قازاقستاندا العاش رەت جاسوسپىرىمگە جۇرەك ترانسپلانتاتسياسى جاسالدى. تاريحي وتا 27–28 ناۋرىز ارالىعىندا تۇندە جاسالعان, دەپ حابارلايدى Egemen.kz.
ناۋقاس –15 جاستاعى ءجاسوسپىرىم, ول 10 جاسىنان بەرى اۋىر جۇرەك اۋرۋىمەن كۇرەسىپ كەلگەن. ونىڭ جاعدايى ۇنەمى ناشارلاپ, ءجيى اۋرۋحاناعا جاتقىزۋدى تالاپ ەتكەن, سونداي-اق كۇندەلىكتى ومىرىندە كوپتەگەن شەكتەۋلەر بولعان. دارىگەرلەردىڭ ايتۋىنشا, ونىڭ ءومىرىن ساقتاپ قالۋدىڭ جالعىز مۇمكىندىگى جۇرەك ترانسپلانتاتسياسى ەدى.
دونور رەتىندە 43 جاستاعى ەر ادام پايدالانىلدى. وعان مي قىزمەتىنىڭ توقتاۋى (مي ءولىمى) دياگنوزى قويىلعاننان كەيىن, تۋىستارى اعزالاردى قايتىس بولعاننان كەيىن دونورلاۋعا كەلىسىم بەرگەن. دارىگەرلەردىڭ ۇيلەسىمدى جۇمىسىنىڭ ارقاسىندا جاسوسپىرىمگە جاڭا ءومىر سىيلادى.
الماتىدا جۇكتى ايەلدىڭ جۇرەگىنە وتا جاسالدى
قازىرگى ۋاقىتتا ناۋقاستىڭ جاعدايى قاناعاتتانارلىق دەپ باعالانىپ وتىر. ول جانساقتاۋ بولىمىنەن پروفيلدىك بولىمگە اۋىستىرىلىپ, قالپىنا كەلۋ كەزەڭىنەن ءوتىپ جاتىر.
مامانداردىڭ ايتۋىنشا, بۇگىندە اعزا ترانسپلانتاتسياسىن كۇتىپ تۇرعان 123 كامەلەتكە تولماعان بالا بار, ولاردىڭ 9-ى جۇرەك ترانسپلانتاتسياسىنا مۇقتاج.
دارىگەرلەردىڭ پىكىرىنشە, بۇل وپەراتسيا تەك جەكە جەتىستىك ەمەس, قازاقستاندا بالالار ترانسپلانتولوگياسىن جۇيەلى دامىتۋعا جاسالعان ماڭىزدى قادام. قازىرگى تاڭدا الەمدە بالالارعا جۇرەك ترانسپلانتاتسياسىن تەك ساناۋلى ەلدەر عانا جاسايدى, ال بارلىق ترانسپلانتاتسيالاردىڭ شامامەن 80%-ى اقش كلينيكالارىنا تيەسىلى. قازاقستاندا وسىنداي وپەراتسيانىڭ جاسالۋى ەلدە جوعارى تەحنولوگيالىق مەديتسينالىق كومەكتى جۇزەگە اسىرۋعا قاجەتتى مۇمكىندىك بار ەكەنىن كورسەتەدى.
عالىمدار ديابەت جانە جۇرەك اۋرۋلارىنىڭ الدىن الاتىن ءونىم ازىرلەپ جاتىر
ەسكە سالايىق, بۇعان دەيىن دەنساۋلىق ساقتاۋ ءمينيسترى اقمارال ءالنازاروۆا 2026 جىلدىڭ 1 قاڭتارىنان باستاپ ەلىمىزدە ترانسپلانتاتسيا قىزمەتتەرىنىڭ اۋقىمى كەڭەيگەنىن, ونىڭ ىشىندە كەراتوپلاستيكا جانە گەموپوەتيكالىق ءدىڭ جاسۋشالارىن ترانسپلانتاتسيالاۋ ەنگىزىلگەنىن ايتقان بولاتىن.