قازاقستاندا شامامەن 26 مىڭ كيىك قىرىلىپ قالعان. ونىڭ 11 مىڭى باتىس قازاقستان وبلىسىنا تيەسىلى. بۇل تۋرالى ەكولوگيا مينيسترلىگى حابارلادى, دەپ جازادى Egemen.kz.
ەكولوگيا جانە تابيعي رەسۋرستار ۆيتسە-ءمينيسترى نۇركەن شاربيەۆ بۇل جاعداي تابيعي نورما شەگىنەن اسپايتىنىن ايتتى.
ونىڭ مالىمەتىنشە, كيىكتەردىڭ جىل سايىنعى تابيعي ءولىم-ءجىتىمى پوپۋلياتسيانىڭ 15-20%-ىنا دەيىن جەتۋى مۇمكىن. قازىرگى كورسەتكىش وسى نورمادان اسپايدى.
«قازىر بارلىق ءوڭىر بويىنشا 26 مىڭ, سونىڭ ىشىندە باتىس قازاقستاندا 11 مىڭ كيىك قىرىلعان. ول جاقتا پوپۋلياتسيا تىعىز ورنالاسقان», دەدى ول.
اتىراۋ وبلىسىنىڭ ءۇش تۇرعىنى اقتوبەدە كيىك ۇشاسىمەن ۇستالدى
مينيسترلىك دەرەگىنە سايكەس, كيىكتەردىڭ ورتاشا ءومىر ءسۇرۋ ۇزاقتىعى 5 جىلعا دەيىن, ال پوپۋلياتسيا 3-4 جىل ىشىندە جاڭارىپ وتىرادى.
تولدەۋگە دەيىن قازاقستاندا كيىك سانى شامامەن 3,9 ملن باس دەپ باعالانعان. جاڭا ەسەپ ماۋسىم ايىندا اياقتالادى. مينيسترلىك بۇدان كەيىن پوپۋلياتسيا 5 ملن-نان اسۋى مۇمكىن ەكەنىن بولجاپ وتىر.
بۇقتىرىلعان كيىك ەتى ساۋداعا شىقتى
سونداي-اق, ۆيتسە-مينيستر كيىك سانىن رەتتەۋ ماسەلەسىن قاراستىرىلىپ جاتقانىن اتاپ ءوتتى. ءتيىستى شەشىم بيولوگيالىق نەگىزدەمە مەن ۆەتەرينارلىق قورىتىندىلاردان كەيىن قابىلدانادى.
نۇربولات امانبەك