مارەگە ون ارۋ شىعىپ, مىنە-مىنە ۇزدىگى انىقتالادى دەگەنشە كورەرمەندەر مەن جانكۇيەرلەر تاعات تاپپاعان. قالا اكىمدىگىنىڭ قولداۋىمەن ءوتىپ جاتقان «وسكەمەن ارۋى-2025» بايقاۋى ەكى اپتاعا سوزىلىپ, 30 ناۋرىز كۇنى قورىتىندىسى شىقتى. ارينە, قازىلار ءۇشىن اقىلىنا كوركى ساي ارۋدى انىقتاۋ وڭايعا سوقپاعان.
بۇل جولعى جارىستىڭ شارتى مەن جۇيەسى ەرەكشە بولدى. جاس شەكتەۋى بولعانىمەن, ارۋلاردىڭ ۇلتىنا, ناسىلىنە البەتتە قاراماعان. ءتىپتى اياۋلى جار, اسىل انالار دا قاتىستى. تەك قانا جاستارى 21-35 جاس ارالىعىندا بولۋى شارت. جەڭىمپازعا 1 ملن تەڭگە اقشالاي سىيلىق پەن شەبەردىڭ قولىنان شىققان ءساندى ساۋكەلە تىگىلدى. ول ءۇشىن سىنعا تۇسكەن سۇلۋلار سان ءتۇرلى كەزەڭنەن ءوتتى. ارتىستىك قابىلەتتەرىن كورسەتتى, ۇلتتىق قۇندىلىقتاردى قانشالىقتى بىلەتىندەرىن بايقاتتى. فوتوعا ءتۇسىپ, كامەرا الدىندا وزدەرىن ۇستاۋدى دا باعالادى. سۇرىنگەندەرى سايىستىڭ شارتىنا سايكەس شىعىپ وتىردى. اۋەلدە 80 ارۋ تىزىمدەلگەنىمەن, اقتىق سايىستا ون ارۋ عانا ورتاعا شىققان. بۇل كۇنى ءبارى بار ونەرلەرىن سالدى. ءان دە ايتىلدى, بي دە بيلەندى. تالانتتارىنا تاڭعالعان قازىلار ۇپايلارىن ارتتىردى. ايتا كەتەرلىگى, سايىستىڭ ءادىل ءوتۋى ءۇشىن ءار كەزەڭ سايىن قازىلار اۋىسىپ وتىرعان. ال ارۋلار ۇلكەن جاۋاپكەرشىلىكپەن, جەڭىسكە دەگەن ۇمتىلىسپەن قاتىسىپ جاتتى.
– قازاقتىڭ ونەرىن, ۇلتتىق قۇندىلىقتارىن, مادەنيەتىن پاش ەتۋدى ماقسات ەتتىك. ارۋلارىمىز ۇلتتىق قۇندىلىقتاردى دارىپتەۋگە تىرىستى. وندىققا ەنگەن قىزداردىڭ توعىزىنا 100 مىڭ تەڭگەنىڭ سەرتيفيكاتى جانە جەڭىمپازعا 1 ملن تەڭگە سىياقى قاراستىرىلعان, – دەدى قالالىق مادەنيەت جانە تىلدەردى دامىتۋ ءبولىمىنىڭ باستىعى الماز نۇرعاليەۆ.
ءسويتىپ, ونەرلەر ورتاعا سالىنىپ, كورەرمەندەر قيقۋ قوسىپ بولعان سوڭ قازىلار اقىلداسۋعا كەتكەن. ءدال وسى ساتتە عوي, ارۋلار دا, ولاردى قولداپ كەلگەن جانكۇيەرلەر دە تاعات تاپپاعان. جۇرگىزۋشىلەر ورتاعا شىعىپ, اتالىمعا يە بولعانداردى ماراپاتتاپ بولعانشا سۇلۋلاردىڭ جان-دۇنيەسى الاي-دۇلەي بولعان شىعار. سەبەبى اركىم وزىنە جەڭىس تىلەدى. قىسقاسى, «وسكەمەن ارۋى-2025» بايقاۋىنىڭ جەڭىمپازى سەكسەن قىزدىڭ اراسىنان سۋىرىلىپ شىققان سۇلۋ زينايدا بەكتەمىروۆا بولدى. حالىق قوشەمەتتەدى, قيقۋ قوستى, قول سوقتى. بىلتىرعى وسكەمەن ارۋى شەبەردىڭ قولىمەن زەرلەنگەن ساۋكەلەنى زينايداعا كيگىزدى.
– كۇتپەگەن جەڭىس بولدى. بىرگە قاتىسقان ارۋلاردىڭ بارلىعىنا ساتتىلىك تىلەيمىن, – دەدى زينايدا بەكتەمىروۆا.
ايتا كەتەيىك, زينايدا اقتوبە وبلىسىنىڭ تۋماسى, شىعىستىڭ كەلىنى. وبلىستىق دراما جانە وپەرەتتا تەاترىندا جۇمىس ىستەيدى.
وسكەمەن