مەملەكەت باسشىسىنىڭ تاپسىرماسىنا سايكەس 2025 جىلدىڭ قىركۇيەگىنەن باستاپ بارلىق مەكتەپتەر مەن كوللەدجدەردە «دوسبولLIKE» جانە «KiVa» انتيبۋللينگتىك باعدارلامالارى ەنگىزىلدى. ناتيجەسىندە ءبىلىم بەرۋ ۇيىمدارىنداعى بۋللينگ دەڭگەيى 2 پايىزعا تومەندەگەن, دەپ حابارلايدى Egemen.kz.
سونىمەن قاتار وڭىرلەردە «زاڭ مەن ءتارتىپ» قاعيداتى اياسىندا جاسوسپىرىمدەر اراسىنداعى قۇقىقبۇزۋشىلىقتار مەن زورلىق-زومبىلىقتىڭ الدىن الۋ جۇمىستارى جۇرگىزىلىپ جاتىر. قازىرگى تاڭدا جوبا 474 ءبىلىم بەرۋ ۇيىمىن قامتىپ وتىر. بۇل باعىتتا بۇرىن قۇقىق قورعاۋ ورگاندارىندا قىزمەت ەتكەن جانە ارنايى دايىندىقتان وتكەن 455 تالىمگەر جۇمىس ىستەيدى.
پسيحولوگيالىق قولداۋ جۇيەسىنە دە ەرەكشە كوڭىل ءبولىنىپ كەلەدى. ەل اۋماعىندا مەكتەپتەر مەن كوللەدجدەردە بۋللينگ, زورلىق-زومبىلىق جانە قاتىگەزدىك فاكتىلەرى تىركەلگەن 20 پسيحولوگيالىق قولداۋ ورتالىعى جۇمىس ىستەيدى. 2026 جىلدىڭ ءبىرىنشى توقسانىندا 6 333 بالا جانە 3 421 اتا-اناعا پسيحولوگيالىق جانە كەڭەس بەرۋ كومەگى كورسەتىلدى. قاۋىپ-قاتەردى ەرتە انىقتاۋ ماقساتىندا سۋيتسيدتىك مىنەز-ق ۇلىق پەن زورلىق بەلگىلەرىن ايقىندايتىن دياگنوستيكالىق ادىستەمەلەر ەنگىزىلگەن.
ەلىمىزدە جاسوسپىرىمدەر اراسىنداعى قۇقىق بۇزۋشىلىق 8 پايىزعا تومەندەگەن
قاۋىپ توبىنداعى كامەلەتكە تولماعاندارعا قاتىستى پروفيلاكتيكالىق شارالار كۇشەيتىلدى. ىشكى ىستەر ورگاندارىندا ەسەپتە تۇرعان جاسوسپىرىمدەر سانى جۇرگىزىلگەن قايتا تەكسەرۋ ناتيجەسىندە 4 990-نان 2 968 ادامعا دەيىن, ياعني 40,5 پايىزعا ازايدى.
ال 2026 جىلدىڭ ناۋرىزىنان باستاپ ءبىلىم بەرۋ ۇيىمدارى باسشىلارىنىڭ زورلىق-زومبىلىق نەمەسە بۋللينگ جاعدايىندا بالالارعا قاجەتتى كومەك كورسەتپەگەنى ءۇشىن جاۋاپكەرشىلىگى ەنگىزىلدى.
ەسكە سالا كەتەيىك, قازىرگى ۋاقىتتا كامەلەتكە تولماعاندار اراسىنداعى بۋللينگ ءۇشىن اكىمشىلىك جاۋاپكەرشىلىك قاراستىرىلعان. سونداي-اق بۋللينگ فاكتىلەرىن ەلەمەگەندەرگە 30-80 اەك كولەمىندە ايىپپۇل كوزدەلگەن.