كەيىنگى جىلدارى ەلىمىزدە ۇلتتىق تاعامنىڭ نارىققا جاڭاشا فورماتتا ەنۋ ءۇردىسى ايقىن بايقالادى. بۇل باعىتتا جاس كاسىپكەرلەردىڭ تىڭ ىزدەنىستەرى مەن زاماناۋي تەحنولوگيانى تاعامتانۋ مادەنيەتىمەن ۇشتاستىرۋ تالپىنىسى نازار اۋدارارلىق. سونىڭ ءبىرى – استانا قالاسىنىڭ تۇرعىنى, جاس كاسىپكەر اقمارال سامەت.
2024 جىلى اقمارال ء«بىر اۋىل – ءبىر ءونىم» باعدارلاماسى اياسىندا وتكىزىلگەن گرانتتىق بايقاۋدا جەڭىمپاز اتانىپ, بەس ميلليون تەڭگەلىك مەملەكەتتىك قولداۋعا يە بولدى. جوبا اۋىلدىق وڭىرلەردىڭ الەۋەتىن ارتتىرىپ, وڭدەۋشى شاعىن بيزنەسكە سەرپىن بەرۋدى كوزدەيدى. وسى باستامانىڭ ناتيجەسىندە جاس كاسىپكەر ۇلتتىق تاعامدى نارىققا بەيىمدەپ, زاماناۋي تالاپتارعا ساي ۇسىنۋ ىسىنە دەن قويدى.
اقمارالدىڭ نەگىزگى ءونىمى – قازاقتىڭ ءداستۇرلى جەنتى. ول ەجەلگى اس ءتۇرىن قازىرگى تۇتىنۋشى تالعامىنا سايكەستەندىرىپ, شوكولادپەن ۇيلەستىرە وتىرىپ دايىندايدى. بۇدان بولەك, كاسىپكەر سوك پەن تالقاندى ءتۇرلى قاپتامادا شىعارىپ, كورپوراتيۆتىك تاپسىرىستاردى ورىندايدى جانە ۇلتتىق مەيرامحانالارعا تۇراقتى جەتكىزۋدى جولعا قويعان. سونداي-اق قۇرمانى شوكولادقا مالىپ ازىرلەۋ سەكىلدى شەتەلدىك تۇتىنۋشىعا دا تۇسىنىكتى فورماتتاعى ونىمدەر ۇسىنىپ ءجۇر. بۇل – ۇلتتىق اس ءمازىرىن جاڭا بۋىنعا ەستەتيكالىق ءارى گاسترونوميالىق دەڭگەيدە تانىتۋدىڭ ءبىر ءتاسىلى.
قازىر كاسىپكەردىڭ وندىرىستىك تسەحى استانانىڭ ەسىل اۋدانىندا ورنالاسقان. ال ارنايى دۇكەنى جوندەۋ اياقتالعاننان كەيىن جۇمىسىن باستاماقشى. بۇل دا قالالىق تۇتىنۋشىلارعا جاقىنداۋدىڭ ءبىر قادامى ەكەنى انىق.
اقمارالدىڭ كاسىپكەرلىككە كەلۋ جولى دا قىزىقتى. ول – زاڭ مەن ەكونوميكا سالالارى بويىنشا ەكى جوعارى ءبىلىمى بار مامان. الايدا ۋاقىت وتە كەلە تاعامتانۋ باعىتىندا تاجىريبە جيناپ, شاعىن كوفەحانا اشقان. بۇعان قوسا فليپينگپەن اينالىسىپ, جەكە كاسىپتى جولعا قويعان. كاسىپكەردىڭ ايتۋىنشا, ۇلتتىق تاعامدى جاڭعىرتۋ – وتاندىق برەند قالىپتاستىرۋدىڭ ءبىر قۇرالى.
«جەنت, تالقان, سوك سياقتى تاعامداردىڭ قۇرامى وتە قاراپايىم ءارى تابيعي. وندا جاساندى قوسپالار بولمايدى. بۇرشاق تۇقىمداس پەن ءدان ونىمدەرى اعزاداعى ەنەرگيا الماس-ۋىن جاقسارتىپ, بال, ماي, ىرىمشىك سەكىلدى ونىمدەر يممۋندىق جۇيەنى قولدايدى. مۇنداي تاعامداردى جاڭا فورماتتا ۇسىنۋ – دەنساۋلىققا پايدالى ءداستۇردى ساقتاپ قالۋدىڭ ءبىر جولى», دەيدى اقمارالدىڭ تۇراقتى تۇتىنۋشىسى ءارى وسى سالانى كوپتەن بەرى زەرتتەپ-زەردەلەپ جۇرگەن «حابار» تەلەارناسىنىڭ پروديۋسەرى مەرۋەرت ابداليەۆا.
ونىڭ ايتۋىنشا, الەمدە ەتنوگرافيالىق گاسترونوميا باعىتى دامىپ كەلەدى, ال قازاق تاعامدارى بۇل ترەندكە تولىق سايكەس كەلەدى.
وتاندىق كاسىپتى قولداۋ ماسەلەسىنە توقتالعان ەكونوميست سەيىتقۇل جۇمانوۆ ۇلتتىق ءونىم وندىرۋشىلەردىڭ الەۋەتى ءالى تولىق اشىلماعانىن ايتادى. «ۇلتتىق تاعام وندىرۋشىلەرىنە نارىق كەڭەيىپ كەلەدى. بىراق ولارعا قاپتاما, سەرتيفيكاتتاۋ, لوگيستيكا, ماركەتينگ سياقتى باعىتتاردا قوسىمشا قولداۋ قاجەت. قولدانىستاعى گرانتتىق باعدارلامالار ناتيجەلى. دەگەنمەن ءوندىرىس كولەمىن ارتتىرۋ ماقساتىندا وڭدەۋ سالاسىنا ارنالعان ارنايى قۇرال-جابدىقتى سۋبسيديالاۋ, ەكسپورتقا شىعارۋ تەتىكتەرىن جەڭىلدەتۋ ماڭىزدى», دەيدى ول.
ۇلتتىق تاعام – دامدىك ەرەكشەلىگىمەن عانا ەمەس, مادەنيەت پەن تاريحي جاد ارقىلى دا قۇندىلىققا يە. وسى تۇرعىدان العاندا, اقمارال سامەت سياقتى كاسىپكەرلەردىڭ ەڭبەگى ۇلتتىق اسحانانىڭ بۇگىنگى كۇنگە لايىقتالىپ, جاڭا بۋىنعا جەتكىزىلۋىنە ىقپال ەتىپ جاتىر.