇيلەردىڭ قۇرىلىسى قارقىن الدى. تىزبەكتەپ ايتا بەرسەك, كوپ ارينە. حالىق سانى ازايدى دەپ ايتا سالۋ – وڭاي. ەل ىشىندە نە بولىپ جاتقانىنا اسا ءمان بەرۋ قاجەت», – دەيدى قالالىق قوعامدىق كەڭەس توراعاسى سەرگەي گوريانوي.
تاعى ءبىر پىكىرمەن «PARYZ ەرىكتىلەرى» جاستار قوعامدىق بىرلەستىگىنىڭ توراعاسى ادىلەت ايتقازى ءبولىستى. جاس ماماننىڭ سوزىنشە, قالا حالقىنىڭ بىرلىگى بەكەم, تىرشىلىگى تاۋداي.
«قوناەۆ قالاسىنىڭ تۇرعىندارى ارقاشان بىرلەسە قىزمەت ەتەدى. ونى ازاماتتىق ۇستانىمدارىنان اڭعارۋعا بولادى. قالاداعى ماسەلەلەردى كوتەرىپ, ونىڭ شەشىلۋىنە ءبىر كىسىدەي اتسالىسادى. حالىق سانى ماڭىزدى شىعار, الايدا, ونىڭ كۇندەلىكتى تىرشىلىگى ودان دا ماڭىزدىراق. باس جوسپار بويىنشا تۇرعىندار سانى 200 مىڭ بولادى دەپ جوسپارلانعان. قازىردىڭ وزىندە 65 مىڭنان اسىپ تۇرساق, بۇل مەجەگە تەزارادا جەتەمىز. جوسپاردا انىقتالعانداي, «جاڭا ىلە» اۋماعى يگەرىلىپ, اكادەميالىق قالاشىق سالىنسا, قونىستانۋشىلاردىڭ سانى ارتىپ, شاھار داميدى. قازىردىڭ وزىندە دامۋ قارقىنى جامان ەمەس», - دەدى ادىلەت ايتقازى.
ءوز كەزەگىندە اكىمدىك وكىلدەرى جالعان اقپارات تاراتىپ, الەۋمەتتىك شيەلەنىس تۋدىرعانى ءۇشىن قر زاڭنامالارى شەڭبەرىندە جاۋاپكەرشىلىك قاراستىرىلعانىن ەسكە سالدى.
الماتى وبلىسى.