ەلىمىزدىڭ ءار وڭىرىنەن كەلگەن 100 ۇزدىك وقۋشى اقوردادا قوناق بولدى. حالىقارالىق بالالاردى قورعاۋ كۇنىنە وراي كىشكەنتاي مەيماندارعا عيمارات قۇرىلىسىنىڭ تاريحى مەن ساۋلەتتىك ەرەكشەلىكتەرى تۋرالى سىر شەرتەتىن قىزىقتى ەكسكۋرسيا ۇيىمداستىرىلدى, دەپ حابارلايدى Egemen.kz.
ادەتتە قابىلداۋلار مەن رەسمي جيىندار وتەتىن پرەزيدەنت رەزيدەنتسياسى بۇل جولى بالالارعا ەسىگىن ايقارا اشتى. رەسپۋبليكانىڭ تۇكپىر-تۇكپىرىنەن اقوردانى ارالاۋعا مۇمكىندىك العان ورەندەر اراسىندا ءپان وليمپيادالارىنىڭ جەڭىمپازدارى مەن جۇلدەگەرلەرى, وقۋ وزاتتارى, شىعارماشىلىق بايقاۋلاردىڭ لاۋرەاتتارى, سپورت سايىستارىنىڭ سايىپقىراندارى بار.
قورجىنى جەتىستىككە تولى جەتكىنشەكتەردىڭ ءبىرى ءزاۋلىم عيماراتتىڭ ساۋلەتىنە تامسانا كوز تاستاسا, ەندى ءبىرى ءىشىن ارالاۋعا اسىقتى. توپتان ىلگەرى ءجۇرىپ, عيماراتتىڭ ايبىنىنا تاڭدانىسپەن قاراعان ەرسۇلتان تولەۋعازى ۇلى بۇل ءساتتىڭ ءوزى ءۇشىن ۇلكەن مارتەبە ەكەنىن ايتتى.
«پرەزيدەنت سارايىن جاقىننان كورۋ مۇلدە بولەك سەزىم. اجەپتاۋىر ۇلكەن ەكەن. بۇل جەرگە كەلۋ مەن ءۇشىن مارتەبە. بولاشاقتا وسىندا قىزمەت ەتكىم كەلەدى», دەپ بالا كوڭىل اعىنان جارىلدى.
ءبىر-ءبىرىنىڭ ءىزىن باسىپ, توپتاسقان بالالار الدىمەن رەزيدەنتسيا اۋماعىنداعى باقتا سەرۋەندەدى. مۇنداعى جانعا سايا جاسىل-جەلەكتىڭ الۋان تۇرىنەن بولەك, اسىل تۇقىمدى قازاق تازىلارى مەن كىتاپ وقىپ وتىرعان بالا ءمۇسىنى وقۋشىلاردىڭ نازارىن اۋداردى. ۇلتتىق قۇندىلىعىمىز بەن بىلىمگە قۇشتارلىقتى ۇندەستىرگەن بەينەلەردى ەكسكۋرسوۆود مارجان مىرزابەكوۆا ەگجەي-تەگجەي ءتۇسىندىردى.
«بۇل باق – وزىندىك تەرەڭ ماعىناسى بار مادەني كەڭىستىك. مۇنداعى كىتاپ وقىپ وتىرعان بالا ءمۇسىنى – وسكەلەڭ ۇرپاقتىڭ بىلىمگە, عىلىمعا دەگەن قۇشتارلىعىن سيپاتتايدى. ال قازاق تازىلارى – ءبىزدىڭ زامانعا دەيىن جەتكەن ۇلتتىق رامىزدەرىمىز, جەتى قازىنانىڭ ءبىرى. مەملەكەت باسشىسىنىڭ رەزيدەنتسياسىندا بۇل قۇندىلىقتاردىڭ ۇلىقتالۋى – ەلدىكتىڭ, تاريحقا دەگەن قۇرمەتتىڭ جانە جارقىن بولاشاققا دەگەن سەنىمنىڭ بەلگىسى. سىزدەر سياقتى زەرەك تە دارىندى بالالاردىڭ وسى قۇندىلىقتاردى سەزىنىپ وسكەنى ماڭىزدى», دەيدى ءپىب پرەزيدەنتتىك ورتالىعىنىڭ اعا ساراپشىسى مارجان مىرزابەكوۆا.
ءارى قاراي جەتكىنشەكتەر اقورداعا قادام باستى. ساراي ىشىندەگى بيىك مۇنارالار مەن ۇلتتىق ناقىشتاعى بەزەندىرۋلەر, جارقىراعان شامدار, كوز تارتار كارتينالار وقۋشىلاردى تاعى ءبىر تامساندىردى. ءمارمار زالىنا كىرگەن ساتتە مەكتەپ وقۋشىلارى بىرنەشە مينۋتقا رەسمي دەلەگاتسيا مۇشەلەرىنە اينالا كەتتى. ولار مەملەكەتتىك ەلتاڭبا بەينەلەنگەن قوس پاپكانى قولدارىنا الىپ, بەينە ءبىر كەلىسسوزدەر ءساتتى اياقتالىپ, اسا ماڭىزدى قۇجاتقا قول قويىلعانداي كەيىپ تانىتتى. بارىنشا بايسالدى وتىراتىن بۇل ورىندا بالالار باس قوسقان كورىنىس رەزيدەنتسيا زالىنا ەرەكشە ءبىر جىلىلىق بەرگەندەي بولدى.
كيىز ءۇي تۇرىنە ورايلاستىرىلعان شىعىس زالىنىڭ شىرايىنان شابىتتانعان جاس دارىن سۇلتان قاراعۇل قازانعاپتىڭ «قۇس قايتارۋ» كۇيىن ناقىشىنا كەلتىرە ورىندادى. قاسيەتتى قارا دومبىرانىڭ ۇنىنە ۇيىعان قاتارلاستارى جاس تالانتقا ريزاشىلىقپەن قول شاپالاقتادى.
««ەر ەدىگە» جىر مەكتەبىنىڭ شاكىرتىمىن. ناۋرىز ايىنىڭ ورتاسىندا الەمدى تاڭداي قاقتىرعان بىرەگەي رەكورد ورناتتىق. مەكتەپتىڭ ونەرلى بالالارىمەن بىرگە 24 ساعات بويى توقتاۋسىز پايعامبارلار قيسساسىن جانە «قىرىمنىڭ قىرىق باتىرى» ەپوپەياسىن جىرلادىق. بۇل تاريحي مارافوندا 36 بالا كەزەك-كەزەك الماسىپ, قيسسا ورىندادىق. وسى قاجىرلى ەڭبەكتىڭ ناتيجەسىندە «ەر ەدىگە» جىر مەكتەبى ازيا مەن افريكا ەلدەرىنىڭ الەمدىك رەكوردتار كىتابىنا ەندى», دەيدى تالانتتى جاس.
بايقاساق, بالالار قۇرمەت قاراۋىلى پوستىنىڭ جانىنا كەلگەندە ۇزاق بوگەلىپتى. ولاردى «ادام قالاي تاپجىلماي, ۇزاق ۋاقىت بويى كىرپىك قاقپاستان تىك تۇرا الادى؟» دەگەن وي مازالاعانى انىق. مۇنى اڭعارعان ەكسكۋرسوۆود مارجان مىرزابەكوۆا جىلى جىميىپ, ساربازداردىڭ بۇل شەبەرلىگى جىلدار بويعى قاجىرلى دايىندىق پەن تەمىردەي ءتارتىپتىڭ ناتيجەسى ەكەنىن ايتىپ بەردى.
وداڭ سوڭ, بالالار پرەزيدەنتتىڭ جوعارى دەڭگەيدەگى كەڭەستەر, مينيسترلەر مەن ۆەدومستۆو باسشىلارى, ەلدىڭ شىعارماشىلىق وكىلدەرىمەن باس قوساتىن كۇمبەزدى زالىنا بەتتەدى. ءزاۋلىم كۇمبەزدىڭ استىندا تۇرىپ, مەملەكەتتىك ماڭىزى بار وقيعالاردىڭ اۋقىمىن سەزىنگەن ورەندەردىڭ تاڭدانىسىندا شەك بولمادى.
بۇدان سوڭ, وقۋشىلار مەملەكەت باسشىسىنىڭ كىتاپحاناسىمەن تانىستى. توبەگە دەيىنگى بيىك سورەلەر, ونداعى كىتاپتار, ورتاداعى ۇلكەن دوڭگەلەك ۇستەل جىلى اتموسفەرا سىيلادى. وسى ورايدا اقتوبە وبلىسىنان كەلگەن كاۋسار نۇرلانقىزىن اڭگىمەگە تارتتىق.
«استاناعا باراسىڭ دەگەندە, قۋانىشىم قوينىما سىيمادى. اقوردا ادەمى ءارى ءزاۋلىم ەكەن. ماعان مۇنداعىنىڭ ءبارى, ماڭىزدى كەزدەسۋلەر مەن حالىقارالىق جيىندار وتەتىن زالداردىڭ ساۋلەتى, ۇلتتىق ناقىشتاعى بەزەندىرىلۋلەرى قاتتى ۇنادى. اسىرەسە وسى كىتاپحانا ءىشى جايلى ەكەن. سارايدىڭ ءىشى-سىرتىندا دا باقتار بار. مەن وتانىمدى وتە جاقسى كورەمىن جانە ارقاشان تۋعان ەلىممەن ماقتانامىن. وتاندى ءسۇيۋ – ول ادامدارعا كومەكتەسۋ جانە جەرىڭە قامقور بولۋ. سوندىقتان بولاشاقتا دارىگەر بولۋدى ارماندايمىن», دەيدى كاۋسار.
كەيىن بالالارعا مەرەكەلىك داستارقان جايىلدى. ولار كورگەن زالدارىنىڭ اسەمدىگىن تالقىلاپ, ەرەكشە ساتتەرىمەن ءبولىستى. اراسىندا باتىس قازاقستان وبلىستىق «ماحامبەت وقۋلارى», «جىر جازامىن جۇرەگىمنەن», «ۇلت رۋحىنىڭ شامشىراعى – احمەت», ء«ابىش وقۋلارى» جۇلدەگەرى, ءا.مولداعۇلوۆا اتىنداعى مەكتەپ-ليتسەيىنىڭ وقۋشىسى قايسار امانگەلدى ءوز شىعارماشىلىعىنان ەلگە ارناۋىن وقىپ بەردى.
«قازاقستان – وتانىم ىستىق ماعان!
استانام جاس بالاداي جالىنداعان.
بابامنان قالعان مىناۋ بايتاق دالا.
امانات بوپ قالعانداي مىنا ماعان.
ءبىز ەلدىڭ بولاشاعى تىرەگىمىز,
«قازاقستان» دەپ سوعار جۇرەگىمىز.
تاۋەلسىزدىكتى اڭساپ كەتكەن بابالارىم,
بولاشاققا اماناتتى جەتكىزۋ تىلەگىمىز.
قۋانامىز, كۇلەمىز, شاتتانامىز,
بەسىگىندە الديلەپ باقتانامىز,
ءبىز جاستار ەرتەڭگى ەلدىڭ بولاشاعى
قازاقستان سەنىمەن ماقتانامىز!»
وسىلايشا جەتكىنشەكتەر قازاقستان تاريحى تۋرالى جان-جاقتى مالىمەت الىپ, تاۋەلسىزدىك قۇندىلىقتارىنىڭ ماڭىزىنا بويلادى. ەكسكۋرسيا سوڭىندا بالالارعا پرەزيدەنت اتىنان ەستەلىك سىيلىقتار تابىستالدى.