وسكەمەن قالاسىندا ورنالاسقان «قازتسينك» زاۋىتىندا بولعان جارىلىس پەن ءورتتىڭ سالدارىنان زارداپ شەككەندەردىڭ تاعى ءبىرى اۋرۋحانادا كوز جۇمدى. ول 12 مامىرعا قاراعان ءتۇنى قايتىس بولعان, دەپ حابارلايدى Egemen.kz.
كاسىپورىننىڭ ءباسپاسوز قىزمەتى قازا تاپقان قىزمەتكەردىڭ وتباسىنا جانە بارلىق جۇمىسشىلارعا قاجەتتى قولداۋ كورسەتىلەتىنىن مالىمدەدى.
«كومپانيا قازا تاپقان قىزمەتكەردىڭ جاقىندارىنا جانە بارلىق قىزمەتكەرلەرگە قاجەتتى قولداۋ كورسەتىپ وتىر. قازىرگى ۋاقىتتا اپاتتىڭ سالدارىن جويۋ جانە تەرگەۋ جۇمىستارى جالعاسىپ جاتىر. وسكەمەن مەتاللۋرگيالىق كەشەنى تسينك جانە قورعاسىن زاۋىتتارىندا وندىرىستىك قۋاتتى ۋاقىتشا تومەندەتۋ رەجيمىندە جۇمىس ىستەيدى», دەلىنگەن حابارلامادا.
ەسكە سالايىق, 5 مامىر كۇنى زاۋىت اۋماعىندا شاڭ جيناعىش قۇرىلعى جارىلىپ, عيماراتتىڭ ءبىر بولىگى قۇلاپ, ءورت شىققان. وقيعا كەزىندە ەكى ادام قازا تاۋىپ, بەس جۇمىسشى اۋرۋحاناعا جەتكىزىلگەن, ولاردىڭ ءبىرى اۋىر كۇيىك العان.
ۇكىمەت باسشىسى جاعدايدى جەكە باقىلاۋعا الىپ, تجم, ەكولوگيا مينيسترلىگى جانە شىعىس قازاقستان وبلىسى اكىمدىگىنە شۇعىل شارالار قابىلداۋدى تاپسىرعان. پوليتسيا اتالعان فاكتى بويىنشا قىلمىستىق ءىس قوزعادى.
نۇربولات امانبەك