1 ماۋسىم – حالىقارالىق بالالاردى قورعاۋ كۇنى قارساڭىندا استانا قالاسىنىڭ سارىارقا اۋدانىندا جاڭارتىلعان 8 اۋلا مەن ءبىر قوعامدىق كەڭىستىك پايدالانۋعا بەرىلدى, دەپ حابارلايدى Egemen.kz.
كۇردەلى جوندەۋدەن وتكەن اۋلالاردا زاماناۋي رەزەڭكە جابىن توسەلىپ, بالالارعا ارنالعان ويىن الاڭدارى مەن فۋتبول الاڭشالارى جاڭارتىلعان.
ەلوردادا تۇرعىنداردىڭ ۇسىنىستارى مەن تىلەكتەرىن ەسكەرە وتىرىپ, كەشەندى اباتتاندىرۋ جۇمىستارى جۇزەگە اسىرىلعان. جاڭعىرتۋ جۇمىستارى ك. كۇمىسبەكوۆ كوشەسى, 7/1, جەڭىس داڭعىلى, 3 جانە 5, ن. تىلەنديەۆ داڭعىلى, 16/1, تيتوۆ كوشەسى, 14, كونستيتۋتسيا كوشەسى, 25 جانە 27, سونداي-اق قارتالى كوشەسى, 6 مەكەنجايلارىندا جۇرگىزىلگەن. بۇدان بولەك, يرچەنكو كوشەسىندە تۇرعىندارعا ارنالعان جاڭا شاعىن اللەيا اباتتاندىرىلعان.
«اۋدانداعى اباتتاندىرۋ جۇمىستارى مۇنىمەن شەكتەلمەيدى. قازىرگى ۋاقىتتا كەنەسارى كوشەسىن قايتا جاڭعىرتۋ جۇمىستارى جۇرگىزىلىپ جاتىر. جوبا اياسىندا كوشە جيھازدارى جاڭارتىلىپ, ەسكى جارىق شامدارى زاماناۋي ۇلگىلەرگە اۋىستىرىلدى. جەڭىس داڭعىلى 3 جانە 5 مەكەنجايلارىندا ەكولوگيالىق تازا ماتەريالداردان جاسالعان زاماناۋي ساۋلەت ەلەمەنتتەرى ورناتىلدى. الداعى ۋاقىتتا بۇل باستامانى سارىارقا اۋدانىنىڭ وزگە اۋلالارىندا دا كەزەڭ-كەزەڭىمەن ەنگىزۋ جوسپارلانىپ وتىر» دەلىنگەن استانا قالاسى اكىمدىگىنىڭ حابارلاماسىندا.
جاڭارتىلعان اۋلالاردىڭ سالتاناتتى اشىلۋىنان كەيىن بالالار ارنايى ۇيىمداستىرىلعان ءىس-شارالارعا قاتىسىپ,سۇيىكتى مۋلتفيلم كەيىپكەرلەرىمەن كەزدەستى. ويىندار مەن بايقاۋلارعا بەلسەنە قاتىستى. بالالارعا ەستەلىك سىيلىقتار تابىستالدى.
قازاقستاندا بالالاردىڭ قاۋىپسىزدىگىنە 1,3 ترلن تەڭگە جۇمسالادى
استانا قالاسى اكىمدىگىنىڭ مالىمەتىنشە, 2026 جىلى اۋداندا تاعى 4 اۋماقتى زاماناۋي ستاندارتتارعا ساي اباتتاندىرۋ جوسپارلانىپ وتىر.
ەسكە سالا كەتەيىك, 1 ماۋسىم – حالىقارالىق بالالاردى قورعاۋ كۇنى قارساڭىندا استانادا بالالاردى قورعاۋ كۇنىنە وراي 100-گە جۋىق ءىس-شارا وتەدى.