قازاق كۇرەسىندە كۇنى بۇگىنگە دەيىن اس پەن تويدا اۆتوكولىك, قوماقتى قاراجات, ءتورت ت ۇلىك مال سەكىلدى جۇلدەلەر كوبىنە ەرەسەكتەر اراسىنداعى جارىستارعا تىگىلىپ كەلگەنى بەلگىلى. اسىرەسە باس جۇلدەگە تەمىر تۇلپار تىگىلگەن دودالارعا نەگىزىنەن ۇلكەن بالۋاندار قاتىساتىن. ال جاس بالۋاندار اراسىنداعى جارىستاردا قارجىلاي سىياقى بولعانىمەن, اۆتوكولىك سەكىلدى ءىرى جۇلدەنىڭ بۇيىرۋى سيرەك كەزدەسەدى.
جاقىندا تۇركىستان وبلىسىنىڭ وتىرار اۋدانىنا قاراستى قوعام اۋىلىنىڭ 5-سىنىپ وقۋشىسى قاسىمجومارت مۇحيت ۇلى قازاق كۇرەسىنەن حالىقارالىق تۋرنيردە چەمپيون اتاندى. سوزاق اۋدانىندا وتكەن سايىستا 10 جاستاعى تالانت ءوز سالماعىندا قارسىلاستارىنىڭ ءبارىن قوعاداي جاپىرىپ, باس جۇلدەگە تىگىلگەن «مەرسەدەس» اۆتوكولىگىن جەڭىپ الدى. بالعىن بالۋاننىڭ اكەسى دە, اتاسى دا كۇرەس ونەرىن سەرىك ەتكەن جاندار. اتاسى ايتجان دوداباەۆ – قازاق كۇرەسى مەن سامبودان سپورت شەبەرى, رەسپۋبليكالىق جانە حالىقارالىق دودالاردىڭ جۇلدەگەرى. اكەسى مۇحيت دوداباەۆ تا بۇل ونەردەن كەندە ەمەس, بالا كۇنىنەن كۇرەسپەن شۇعىلدانىپ, ءتۇرلى جارىسقا قاتىسقان تاجىريبەلى سپورتشى.
ءسويتىپ, اتانىڭ جولىن نەمەرە جالعاپ, بالۋاندار اۋلەتىنىڭ ءداستۇرى ۇزىلمەي كەلەدى. بالعىن سپورتشىنىڭ ارمانى دا اسقاق – ول بولاشاقتا وليمپيادا چەمپيونى بولۋدى ماقسات ەتەدى.
ءۇش جىل بۇرىن وتىرار اۋدانىنىڭ قوعام اۋىلىندا سپورت ارداگەرى, رۋحانيات جاناشىرى وڭالبەك اۋەلبەكوۆتىڭ باستاماسىمەن جانە دەمەۋشىلىگىمەن زاماناۋي سپورت كەشەنى بوي كوتەرگەن بولاتىن. سول ۋاقىتتان بەرى بۇل بەرەكەلى وردادان تالاي تالانتتى جاس تۇلەپ ۇشتى. حالىقارالىق دودالاردا توپ جارىپ جۇرگەن دارىندى بۋىننىڭ قاتارىندا قاسىمجومارت تا بار. باپكەرلەرى ابىلايحان وسكەنباي مەن بۋراحان جۇماگەلديەۆ جاتتىقتىراتىن جاس بالۋان ەڭبەك پەن تاباندىلىق قانا بيىك بەلەستەرگە باستايتىنىن جاقسى تۇسىنەدى.
«كىندىك قانىم تامعان قوعام اۋىلىندا سپورت كەشەنىن سالۋ تۋرالى باستاما كوتەرگەندە, وسىنداي ورەندەر ءوسىپ شىقسا دەگەن ارمانىم بولعان ەدى. شۇكىر, بۇگىندە سايدىڭ تاسىنداي ىرىكتەلگەن, تەگەۋرىنى مىقتى بالالار ءوسىپ كەلەدى. ەل سپورتىنىڭ بولاشاعى – وسى كەيىنگى بۋىننىڭ قولىندا. بۇل بالانىڭ اتاسى كەزىندە قازاق كۇرەسىنىڭ الىپپەسىن وزىمنەن ۇيرەنگەن, وتە قارۋلى, قايسار بالۋان ەدى. نەمەرەسى دە سول اتاسىنا تارتقان سياقتى. قاجىمۇقان بابامىزدىڭ جولىن بەرسىن, الەم جانە وليمپيادا چەمپيونى بولسىن. اتا-انالارعا ايتارىم: ەگەر ۇل-قىزدارىڭىز قىرانداي قىراعى, سۇڭقارداي ءور, ارىستانداي ايباتتى بولىپ ءوسسىن دەسەڭىز, سپورتقا باۋلىڭىز», دەيدى و.اۋەلبەكوۆ.
قاسىمجومارت جازعى دەمالىس كەزىندە دە ۋاقىتىن بوس وتكىزبەي, جاتتىعۋىن ۇزبەي جالعاستىرىپ كەلەدى. الدا تۇرعان ءباسى جوعارى, جۇلدەسى قوماقتى تۋرنيرلەردە دە ول ءوز نامىسىن قولدان بەرمەۋگە بار كۇشىن سالماق.