بۇرىنعى جوگوركۋ كەنەش دەپۋتاتى شايىربەك تاشيەۆ ۇستالدى. ول «قىرعىزمۇنايگاز» اق-داعى جەمقورلىق فاكتىسى بويىنشا قوزعالعان قىلمىستىق ءىس اياسىندا قولعا ءتۇستى. بۇل تۋرالى قىرعىزستاننىڭ ىشكى ىستەر مينيسترلىگى مالىمدەدى, دەپ حابارلايدى Egemen.kz.
ىشكى ىستەر مينيسترلىگى جۇرگىزگەن تەرگەۋ بارىسىندا بۇرىن جوگوركۋ كەنەش دەپۋتاتى بولعان, قامشىبەك تاشيەۆتىڭ تۋعان ءىنىسى شايىربەك تاشيەۆ ۇستالدى. قازىرگى ۋاقىتتا ول بىشكەك قالالىق ىشكى ىستەر باسقارماسىنىڭ ۋاقىتشا ۇستاۋ يزولياتورىنا قامالدى.
قامشىبەك تاشيەۆ ەكى بىردەي ءىس بويىنشا كۋاگەر رەتىندە جاۋاپ بەرىپ جاتىر
قىلمىستىق ىسكە نەگىز بولعان جاعداي – سالىق قىزمەتى جۇرگىزگەن تەكسەرىس ناتيجەسىندە انىقتالعان ءىرى كولەمدەگى قارجىلىق جىمقىرۋ فاكتىلەرى. اتالعان دەرەكتەرگە سايكەس, مەملەكەتتىك كومپانيا كولەڭكەلى دەلدالدىق سحەمالاردى پايدالانۋ جانە شيكىزاتتى كۇماندى ەسەپتەن شىعارۋ سالدارىنان 4 ميلليارد سومنان استام شىعىنعا ۇشىرادى. بۇل شىعىندار دەلدالدىق «سۇر» سحەمالاردى ەنگىزۋ جانە شيكىزاتتى كۇماندى تۇردە ەسەپتەن شىعارۋ ارقىلى ورىن العان. تەرگەۋ بارىسىندا جۇرگىزىلگەن قارجىلىق تالداۋ ناتيجەسىندە پايدا تابۋدىڭ ءۇش ارناسى انىقتالىپ, ولار بۇرىنعى باسشىلىققا جاقىن ادامدارمەن بايلانىستى بولۋى مۇمكىن ەكەنى ايتىلعان.
قىرعىزستان پرەزيدەنتى قامشىبەك تاشيەۆتى قىزمەتىنەن بوساتتى
بۇعان دەيىن بىشكەك قالاسىنىڭ پەرۆوماي اۋداندىق سوتى «قىرعىزمۇنايگاز» ءىسى بويىنشا ءتورت فيگۋرانتتى 2026 جىلدىڭ 16 مامىرىنا دەيىن قاماۋعا العان بولاتىن. سونداي-اق وسى ءىس اياسىندا بۇرىن ۇلتتىق بانك باسشىسى بولعان مەليس تۋرگۋنباەۆ تا ۇستالعان, الايدا كەيىن سوت ونىڭ بۇلتارتپاۋ شاراسىن ءۇي قاماعىنا اۋىستىرعان.