جىل باسىنان بەرى اقىلى جولداردا مەملەكەتتىك ءنومىردى جاسىرۋ مەن جالعان ءنومىر قولدانۋدىڭ 2 مىڭعا جۋىق دەرەگى انىقتالدى, دەپ حابارلايدى Egemen.kz
«قازاۆتوجول» ۇلتتىق كومپانياسى رەسپۋبليكالىق ماڭىزى بار اۆتوجولداردىڭ اقىلى ۋچاسكەلەرىندە مەملەكەتتىك تىركەۋ نومىرلەرىن ادەيى جاسىرعان نەمەسە جالعان مەملەكەتتىك ءنومىر بەلگىلەرىن پايدالاناتىن كولىك قۇرالدارىنا باقىلاۋدى كۇشەيتتى.
مۇنداي زاڭبۇزۋشىلىقتار كوبىنەسە جول اقىسىن تولەۋدەن جالتارۋ جانە اۆتوماتتى باقىلاۋ جۇيەلەرىن اينالىپ ءوتۋ ماقساتىندا جاسالادى. الايدا مۇنداي ارەكەتتەر قولدانىستاعى زاڭ تالاپتارىنا قايشى ءارى جول-كولىك وقيعالارى, جول قوزعالىسى ەرەجەلەرىن بۇزۋ نەمەسە وزگە دە توتەنشە جاعدايلار كەزىندە كولىك قۇرالىن سايكەستەندىرۋدى قيىنداتادى.
ەكىباستۇزدا كارتونعا ماركەرمەن مەملەكەتتىك ءنومىر جازىپ العان جۇرگىزۋشى ۇستالدى
2026 جىلدىڭ باسىنان بەرى رەسپۋبليكالىق ماڭىزى بار اۆتوجولداردىڭ اقىلى ۋچاسكەلەرىندە مەملەكەتتىك تىركەۋ نومىرلەرىن جاسىرۋدىڭ, وزگەرتىپ پايدالانۋدىڭ نەمەسە جالعان نومىرلەردى قولدانۋدىڭ 1 942 دەرەگى انىقتالدى.
ۇلتتىق كومپانيا ماماندارى اقىلى جول ۋچاسكەلەرىندە تۇراقتى مونيتورينگ جۇرگىزۋدە. وسىنداي قۇقىق بۇزۋشىلىقتار انىقتالعان جاعدايدا بارلىق ماتەريالدار جەدەل تۇردە ىشكى ىستەر ورگاندارىنا, ونىڭ ىشىندە پاترۋلدىك پوليتسيا بولىمشەلەرىنە قازاقستان زاڭناماسىنا سايكەس شارا قابىلداۋ ءۇشىن جولدانادى.
ۇلتتىق كومپانيا مەملەكەتتىك تىركەۋ نومىرلەرى ءاردايىم تازا, انىق كورىنەتىن, بەلگىلەنگەن تالاپتارعا سايكەس بولۋى جانە ارنايى كوزدەلگەن ورىنعا ورناتىلۋى ءتيىس ەكەنىن ەسكە سالادى. وقىلمايتىن, ستاندارتقا سايكەس كەلمەيتىن نەمەسە دۇرىس ورناتىلماعان مەملەكەتتىك نومىرلەر ءۇشىن اكىمشىلىك جاۋاپكەرشىلىك قاراستىرىلعان.
1 شىلدەدەن باستاپ ەلەكتروساموكاتتارعا مەملەكەتتىك ءنومىر بەرىلەدى
ال جالعان نەمەسە قولدان جاسالعان نومىرلەردى پايدالانۋ, سونداي-اق ولاردى جاسىرۋعا ارنالعان قۇرىلعىلاردى قولدانۋ زاڭناماعا سايكەس اناعۇرلىم قاتاڭ جاۋاپكەرشىلىككە, ءتىپتى كولىك قۇرالىن باسقارۋ قۇقىعىنان ايىرۋعا دەيىن اكەلۋى مۇمكىن.
«قازاۆتوجول» ۇلتتىق كومپانياسى جۇرگىزۋشىلەردى زاڭ تالاپتارىن قاتاڭ ساقتاۋعا, مەملەكەتتىك تىركەۋ نومىرلەرىن جاسىرماۋعا جانە اقىلى اۆتوموبيل جولدارى ءۇشىن تولەمدى ۋاقىتىلى تولەۋگە شاقىرادى.
جولداعى ءتارتىپ, جاۋاپكەرشىلىك پەن اشىقتىق – بارلىق جول قوزعالىسىنا قاتىسۋشىلاردىڭ قاۋىپسىزدىگىن قامتاماسىز ەتەتىن باستى قاعيداتتاردىڭ ءبىرى.