الماتى وبلىسى تالعار اۋدانىندا اتىس بولدى, دەپ حابارلايدى Egemen.kz.
تالعار اۋدانىنداعى اتىس تۋرالى اقپارات 8 مامىر كۇنى كەشكە الەۋمەتتىك جەلىدە تاراي باستادى. جەلى قولدانۋشىلارى وقيعا ورنىنان تۇسىرىلگەن فوتو جانە ۆيدەولاردى ءبولىسىپ, بىرنەشە ادامنىڭ قاتىسقانىن مالىمدەدى.
پوليتسيا بۇل وقيعانىڭ بولعانىن راستادى جانە اتالعان فاكتى بويىنشا بىرنەشە قىلمىستىق ءىس قوزعالعانىن حابارلادى. قازىرگى ۋاقىتتا سوتقا دەيىنگى تەرگەۋ جۇمىستارى جۇرگىزىلىپ جاتىر.
— جەدەل ءىس-شارالار ناتيجەسىندە قاقتىعىسقا قاتىسقانداردىڭ بارلىعى انىقتالدى. جاراقات الىپ, اۋرۋحاناعا جەتكىزىلگەن ءتورت كۇدىكتى قازىرگى ۋاقىتتا مەديتسينالىق قىزمەتكەرلەردىڭ باقىلاۋىندا. تاعى ءبىر ادام ۇستالىپ, ۋاقىتشا ۇستاۋ يزولياتورىنا قامالدى, — دەدى پوليتسيا.
قۇقىق قورعاۋ ورگاندارى قالعان قاتىسۋشىلار مەن وقيعا كۋاگەرلەرىن ىزدەستىرىپ جاتىر.