وتان قورعاۋشىلار كۇنىنە وراي ماڭعىستاۋ وبلىسىنىڭ بەينەۋ اۋدانىندا سوعىسقا قاتىسقان مايدانگەرلەردىڭ ۇرپاقتارى ءوز اتا-بابالارىنىڭ ەرلىكتەرىن ەسكە الىپ, رۋحىنا تاعزىم ەتتى. ەلىنىڭ بەيبىت بولاشاعى ءۇشىن جانىن قيعان جاۋىنگەرلەردىڭ ونەگەلى ءومىر جولى جاستارعا ۇلگى رەتىندە ۇسىنىلىپ, رۋحاني تاربيەلىك ءمانى زور ءىس-شارا ءوتتى, دەپ حابارلايدى Egemen.kz.
وبلىس اكىمدىگىنىڭ حابارلاۋىنشا, مەموريالدىق كەشەندەگى «ماڭگىلىك الاۋ» ماڭىنا جينالعان جۇرتشىلىق گۇل شوقتارىن قويىپ, قازا تاپقان باتىرلاردى ۇنسىزدىكپەن ەسكە الدى.
سالتاناتتى جيىن بارىسىندا بەينەۋ اۋدانىنىڭ اكىمى راقىمجان شالباەۆ, اۋداندىق ءماسليحات توراعاسى ارداق بوراش جانە ارداگەرلەر كەڭەسىنىڭ توراعاسى شايحى ازانوۆ ءسوز سويلەپ, سوعىس ارداگەرلەرىنە دەگەن حالىق العىسىن بىلدىرگەن.
«بابالار رۋحىنا تاعزىم ەتۋ – ۇرپاقتار ساباقتاستىعى مەن وتكەنگە دەگەن قۇرمەتتىڭ ناقتى كورىنىسى. بۇل – جاستاردىڭ ەلگە دەگەن سۇيىسپەنشىلىگىن ارتتىرىپ, پاتريوتتىق سەزىمىن وياتاتىن تاعىلىمدى شارا», دەدى ۇيىمداستىرۋشىلار.
شارا اياسىندا ارداگەرلەردىڭ ۇرپاقتارى وزدەرىنىڭ اتا-بابالارى جايلى ەستەلىكتەرمەن ءبولىسىپ, ولاردىڭ جاۋىنگەرلىك جولى مەن تىلداعى ەرلىكتەرىن باياندادى.
ءىس-شارانى بەينەۋ اۋدانى اكىمدىگىنىڭ قولداۋىمەن اۋداندىق ارداگەرلەر كەڭەسى ۇيىمداستىرعان.