سوڭعى جىلدارى الەۋمەتتىك جەلىلەردە قازاقستان مەن وزبەكستاننىڭ سالىق جۇيەسىن سالىستىرىپ, كورشى ەلدەگى كاسىپ جۇرگىزۋ شارتتارى الدەقايدا ءتيىمدى دەگەن پىكىرلەر ءجيى ايتىلادى. الايدا سوڭعى وزگەرىستەردى سارالاۋ ەكى ەل اراسىنداعى ايىرماشىلىق ءالى دە ەلەۋلى ەكەنىن كورسەتەدى, دەپ حابارلايدى Egemen.kz.
QZ Economy تالداۋ تەلگرام ارناسىنىڭ مالىمەتىنشە, وزبەكستان پرەزيدەنتى 26 مامىردا «شاعىن بيزنەس سۋبەكتىلەرىنىڭ وسۋىنە قولايلى ەكونوميكالىق جانە اكىمشىلىك جاعدايلاردى ودان ءارى جاقسارتۋ تۋرالى» جارلىققا قول قويدى. قۇجاتتا كاسىپكەرلىكتى قولداۋعا باعىتتالعان بىرقاتار سالىقتىق جاڭاشىلدىق قاراستىرىلعان.
ەڭ ماڭىزدى وزگەرىستەردىڭ ءبىرى – شاعىن بيزنەستىڭ جەڭىلدەتىلگەن سالىق رەجيمىنەن جالپىعا بىردەي سالىق سالۋ تارتىبىنە ءوتۋ شەگىنىڭ ۇلعايۋى. بۇعان دەيىن بۇل كورسەتكىش 1 ملرد سۋم بولسا, ەندى 5 ملرد سۋمعا دەيىن, ياعني شامامەن 200 ملن تەڭگەگە جۋىق دەڭگەيگە كوتەرىلدى.
بۇل كورسەتكىش بەس ەسە ارتقانىمەن, قازاقستانداعى مۇمكىندىكپەن سالىستىرعاندا ايتارلىقتاي تومەن. بيىلعى 1 قاڭتاردان باستاپ جاڭارتىلعان جەڭىلدەتىلگەن دەكلاراتسيا رەجيمىندە تابىس شەگى 600 مىڭ ايلىق ەسەپتىك كورسەتكىشكە, ياعني شامامەن 2,6 ملرد تەڭگەگە دەيىن جەتەدى. بۇعان قوسا كاسىپكەرلەر قوسىلعان قۇن سالىعى مەن الەۋمەتتىك سالىقتان بوساتىلادى.
وزبەكستاندا تاعى ءبىر جاڭالىق – قوعامدىق تاماقتانۋ, ساۋدا جانە قىزمەت كورسەتۋ سالاسىنداعى كاسىپكەرلەر ءۇشىن قوسىلعان قۇن سالىعىن تولەۋدىڭ جەڭىلدەتىلگەن ءتارتىبىن ەنگىزۋ. 1 ماۋسىمنان باستاپ ولار بۇل رەجيمدى ەرىكتى تۇردە پايدالانا الادى.
جاڭا ءتارتىپ بويىنشا ققس مولشەرلەمەسى اينالىمنىڭ 6%-ىن قۇرايدى. ال پايدا سالىعى بويىنشا 0% مولشەرلەمە بەلگىلەنىپ, ەسەپتىلىك تاپسىرۋ مىندەتى جويىلادى. دەگەنمەن كاسىپكەرلەردىڭ كىرىس ققس-ىن ەسەپكە الۋىنا, جەڭىلدىكتەر مەن قايتارىم الۋعا مۇمكىندىك بەرىلمەيدى.
وزبەكستان شەتەلدىكتەر ءۇشىن ارنايى سالىق رەجيمىن ەنگىزەدى
قازاقستاندا بۇل باعىتتا باسقا ءتاسىل قولدانىلادى. جەڭىلدەتىلگەن دەكلاراتسيا نەگىزىندەگى ارناۋلى سالىق رەجيمىندە كاسىپكەرلەر تابىس سالىعىن تولەيدى. ونىڭ بازالىق مولشەرلەمەسى 4%, ال جەرگىلىكتى ءماسليحاتتاردىڭ شەشىمىمەن 2%-دان 6%-عا دەيىن وزگەرۋى مۇمكىن. بۇل رەجيمدە ققس مۇلدە قاراستىرىلماعان.
ساراپشىلاردىڭ پىكىرىنشە, وزبەكستان تومەندەتىلگەن مولشەرلەمەلەر ارقىلى بيزنەستى بولشەكتەۋگە توسقاۋىل قويىپ, كاسىپكەرلەردى ققس جۇيەسىنە ەرىكتى تۇردە تارتۋعا ۇمتىلىپ وتىر. ال قازاقستان بۇل كەزەڭنەن ءوتىپ, سالىقتىق باقىلاۋدى تولىق تسيفرلاندىرۋعا كوشكەن.
ماسەلەن, ەلىمىزدە ققس اكىمشىلەندىرۋ ەلەكتروندى شوت-فاكتۋرالار مەن باقىلاۋ-كاسسا ماشينالارى ارقىلى جۇزەگە اسادى. سونىمەن قاتار جەڭىلدەتىلگەن رەجيمدى قولداناتىن كاسىپورىندارمەن ءوزارا ەسەپ ايىرىسۋ كەزىندە شەگەرىمدەرگە قويىلاتىن شەكتەۋلەر دە بار.
ققس اكىمشىلەندىرۋ ماسەلەسىندە دە ەكى ەلدىڭ ۇستانىمى ءارتۇرلى. وزبەكستان سالىقتى قايتارۋ راسىمدەرىن اۆتوماتتاندىرۋعا كىرىسىپ جاتىر. كەلەسى جىلدان باستاپ تاۋەكەلى تومەن كاسىپكەرلەرگە ققس اۆتوماتتى تۇردە قايتارىلماق. الايدا قايتارىلاتىن سوما 10 ملن سۋمنان نەمەسە شامامەن 425 مىڭ تەڭگەدەن اسپايدى.
سونداي-اق بيىلعى قازان ايىنا دەيىن ەلەكتروندى شوت-فاكتۋرالار مەن سالىق ەسەپتىلىگىنە نەگىزدەلگەن ناقتى ۋاقىت رەجيمىندەگى اۆتوماتتى قايتارۋ جۇيەسىن ەنگىزۋ جوسپارلانعان.
ال قازاقستاندا ققس تولەۋشى كۋالىگى بيىلدان باستاپ تولىق جويىلىپ, ەسەپ جۇرگىزۋ ەلەكتروندى ءتىزىلىم ارقىلى جۇزەگە اسىرىلادى. بۇل سالىقتىق راسىمدەردى وڭايلاتىپ, اكىمشىلىك كەدەرگىلەردى ازايتۋعا مۇمكىندىك بەردى.
جالپى ساراپشىلاردىڭ باعالاۋىنشا, وزبەكستان سالىق جۇيەسىن جاڭعىرتۋ باعىتىندا بەلسەندى قادام جاساپ جاتقانىمەن, شاعىن جانە ورتا بيزنەستى قولداۋ تەتىكتەرى, تسيفرلىق اكىمشىلەندىرۋ دەڭگەيى مەن جەڭىلدىكتەر كولەمى جاعىنان قازاقستان ازىرگە باسىمدىقتى ساقتاپ وتىر.
بۇعان دەيىن استانادا مەملەكەت باسشىسى قاسىم-جومارت توقاەۆتىڭ جانە وزبەكستان پرەزيدەنتى شاۆكات ميرزيوەۆتىڭ قاتىسۋىمەن ساۋدا-ەكونوميكالىق ىنتىماقتاستىق جونىندەگى جول كارتاسىنا قول قويۋ ءراسىمى وتكەنىن حابارلاعانبىز.