قازاقستاندا سۋ قاۋىپسىزدىگى مەن رەسۋرستاردى باسقارۋ ماسەلەسى ستۋدەنتتەر دەباتىندا سىنعا الىندى.
قازاقستان سۋعا باي مەملەكەت بولعانىمەن, ونى ءتيىمدى پايدالانۋ مەن باسقارۋ ماسەلەلەرى ءالى كۇنگە دەيىن شەشىمىن تاپپاي كەلەدى. وسى كۇردەلى تاقىرىپ «حابار» تەلەارناسىنداعى “ازامات” ينتەللەكتۋالدى پىكىرسايىس باعدارلاماسىنىڭ جاڭا شىعارىلىمىندا قىزۋ تالقىلاندى. ستۋدەنتتەردىڭ وتكىر پىكىرلەرى مەن ناقتى ۇسىنىستارى سۋدى باسقارۋدىڭ بۇگىنگى احۋالىنا جاڭا كوزقاراس ۇسىندى.
پىكىرسايىس الاڭىندا جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ جانە تۇران ۋنيۆەرسيتەتىنىڭ كوماندالارى سۋ تاپشىلىعى, ينفراقۇرىلىمنىڭ توزۋى جانە رەسۋرستاردى ءتيىمسىز باسقارۋ ماسەلەلەرىن تەرەڭ تالدادى.
باتىس قازاقستان اگرارلىق-تەحنيكالىق ۋنيۆەرسيتەتىنىڭ ستۋدەنتتەرى ەلدەگى تۇتىنىلاتىن سۋدىڭ 60–70 پايىزى وزەندەردەن الىناتىنىن, ال ولاردىڭ كوپشىلىگى شەكارالاس مەملەكەتتەردەن باستاۋ الاتىنىن اتاپ ءوتتى. ستۋدەنتتەردىڭ ايتۋىنشا, ترانسشەكارالىق تاۋەلدىلىك كليماتتىق وزگەرىستەر جاعدايىندا ەلدىڭ سۋ قاۋىپسىزدىگىنە قاتەر ءتوندىرۋى مۇمكىن. ولار سۋ تاپشىلىعىن ازايتۋ ءۇشىن: جاڭا سۋ قويمالارىن سالۋدى; سۋ سالاسى ءۇشىن كاسىبي ماماندار دايارلاۋدى; ءوندىرىس ورىندارىنا سۋدى قايتا وڭدەۋ جۇيەلەرىن مىندەتتەۋدى; تۇرمىستىق سەكتورعا سەنسورلى سۋ ەسەپتەۋىشتەر ەنگىزۋدى ۇسىندى. سونىمەن قاتار, تۇتىنۋ كولەمىنە قاراي ديففەرەنتسيالدى تاريف جۇيەسىن ەنگىزۋ قاجەتتىگى دە قوزعالدى.
تۇران ۋنيۆەرسيتەتىنىڭ ستۋدەنتتەرى ءوز كەزەگىندە سۋدىڭ 65 پايىزى اۋىل شارۋاشىلىعىندا قولدانىلاتىنىن, بىراق ونىڭ جارتىسىنان كوبى ەسكى سۋارۋ جۇيەلەرىنىڭ كەسىرىنەن ىسىراپ بولاتىنىن مالىمدەدى. ولار تامشىلاتىپ سۋارۋ ءادىسىن جاپپاي ەنگىزۋدى جانە قالدىق سۋلاردى قايتا وڭدەۋ دەڭگەيىن ارتتىرۋدى, بيولوگيالىق, مەحانيكالىق جانە مەمبرانالىق تازارتۋ تەحنولوگيالارىن كەزەڭ-كەزەڭىمەن ىسكە قوسۋدى ۇسىندى. بۇگىنگى كۇنى قازاقستاندا قالدىق سۋدى قايتا وڭدەۋ كورسەتكىشى نەبارى 2,5%, ال دامىعان ەۋروپا ەلدەرىندە بۇل كورسەتكىش 80–90% ارالىعىندا.
قازىلار القاسىنىڭ شەشىمى بويىنشا تۇران ۋنيۆەرسيتەتىنىڭ كومانداسى جەڭىسكە جەتتى. ساراپشىلار ولاردىڭ ماسەلەگە تەرەڭ تالداۋ جاساپ, ناقتى ءارى جۇزەگە اسىرۋعا بولاتىن ۇسىنىستار ۇسىنعانىن ەرەكشە باعالادى. باعدارلاما تورەشىلەرى قاتارىندا قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ, قر پارلامەنتى ءماجىلىسىنىڭ دەپۋتاتى ايداربەك قوجانازاروۆ جانە Qazaq Debate قوزعالىسىنىڭ نەگىزىن قالاۋشى ەربولات مۇحامەدجان بولدى.
«ازامات» جوباسى – ۇلتتىق پىكىرسايىس مادەنيەتىن جاڭاشا فورماتتا دامىتۋدى ماقسات ەتكەن بىرەگەي پلاتفورما. جوبا قر پارلامەنتى ءماجىلىسىنىڭ, مادەنيەت جانە اقپارات مينيسترلىگىنىڭ جانە عىلىم جانە جوعارى ءبىلىم مينيسترلىگىنىڭ رەسمي قولداۋىمەن جۇزەگە اسىرىلۋدا.