پرەزيدەنت قاسىم-جومارت توقاەۆ وڭىردەگى بىرەگەي سپورت جوباسى – «اتلەتيكو دە مادريد قازاقستان» حالىقارالىق دەڭگەيدەگى فۋتبول اكادەمياسىنىڭ قىزمەتىمەن تانىستى, دەپ حابارلايدى Egemen.kz.
مەملەكەت باسشىسى اكادەميانىڭ 180 بالاعا ارنالعان جاتاقحاناسىن ارالاپ كوردى. قازىر مۇندا ەلىمىزدىڭ ءار تۇكپىرىنەن كەلگەن 116 بالا جاتتىعادى. اكادەميا ويىنشىلارىن يسپاندىق باپكەرلەر ىرىكتەپ, وعان قازاقستاننىڭ بارلىق وڭىرىنەن 4 مىڭنان اسا بالا قاتىستى.
ورتالىقتا جاس فۋتبولشىلاردىڭ تولىققاندى وقۋ ۇدەرىسىنە, جاتتىعۋلارى مەن جەكە دايارلىعىنا بارلىق جاعداي جاسالعان. قاسىم-جومارت توقاەۆقا اكادەميانى دامىتۋ جانە سپورتتىق ينفراقۇرىلىمدى كەڭەيتۋ جوسپارى كورسەتىلدى. وسى ورايدا جاساندى كوگالى بار ەكى اشىق فۋتبول الاڭىن, 500 ورىندىق جابىق مانەج جانە اكىمشىلىك-تۇرمىستىق كەشەننىڭ جاڭا عيماراتىن سالۋ كوزدەلگەن.
اكادەميا ورنىن تاڭداۋدا بالالاردى شىڭداي تۇسەتىن تابيعات فاكتورلارى ەسكەرىلگەن. الماتى وبلىسىنىڭ تالعار اۋدانىنداعى تاۋدىڭ تازا اۋاسى مەن جاعىمدى كليمات بالا اعزاسىنىڭ تەز قالپىنا كەلۋىنە سەپتىگىن تيگىزەدى. بۇدان كەيىن قاسىم-جومارت توقاەۆ جابىندىسى FIFA تالاپتارىنا ساي كەلەتىن فۋتبول الاڭىن كوردى, سونداي-اق دوپتى يگەرۋ تەحنيكاسى مەن يسپان ادىستەمەسى بويىنشا كوماندالىق ءىس-قيمىل داعدىلارىن پىسىقتاۋعا كىرىسكەن جاس فۋتبولشىلاردىڭ جاتتىعۋىن تاماشالادى.
ءىس-شاراعا يسپانيانىڭ قازاقستانداعى ەلشىسى لۋيس فرانسيسكو مارتينەس مونتەس, «اتلەتيكو مادريد» فۋتبول كلۋبى ديرەكتورلار كەڭەسىنىڭ مۇشەسى داۆيد ۆيليا, اتالعان كلۋبتىڭ اكادەميا ىستەرى جانە حالىقارالىق دامۋ جونىندەگى ديرەكتورىنىڭ ورىنباسارى ماريا تەرەسا كيريۆي قاتىستى.
كەزدەسۋدەن ەستەلىك رەتىندە پرەزيدەنت فۋتبول دوبىنا قولتاڭبا قالدىردى.
ەسكە سالا كەتەيىك, مەملەكەت باسشىسى بۇگىن الماتى وبلىسىنا جۇمىس ساپارىمەن بارىپ, الاتاۋ قالاسىن دامىتۋ جونىندەگى كەڭەستە ءسوز سويلەدى.