تاياۋ شىعىستاعى جاعدايدىڭ شيەلەنىسۋىنەن يران مەن اقش اراسىنداعى بايلانىستاردىڭ توقتاتىلۋى الەمدىك مۇناي باعاسىنىڭ ايتارلىقتاي وسۋىنە سەبەپ بولدى. نارىقتاعى مالىمەتتەرگە سايكەس, Brent ماركالى مۇناي فيۋچەرستەرىنىڭ باعاسى باررەلىنە 97 دوللارعا دەيىن, ال WTI مۇنايى 94 دوللارعا دەيىن كوتەرىلدى, دەپ حابارلايدى Egemen.kz
Tasnim اگەنتتىگىنىڭ حابارلاۋىنشا, يران امەريكالىق كەلىسسوز جۇرگىزۋشىلەرىمەن حابار الماسۋدى توقتاتقان. تەگەران بۇل شەشىمگە ءيزرايلدىڭ ليۆانداعى ارەكەتتەرى سەبەپ بولعانىن مالىمدەدى. يران تاراپى بۇعان دەيىنگى بىتىمگەرشىلىك كەلىسىمدەرىنىڭ ءبىر شارتى بۇزىلدى دەپ ەسەپتەيدى.
بۇدان بولەك, يران مەن ليۆاننىڭ قارسىلىق كۇشتەرى ورمۋز بۇعازىن تولىق جابۋعا جانە باسقا باعىتتارداعى, سونىڭ ىشىندە باب-ەل-ماندەب بۇعازىنداعى ارەكەتتەردى كۇشەيتۋگە دايىن ەكەنىن مالىمدەدى. وسى جاعداي اياسىندا ەنەرگەتيكا نارىعىنىڭ ءىرى ويىنشىلارى مۇناي باعاسىنىڭ كۇرت قىمباتتاۋى مۇمكىن ەكەنىن ايتا باستادى.
نيۋ-يوركتە وتكەن كونفەرەنتسيادا الەمدەگى ەڭ ءىرى ەنەرگەتيكالىق كومپانيالاردىڭ ءبىرى – Exxon Mobil كومپانياسىنىڭ اعا ۆيتسە-پرەزيدەنتى نيل چەپمەن الداعى اپتالاردا مۇناي باعاسى باررەلىنە 160 دوللارعا دەيىن جەتۋى مۇمكىن ەكەنىن ايتتى. ونىڭ سوزىنشە, ستراتەگيالىق قويمالارداعى قورلار ازايىپ بارادى.
Bloomberg: قازاقستان سىن-قاتەرلەردى مۇمكىندىكتەرگە اينالدىرۋدى ۇيرەندى
ايتا كەتەيىك, جۋىردا Bloomberg قازاقستان مەن Exxon Mobil اراسىنداعى كەلىسسوزدەر تۋرالى حابارلاعان بولاتىن. اڭگىمە قاشاعان كەن ورنىنىڭ ءالى يگەرىلمەگەن بولىگىن دامىتۋعا قاتىستى. باسىلىم مالىمەتىنشە, كومپانيا قازىرگى ۋاقىتتا قازمۇنايگاز كومپانياسىمەن بىرلەسكەن كاسىپورىن قۇرۋ مۇمكىندىگىن تالقىلاپ جاتىر.