اقتوبەدە تارى داقىلىن ءوسىرۋدى دارىپتەۋگە ارنالعان «اقتوبە – تارىنىڭ استاناسى» گاستروفەستيۆالى ءوتتى, دەپ حابارلايدى Egemen.kz.
ءىس-شاراعا اقتوبە وبلىسىنىڭ اكىمى اسحات شاحاروۆ قاتىسىپ, فەستيۆالدىڭ كورمە الاڭدارىن ارالادى. سونداي-اق ۇلتتىق داستۇرلەردى ساقتاۋ مەن وڭىردە گاسترونوميالىق ءتۋريزمدى دامىتۋدىڭ ماڭىزدىلىعىنا توقتالدى.
اۋقىمدى شاراعا قالا تۇرعىندارى مەن قوناقتارى كوپتەپ جينالىپ, ءوڭىردىڭ باي مادەني جانە گاسترونوميالىق مۇراسىن تانىتاتىن جارقىن الاڭعا اينالدى.
تارىدان دايىندالعان ەلۋگە جۋىق تاعام ءتۇرى ۇسىنىلعان كورمە-جارمەڭكە فەستيۆال قوناقتارىنىڭ ەرەكشە قىزىعۋشىلىعىن تۋدىردى. قاتىسۋشىلار ۇلتتىق تاعامداردىڭ الۋان تۇرىمەن تانىسىپ, شوكولادتى جەنت ازىرلەۋ بويىنشا شەبەرلىك ساباعىنا قاتىسىپ, ءداستۇرلى باۋىرساق پەن ساماۋرىننان قۇيىلعان شايدان ءدام تاتتى.
كوپشىلىكتىڭ نازارى ويىل اۋدانىنىڭ ارنايى الاڭىنا ءتۇستى. مۇندا تارى ءوسىرۋ جانە وڭدەۋ تاريحىنا ارنالعان ەكسپوناتتار قويىلىپ, ءداندى داقىلدى ءداستۇرلى تاسىلمەن دايىنداۋ ۇدەرىسى كورسەتىلدى. كەلۋشىلەر اتاقتى تارىشى شىعاناق بەرسيەۆتىڭ اۋىل شارۋاشىلىعىن دامىتۋعا قوسقان ۇلەسى تۋرالى كەڭىرەك مالىمەت الىپ, وسى داقىلعا قاتىستى ۇلتتىق داستۇرلەردىڭ ەرەكشەلىكتەرىمەن تانىستى.
قازاقى تاعامنىڭ قاسيەتى
فەستيۆال اۋماعىندا حالىق شەبەرلەرىنىڭ قولونەر بۇيىمدارى كورمەسى دە ۇيىمداستىرىلدى. قوناقتار تەرىدەن, كيىزدەن, اعاشتان جانە جۇننەن جاسالعان اۆتورلىق جۇمىستاردى تاماشالاپ, زەرگەرلىك ونەر تۋىندىلارىمەن تانىستى.
گاستروفەستيۆال اياسىنداعى ماڭىزدى ءىس-شارالاردىڭ ءبىرى اۋىل شارۋاشىلىعى سالاسىنىڭ ماماندارىن, اگرونومداردى, قوعام وكىلدەرىن جانە ساراپشىلاردى بىرىكتىرگەن «اقتوبە – تارىنىڭ استاناسى» اتتى دوڭگەلەك ۇستەل بولدى. كەزدەسۋ بارىسىندا تارى ءوسىرۋ ءداستۇرىن جاڭعىرتۋ, ونىڭ پايدالى قاسيەتتەرى, سونداي-اق ءوڭىردىڭ اگرارلىق جانە گاسترونوميالىق الەۋەتىن دامىتۋ پەرسپەكتيۆالارى تالقىلاندى.
ەلىمىزدە ۇلتتىق مۇرانى دامىتۋعا ەرەكشە دەن قويىلىپ كەلەدى. ەسكە سالا كەتەيىك, بۇعان دەيىن سەمەيدە تازىلار بايقاۋى وتكەن بولاتىن.