قازاقستاندا بالالاردىڭ قوسىمشا ءبىلىم الۋىنا, شىعارماشىلىق دامۋىنا جانە سپورتپەن شۇعىلدانۋىنا قولجەتىمدىلىك ارتقان. ەلىمىزدە بالالاردىڭ 90 پايىزعا جۋىعى ءتۇرلى ۇيىرمەلەر مەن سەكتسيالارعا بارادى, دەپ حابارلايدى Egemen.kz.
2025 جىلدان باستاپ قوسىمشا ەلىمىزدە ءبىلىم بەرۋدى ۆاۋچەرلىك قارجىلاندىرۋدىڭ بىرىڭعاي جۇيەسى كەزەڭ-كەزەڭىمەن ەنگىزىلۋدە. بۇگىنگى تاڭدا سپورت, شىعارماشىلىق جانە قوسىمشا ءبىلىم بەرۋ باعىتتارى بويىنشا 600 مىڭنان استام بالا ۆاۋچەر يەلەنگەن. بۇل جۇيە قارجىلاندىرۋدى ءار بالاعا بەكىتىپ, مەملەكەتتىك قولداۋدان ايىرىلماي-اق ءبىلىم جانە سپورت باعدارلامالارىن ەركىن تاڭداۋعا مۇمكىندىك بەرەدى. مينيسترلىك مالىمەتىنە سايكەس, ەلىمىزدەگى بالالاردىڭ شامامەن 90 پايىزى ءتۇرلى ۇيىرمەلەر مەن سەكتسيالارعا قامتىلعان.
بالالار سپورتىنا 74 ملرد تەڭگە بولىنەدى
بۇگىندە ەلدە 1,8 ملن-عا جۋىق بالا تۇراقتى تۇردە دەنە شىنىقتىرۋ جانە سپورتپەن اينالىسادى, بۇل جالپى بالالار سانىنىڭ 34,6 پايىزىن قۇرايدى. 2029 جىلعا دەيىن بۇل كورسەتكىشتى 45 پايىزعا جەتكىزۋ جوسپارلانعان.
نەگىزگى باسىمدىق بالالاردىڭ سپورت سەكتسيالارىنا, ينفراقۇرىلىمعا جانە بىلىكتى جاتتىقتىرۋشىلارعا قولجەتىمدىلىگىن كەڭەيتۋگە بەرىلىپ وتىر. وسى باعىتتا بالالار-جاسوسپىرىمدەر سپورت مەكتەپتەرىن قارجىلاندىرۋ جۇيەسى رەفورمالانۋدا. 2026 جىلدان باستاپ جان باسىنا نورماتيۆتىك قارجىلاندىرۋ ەنگىزىلەدى, بۇل رەتتە قاراجات ءاربىر تاربيەلەنۋشىگە بولىنەتىن بولادى.
ورتاشا قارجىلاندىرۋ كولەمى ءبىر سپورتشىعا شاققاندا 233 مىڭ تەڭگەدەن 415 مىڭ تەڭگەگە دەيىن ۇلعايتىلدى. سونىمەن قاتار بىلىكتىلىك تەستىلەۋىنەن وتكەن جاتتىقتىرۋشى-وقىتۋشىلاردىڭ جالاقىسىن 30 پايىزعا ارتتىرۋ كوزدەلگەن.
مينيسترلىك: بالالار سپورتىن قارجىلاندىرۋ كولەمى ەكى ەسەگە جۋىق ارتادى
2026-2028 جىلدارى رەفورمانى ىسكە اسىرۋعا 74 ملرد تەڭگە ءبولىنىپ, قاراجات ماتەريالدىق-تەحنيكالىق بازانى نىعايتۋعا, جارىستارعا قاتىسۋعا, وقۋ-جاتتىعۋ جيىندارىن ۇيىمداستىرۋعا جانە سپورتتىق دايىندىق ساپاسىن ارتتىرۋعا باعىتتالماق.
ەلىمىزدىڭ بارلىق وڭىرىندە ينكليۋزيۆتى سپورت ورتالىقتارى اشىلادى
2025 جىلدىڭ قورىتىندىسى بويىنشا قازاقستاندا 743 مىڭنان استام مۇگەدەكتىگى بار ادام تىركەلگەن, ولاردىڭ ىشىندە 100 مىڭنان استامى – بالالار.
ەلدە پاراليمپيادالىق جانە سۋردليمپيادالىق سپورت تۇرلەرى جۇيەلى تۇردە دامىپ كەلەدى. مەملەكەت بۇل باعىتقا جان-جاقتى قولداۋ كورسەتىپ وتىر – قابىلدانعان زاڭنامالىق وزگەرىستەر ناتيجەسىندە پاراسپورتتى دامىتۋعا باسىمدىق بەرىلىپ, سپورتشىلاردى قولداۋ شارالارى كەڭەيتىلىپ, وڭىرلەردە سپورتتىق قىزمەتتەردىڭ قولجەتىمدىلىگى ارتىپ كەلەدى.
الداعى جىلدارى ەلىمىزدىڭ بارلىق وڭىرلەرىندە ينكليۋزيۆتى سپورت ورتالىقتارىن اشۋ جوسپارلانعان. سونىمەن قاتار, بالالاردى قولداۋعا جانە ولاردى سپورتتىق ومىرگە بەيىمدەۋگە باعىتتالعان ۇلتتىق ينكليۋزيۆتى «جۇلدىزاي» ويىندارى تۇراقتى تۇردە وتكىزىلىپ كەلەدى.
ەسكە سالا كەتەيىك, جۋىردا پرەزيدەنت قاسىم-جومارت توقاەۆ تۋريستىك سالا مەن بالالار سپورتىن قولداۋ تۋرالى زاڭعا قول قويدى.