قازاقستاندا شەتەلدىك بەدەلدى جوعارى وقۋ ورىندارىنىڭ فيليالدارى كوپتەپ اشىلىپ جاتىر. بۇل قادامدى عىلىم جانە جوعارى ءبىلىم مينيسترلىگى ەلىمىزدى اكادەميالىق حاب رەتىندە قالىپتاستىرۋ جانە ءبىلىم «ەكسپورتىن» دامىتۋعا باعىتتالعان دەپ تۇسىندىرەدى. جاقىندا تاعى ءبىر شەتەلدىك ۋنيۆەرسيتەتتىڭ فيليالى قازاقستاندا اشىلدى.
بۇل – گونكونگتىڭ CityU (City University of Hong Kong) ۋنيۆەرسيتەتىنە قاراستى CityU زەرتتەۋ جانە يننوۆاتسيالار ينستيتۋتىنىڭ (CityUHK Institute of Research and Innovation – CIRI) فيليالى. اتالعان فيليال ساتباەۆ ۋنيۆەرسيتەتى بازاسىندا اشىلدى.
CityU – الەمدەگى ەڭ جىلدام دامىپ كەلە جاتقان جاس عىلىمي-زەرتتەۋ ۋنيۆەرسيتەتتەرىنىڭ ءبىرى. ول از عانا ۋاقىت ىشىندە QS رەيتينگى بويىنشا 62-ورىنعا, ال Times Higher Education ءتىزىمى بويىنشا 78-ورىنعا شىقتى. ستەنفورد ۋنيۆەرسيتەتىنىڭ مالىمەتىنشە, CityU-دىڭ 170-تەن استام وقىتۋشىسى الەمدەگى ەڭ كوپ دايەكسوز كەلتىرىلگەن عالىمداردىڭ توپ-2% قاتارىنا كىرەدى.
ينستيتۋتتىڭ رەسمي اشىلۋ سالتاناتىنا عىلىم جانە جوعارى ءبىلىم ۆيتسە-ءمينيسترى دينارا ششەگلوۆا, الماتى قالاسى اكىمىنىڭ ورىنباسارى ازامات قالدىبەكوۆ, قحر-نىڭ باس كونسۋلى تسزيان ۆەي جانە باسقا دا رەسمي تۇلعالار قاتىستى.
جيىندا ءسوز العان عىلىم جانە جوعارى ءبىلىم ۆيتسە-ءمينيسترى دينارا ششەگلوۆا: «بۇل قازاقستاننىڭ جوعارى ءبىلىم بەرۋ جۇيەسى ءۇشىن شىن مانىندە ماڭىزدى وقيعا بولدى. City University of Hong Kong ۋنيۆەرسيتەتى سياقتى بەدەلدى ۋنيۆەرسيتەتتىڭ فيليالىن اشۋ بىزگە جوعارى بىلىكتى كادرلاردى دايارلاۋعا عانا ەمەس, عىلىم مەن وزىق زەرتتەۋلەردى بىرلەسىپ دامىتۋعا دا مۇمكىندىك بەرەدى. بۇل ىنتىماقتاستىق قارىم-قاتىناس ەكى ەل اراسىنداعى بەرىك كوپىرگە اينالاتىنىنا جانە قازاقستاندىق ءبىلىم بەرۋ جۇيەسىن جاڭا, حالىقارالىق دەڭگەيگە شىعارۋعا ىقپال ەتەتىنىنە سەنىمدىمىن», دەدى.
ال ساتباەۆ ۋنيۆەرسيتەتىنىڭ رەكتورى مەيرام بەگەنتاەۆ: «شەتەلدىك ۋنيۆەرسيتەت فيليالىنىڭ ساتباەۆ ۋنيۆەرسيتەتىندە اشىلۋى — عىلىم جانە جوعارى ءبىلىم مينيسترلىگىنىڭ قازاقستاندا ءبىلىم مەن عىلىم ساپاسىن ارتتىرۋعا باعىتتالعان اۋقىمدى باعدارلاماسىنىڭ ءبىر بولىگى. مەملەكەتتىك قولداۋدىڭ ارقاسىندا قازاقستاندىق ستۋدەنتتەر CityU سىندى الەمدىك دەڭگەيدەگى عىلىمي ورتالىقتاردا جوعارى ساپالى ءبىلىم الۋعا مۇمكىندىك الىپ وتىر», دەدى.
ەكىنشى تاراپتان سويلەگەن CityU ديرەكتورلار كەڭەسىنىڭ توراعاسى مايكل نگاي: «بۇگىن ءبىز تەك فيليال اشىپ قانا قويماي, جاھاندىق دەڭگەيدە ويلايتىن كوشباسشىلار مەن جاڭاشىل عالىمداردى دايارلاۋعا نەگىز قالادىق. ولار ادامزاتتىڭ وزەكتى ماسەلەلەرىن شەشۋگە ۇلەس قوسىپ, قازاقستان مەن گونكونگتىڭ, سونداي-اق بۇكىل الەم قاۋىمداستىعىنىڭ وركەندەۋىنە قىزمەت ەتەدى», دەدى.
ءدال وسى كۇنى CityU مەن ساتباەۆ ۋنيۆەرسيتەتى اراسىندا PhD دەڭگەيىندەگى قوس ديپلومدى ءبىلىم بەرۋ باعدارلاماسىن ىسكە قوسۋ تۋرالى مەموراندۋمعا قول قويىلدى. بۇل – قازاقستاندىق ۋنيۆەرسيتەت پەن الەمنىڭ توپ-100 ۋنيۆەرسيتەتتەرى قاتارىنا كىرەتىن بەدەلدى جوعارى وقۋ ورنى اراسىندا جاسالعان العاشقى كەلىسىم.
ەكى ۋنيۆەرسيتەت اراسىندا وسىعان دەيىن قول قويىلعان ستراتەگيالىق سەرىكتەستىك كەلىسىمگە سايكەس ماتەريالتانۋ (Material Science), جاساندى ينتەللەكت, كومپيۋتەرلىك عىلىمدار (Computer Science) جانە ازاماتتىق قۇرىلىس (Civil Engineering) ماماندىقتارىنا باعىتتالعان قوس ديپلومدى ءبىلىم بەرۋ باعدارلامالارى ىسكە قوسىلدى, باكالاۆرياتتا وقۋ «2+2» جانە ماگيستراتۋرادا وقۋ «1+1» فورماتى بويىنشا وتەدى.
فيليالداعى وقۋ ستۋدەنتتەرگە عىلىم جانە جوعارى ءبىلىم مينيسترلىگىنىڭ مەملەكەتتىك گرانتى نەگىزىندە تولىقتاي اعىلشىن تىلىندە ءبىلىم الۋعا مۇمكىندىك بەرەدى. باكالاۆرلار العاشقى 2 وقۋ جىلىن الماتىدا وتكىزسە, سوڭعى 2 جىلدى گونكونگتا وتكىزەدى. ال PhD باعدارلاماسىنىڭ قاتىسۋشىلارى گونكونگتاعى وقۋ بارىسىندا الەمدىك عىلىمي زەرتحانالاردا جەتەكشى عىلىمي توپتارمەن بىرگە تاعىلىمدامادان وتەدى.