الماتىنىڭ ورتالىق يپپودرومىندا قالالىق سپورت باسقارماسى مەن ۇلتتىق جانە ات سپورتى تۇرلەرىنىڭ سپورت كلۋبى ۇيىمداستىرعان ناۋرىز مەرەكەسىن بولە-جارىپ ايتا كەتۋ كەرەك.
بۇل كۇننىڭ باستى وقيعاسى «توپجارعان» ەتنومادەني ورتالىعى ورناتقان – ەكى بىردەي الەمدىك رەكورد. الدىمەن دينارا سايدالينا تۇيەمەن ساعاتىنا 35,9 شاقىرىمدىق جىلدامدىقپەن جەلىپ وتىرىپ, 10 سەكۋندتا 4 ءتورت نىسانانى دا ءدال كوزدەپ, الەمدىك رەكورد ورناتتى. سىرتتاي تاماشالاعان ادامعا وسىنىڭ ءبارى وڭاي كورىنگەنىمەن, شايقالاقتاعان تۇيەنىڭ ۇستىندە تەپە-تەڭدىك ساقتاي وتىرىپ ساداق تارتۋ وتە قيىن ءارى اسقان شەبەرلىكتى تالاپ ەتەدى. بۇل جەتىستىك گيننەستىڭ رەكوردتار كىتابىنا تىركەلدى.
ماماندار دا نىسانا كوزدەۋدىڭ مۇنداي ءتۇرى ات ۇستىندەگى ءداستۇرلى ساداق اتۋدان الدەقايدا كۇردەلى ەكەنىن العا تارتىپ وتىر.
«بۇل جارىسقا وتە ۇزاق دايىندالدىق. قاتتى ۋايىمدادىق دەسەك تە بولادى. بۇگىن سول قاجىرلى ەڭبەگىمىز اقتالدى. تۇيەمەن جاتتىعىپ جۇرگەنىمە ءبىر جىلداي بولدى, بىراق ءدال وسى الەمدىك رەكوردقا كەيىنگى ەكى ايدا بارىمىزدى سالدىق. كەيىنگى ۋاقىتتاعى جاڭبىر ارالاس قار دالا جاتتىعۋلارىن قيىنداتتى. بىراق قاجىرلى ەڭبەگىمىزدىڭ ناتيجەسى ءبارىن ۇمىتتىردى», دەيدى دينارا.
كەلەسى رەكوردتى ايقاسقا اتتىڭ ۇستىندە تىك تۇرىپ, 500 مەتر قاشىقتىقتى ساعاتىنا 43,331 شاقىرىمدىق جىلدامدىقپەن شاۋىپ وتكەن ەرنار جاسۇزاق جاڭارتتى.
«مەن ءۇشىن بۇل رەكورد ساندار عانا ەمەس, بۇل – ۇلتتىق سپورتتىڭ دامۋىنا قوسقان ۇلەسىم. جۇگەندى ۇستاماي شابۋ – ەركىندىكتىڭ نىشانى عانا ەمەس, وجەت تە قايسار اتا-بابالارىمىزدىڭ قانىمەن كەلگەن قاسيەت. ولار وسىناۋ حاس ونەردى شەبەر مەڭگەرگەنىن ماقتانىش ەتەمىن», دەيدى ەرنار جاسۇزاق.
الماتى