قازاقستاندا سالىقتار, تولەمدەر مەن الىمدار سانى ازايادى

ء«بىز سالىقتاردى, تولەمدەر مەن الىمداردى ازايتامىز. بۇل سالىقتىق اكىمشىلەندىرۋدى جەڭىلدەتىپ قانا قويماي, ۋاقىتتى ۇنەمدەيتىن قادام, سونىمەن قاتار كومپانيالارعا ءوز دامۋىنا كوبىرەك رەسۋرستار باعىتتاۋعا مۇمكىندىك بەرەدى», دەپ اتاپ ءوتتى ۆيتسە-پرەمەر. 

رەفورمالار شەڭبەرىندە سالىقتاردىڭ جالپى سانى 12-دەن 11-گە دەيىن قىسقارادى – بىرىڭعاي جەر سالىعىن جەكە تابىس سالىعىنىڭ (جتس) قۇرامىنا ەنگىزۋ ۇسىنىلادى. تولەمدەردىڭ 10 تۇرىنەن – جارناما ورنالاستىرعانى جانە ليتسەنزيالاردى پايدالانعانى ءۇشىن 2 تولەم ءتۇرى الىنىپ تاستالادى.

«سونىمەن قاتار 3 تولەم: سۋ رەسۋرستارىن, ورمان جانە جانۋارلار الەمىن پايدالانۋ ءۇشىن – تابيعي رەسۋرستاردى پايدالانعانى ءۇشىن بىرىڭعاي تولەمگە بىرىكتىرىلەدى», دەپ ءتۇسىندىردى سەرىك جۇمانعارين. 

ونىڭ ايتۋىنشا, مولشەرمەلەر سانى 77-گە, 373-تەن 296-عا دەيىن قىسقارادى. بارلىق تولەمدەر سانى 10-نان 6-عا دەيىن ازايادى.

سونداي-اق سەرىك جۇمانعارين وزگەرىستەر الىمدارعا اسەر ەتەتىنىن ايتتى. ۇكىمەت 34 مولشەرلەمەنى الىپ تاستاپ, الىمداردىڭ 6 ءتۇرىن قىسقارتۋدى ۇسىنادى. ونىڭ ىشىندە دارىلىك زاتتار مەن مەديتسينالىق بۇيىمداردى, عارىش وبەكتىلەرىن تىركەۋ جانە قايتا تىركەۋ, جىلجىمالى م ۇلىك كەپىلى جانە كەمە يپوتەكاسى, باق-تى ەسەپكە قويۋ, قارجى نارىعىنا قاتىسۋشىلارعا رۇقسات بەرۋ, سونداي-اق راديوجيىلىك سپەكترىن پايدالانۋ ءۇشىن الىمداردى الىپ تاستاۋ بار. مولشەرلەمەلەر سانىن 310-نان 276-عا دەيىن ازايتۋ ۇسىنىلىپ وتىر.

مەملەكەتتىك باجدار تۋرالى ايتاتىن بولساق, جاڭا سالىق كودەكسىنىڭ جوباسىندا باجداردىڭ 5 ءتۇرىن الىپ تاستاۋ جانە مولشەرلەمەلەر سانىن 113-تەن 62-گە (-51) دەيىن قىسقارتۋ ۇسىنىلادى.

ونىڭ ىشىندە زياتكەرلىك مەنشىك سالاسىنداعى ءىس-ارەكەتتەرى, نوتارياتتىق ءىس-ارەكەتتەرى, سونداي-اق حالىقارالىق تاسىمالدارعا ارنالعان قۇجاتتار, تەڭىز كۋالىكتەرى جانە جانۋارلار مەن وسىمدىكتەردى تاسىمالداۋعا ارنالعان رۇقساتتار بەرگەنى ءۇشىن باجداردىڭ كۇشىن جويۋ ۇسىنىلۋدا.

سەرىك جۇمانعارين ىسكە اسىرىلىپ جاتقان شارالار سالىق جۇيەسىن نەعۇرلىم اشىق, ءتيىمدى جانە بيزنەس قاجەتتىلىكتەرىنە باعدارلانعان ەتۋگە مۇمكىندىك بەرەتىنىن اتاپ ءوتتى.