كودەكستىڭ ءبىرىنشى بلوگى سۋ ۇنەمدەۋدىڭ جاڭا تەتىكتەرىن ەنگىزۋگە جانە سۋ نىساندارىن قورعاۋعا باعىتتالعان. زاڭناماعا العاش رەت «سۋ قاۋىپسىزدىگى» ۇعىمى ەنگىزىلدى, دەپ حابارلايدى Egemen.kz.
بۇل ازاماتتار مەن ەل ەكونوميكاسىن سۋ تاپشىلىعىنان, ال سۋ نىساندارىن لاستانۋدان قورعاۋدى, سونداي-اق ترانسشەكارالىق سۋ نىساندارىن قورعاۋ مەن پايدالانۋ سالاسىندا قازاقستان رەسپۋبليكاسىنىڭ مۇددەسىنە قىزمەت ەتەدى.
ەكىنشى بلوك سالانى باسقارۋ تاسىلدەرىن قايتا قاراستىرادى. وندا سۋ رەسۋرستارىن قورعاۋدىڭ باسىم باعىتتارىنا, شەشىم قابىلداۋعا جۇرتشىلىقتى كەڭىنەن تارتۋعا جانە سۋ شارۋاشىلىعى باسسەيندەرى نەگىزىندە باسقارۋعا ءمان بەرىلگەن.
ءۇشىنشى بلوك سۋ تاسقىنىنىڭ, سۋدان كەلەتىن زيان مەن زالالدىڭ الدىن الۋ جانە جويۋ جونىندەگى ءىس-شارالاردى قامتيدى.
ءتورتىنشى بلوكتا سۋ قورىن پايدالانۋ مەن قورعاۋ سالاسىنداعى مەملەكەتتىك رەتتەۋ جانە باقىلاۋ قاتاڭداتىلدى. باسسەيندىك سۋ ينسپەكتسيالارىنا مەملەكەتتىك باقىلاۋ فۋنكتسياسىنان بولەك, جەدەل ارەكەت ەتە وتىرىپ مەملەكەتتىك قاداعالاۋ جونىندەگى وكىلەتتىلىكتەر بەرىلدى.
بەسىنشى بلوك گيدروتەحنيكالىق قۇرىلىستاردىڭ قاۋىپسىزدىگىن قامتاماسىز ەتۋگە باعىتتالعان.