قازاقستان رەسپۋبليكاسى ىشكى ىستەر مينيسترلىگى ۋكراينا ۇلتتىق پوليتسياسىنىڭ قىلمىستىق ىزدەستىرۋ دەپارتامەنتى مەن ەكى ەلدىڭ باس پروكۋراتۋرالارىمەن بىرلەسىپ جۇرگىزگەن اۋقىمدى ارنايى وپەراتسيا ناتيجەسىندە ۋكراينا اۋماعىندا ارەكەت ەتكەن ترانسۇلتتىق ۇيىمداسقان قىلمىستىق توپتىڭ call-ورتالىقتارىنىڭ قىزمەتى توقتاتىلدى, دەپ حابارلايدى Egemen.kz.
ىشكى ىستەر مينيسترلىگىنىڭ مالىمەتىنشە, 31 ناۋرىزدا دنەپر قالاسىندا جۇيەلى تۇردە قازاقستان, ۋكراينا جانە ەۋروپالىق وداق ەلدەرىنىڭ ازاماتتارىنا قاتىستى ينتەرنەت-الاياقتىق جاساعان ءۇش call-ورتالىقتىڭ قىزمەتىنە توسقاۋىل قويىلدى.
قىلمىستىق ۇيىمنىڭ ۇزاق ۋاقىت بويى جالعان ينۆەستيتسيالىق كومپانيالاردىڭ قىزمەتكەرلەرى رەتىندە ارەكەت ەتكەنى انىقتالدى. قاسكويلەر جابىرلەنۋشىلەردى الداپ, ولاردىڭ قۇپيا دەرەكتەرىنە, جەكە كابينەتتەرى مەن بانك شوتتارىنا قول جەتكىزىپ, ناتيجەسىندە اقشالارى مەن تسيفرلىق اكتيۆتەرىن يەمدەنگەن.
سونىمەن قاتار رومانتيكالىق سحەمالار تۇرىندەگى تاسىلدەر ارقىلى, سونداي-اق كريپتوۆاليۋتاعا جالعان ينۆەستيتسيا ۇسىنۋ ارقىلى جاسالعان الاياقتىق فاكتىلەرى انىقتالدى. قىلمىستىق ارەكەتتەردى جۇزەگە اسىرۋ ءۇشىن تانىمال ينۆەستيتسيالىق پلاتفورمالار مەن كريپتوبيرجالاردى يميتاتسيالايتىن فيشينگتىك ينتەرنەت-رەسۋرستار پايدالانىلعان. بۇل ءوز كەزەگىندە الاياقتارعا جابىرلەنۋشىلەردىڭ اكتيۆتەرىن تولىق باقىلاۋعا الۋعا مۇمكىندىك بەرگەن.
«جەدەل-ىزدەستىرۋ ءىس-شارالارى بارىسىندا ترانسۇلتتىق ۇيىمداسقان قىلمىستىق توپتىڭ ۇيىمداستىرۋشىلارى مەن بارلىق بەلسەندى قاتىسۋشى انىقتالدى. دنەپر قالاسىندا ءبىر مەزەتتە 40 مەكەنجاي بويىنشا ءتىنتۋ جۇرگىزىلدى», دەلىنگەن حابارلامادا.
ناتيجەسىندە 53 ۋكراينا ازاماتى ۇستالدى, ولاردىڭ ىشىندە سەگىز نەگىزگى كۇدىكتى ۋاقىتشا ۇستاۋ يزولياتورىنا قامالدى. قالعان قاتىسۋشىلار زاڭناماعا سايكەس جاۋاپكەرشىلىككە تارتىلادى.
14 قىلمىستى جاسىرعان: الماتىدا بۇرىنعى پوليتسەي سوتتالدى
الدىن الا مالىمەتتەر بويىنشا ءتىنتۋ بارىسىندا 100 مىڭ اقش دوللارى, 90 كومپيۋتەرلىك تەحنيكا, 125 سمارتفون, 6 ەليتالىق اۆتوكولىك, سونداي-اق اتىس قارۋىنا ۇقساس زات تاركىلەندى. تەرگەۋ ارەكەتتەرى جالعاسىپ جاتىر.
«قازىرگى ۋاقىتتا ۋكراينالىق ارىپتەستەرمەن تىعىز ءوزارا ءىس-قيمىل بارىسىندا قىلمىستىق ارەكەتتىڭ بارلىق ەپيزودىن انىقتاۋ, قوسىمشا قاتىسۋشىلاردى اشكەرەلەۋ جانە ازاماتتارعا كەلتىرىلگەن جالپى زالال كولەمىن ناقتىلاۋ باعىتىندا تەرگەۋ جانە جەدەل-ىزدەستىرۋ ءىس-شارالارى جۇرگىزىلىپ جاتىر», دەپ حابارلادى مينيسترلىك.
قازاقستان رەسپۋبليكاسى ىشكى ىستەر مينيسترلىگى حالىقارالىق كيبەرقىلمىسقا قارسى كۇرەستى جالعاستىرادى. ازاماتتاردىڭ سەنىمىن پايدالانىپ, پايدا تابۋعا باعىتتالعان كەز كەلگەن زاڭسىز ارەكەت دەر كەزىندە انىقتالىپ, قاتاڭ تۇردە جولى كەسىلەتىن بولادى.
ۇرلىق, بوپسالاۋ, الاياقتىق: قاراعاندى وبلىسىندا قىلمىستىق توپ ۇستالدى