الماتى وبلىسىندا 29 جاستاعى ەر ادام ىستىق سۋ كوزدەرى ورنالاسقان دەمالىس ايماقتارىنىڭ بىرىندە قازا تاپتى. دەپ حابارلايدى Egemen.kz
قايعىلى وقيعا تۋرالى اقپارات الەۋمەتتىك جەلىلەردە تارادى. مارقۇمنىڭ تۋىستارى ونى ارىپتەستەرى تاسپەن ۇرىپ-سوعىپ, تىرىدەي كومىپ كەتكەن بولۋى مۇمكىن دەپ مالىمدەگەن. ونىڭ دەنەسى بىرنەشە كۇندىك ىزدەۋ جۇمىستارىنان كەيىن تابىلدى.
وڭىرلىك پوليتسيا دەپارتامەنتىنىڭ ءباسپاسوز قىزمەتى كۇدىكتىلەردىڭ ءىزىن سۋىتپاي ۇستالعانىن راستادى.
پوليتسيا مالىمەتىنشە, 27 مامىر كۇنى ۇيعىر اۋداندىق پوليتسياسىنا ايەل ادام ۇلىنىڭ جوعالعانى تۋرالى ارىز تۇسىرگەن. ونىڭ ايتۋىنشا, ۇلى جۇمىس ورنىنا كەتكەننەن كەيىن بايلانىسقا شىقپاي قالعان. ىزدەۋ شارالارىنىڭ ناتيجەسىندە مارقۇمنىڭ دەنەسى جۇمىس ورنىنا جاقىن جەردەن تابىلعان.
الدىن الا مالىمەتتەر بويىنشا, سپيرتتىك ىشىمدىك ىشكەننەن كەيىن ەر ادام مەن ونىڭ ارىپتەستەرى اراسىندا جانجال تۋىنداعان.
ەكى كۇدىكتى قاماۋعا الىندى. ال وقيعا كەزىندە سول كومپانيادا بولعان ءۇشىنشى ادامعا قاتىستى پروتسەسسۋالدىق شەشىم تەرگەۋ ناتيجەسىنە قاراي قابىلدانادى.