سىرتقى ىستەر مينيسترلىگىنىڭ رەسمي وكىلى ەرلان جەتىباەۆ 2026 جىلعى فۋتبولدان الەم چەمپيوناتىن تاماشالاۋعا باراتىن وتانداستاردى شەتەلدىڭ كوشى-قون تالاپتارىن ساقتاۋعا شاقىردى, دەپ حابارلايدى Egemen.kz.
سونداي-اق ول جەكە قاۋىپسىزدىك ماسەلەلەرىنە باس ءمان بەرۋ كەرەكتىگىنە توقتالدى.
«11 ماۋسىم مەن 19 شىلدە ارالىعىندا امەريكا قۇراما شتاتتارىندا, كانادادا جانە مەكسيكادا فۋتبولدان الەم چەمپيوناتى وتەدى. بۇل ءىرى سپورتتىق شاراعا كوپتەگەن شەتەلدىك جانكۇيەرلەر, سونىڭ ىشىندە ءبىزدىڭ ازاماتتار دا قاتىسادى. وسىعان بايلانىستى سىرتقى ىستەر مينيسترلىگى چەمپيونات ماتچتارىنا جانە وزگە دە ءىس-شارالارعا باراتىن ازاماتتارعا قاۋىپسىزدىك شارالارىن ساقتاپ, مۇقيات بولۋعا شاقىرادى», دەدى ەرلان جەتىباەۆ.
الەم چەمپيوناتى: فيفا يران قۇراماسىنا قاتىستى شەشىم قابىلدادى
سونداي-اق مينيسترلىك وكىلى ەل ازاماتتارىنا جەكە باسىن كۋالاندىراتىن قۇجاتتاردى ءاردايىم وزىمەن بىرگە الىپ ءجۇرۋ كەرەكتىگىن ايتتى.
«قابىلداۋشى ەلدەردىڭ كوشى-قون زاڭناماسىن, ۆيزا تالاپتارىن ساقتاۋ ماڭىزدى. توتەنشە جاعداي تۋىنداعان جاعدايدا دەرەۋ جەرگىلىكتى جەدەل قىزمەتكە حابارلاسىپ, قازاقستاننىڭ ديپلوماتيالىق جانە كونسۋلدىق مەكەمەلەرىمەن بايلانىستا بولۋ قاجەت», دەدى ول.
ەسكە سالايىق, 2026 جىلعى فۋتبولدان الەم چەمپيوناتى كانادا, مەكسيكا جانە اقش ەلدەرىندە 11 ماۋسىم مەن 19 شىلدە ارالىعىندا وتەدى. بۇل تۋرنيرگە العاش رەت 48 ۇلتتىق قۇراما قاتىسادى.