الاتاۋ قالاسىن دامىتۋ جونىندەگى كەڭەستە مەملەكەت باسشىسى ينۆەستورلارعا بارىنشا جايلى جاعداي جاساۋدى جانە ولارعا جوعارى دەڭگەيدە قىزمەت كورسەتۋدى اسا ماڭىزدى مىندەت رەتىندە اتادى, دەپ حابارلايدى Egemen.kz.
«قازىر الدىمىزدا تۇرعان جۇمىس – اسا ماڭىزدى: ينۆەستورلارعا بارىنشا جايلى جاعداي جاسالۋعا ءتيىس جانە ولارعا جوعارى دەڭگەيدە قىزمەت كورسەتىلۋى قاجەت. ەڭ الدىمەن حالىقارالىق تالاپتاردىڭ قاتاڭ ساقتالۋىنا باسا ءمان بەرگەن ءجون. اسىرەسە, ۇلتتىق زاڭناما جۇيەسىندە قامتىلماعان ماسەلەلەر بويىنشا الەمدىك وزىق تاجىريبەنى كەڭىنەن قولدانعان ابزال. ناعىز وزىق ءارى جەدەل دامۋ جولىنا تۇسەمىز دەسەك, بۇل جۇمىستى مىندەتتى تۇردە قولعا الۋىمىز كەرەك. ءتيىستى لاۋازىمدى تۇلعالار ەشكىمنەن قورىقپاي, باتىل شەشىمدەر قابىلداۋى كەرەك. بۇل ءوتىنىش يا كەڭەس ەمەس, بۇل – ناقتى تاپسىرما», دەدى پرەزيدەنت.
پرەزيدەنتتىڭ ايتۋىنشا, ارنايى قۇقىقتىق مارتەبەسى بار قالالار جاھاندىق كاپيتالدى تارتۋ ءۇشىن ءدال وسىلاي باتىل ءارى بەلسەندى جۇمىس ىستەپ, الدىڭعى قاتارعا شىعادى.
«شەتەل ينۆەستيتسياسىن قورعاۋ, ء«بىر تەرەزە» قاعيداتى بويىنشا قىزمەت كورسەتۋ, شارتتاردىڭ اشىقتىعىن جانە مەملەكەت ۇسىناتىن كەپىلدىكتەردىڭ بۇلجىماستىعىن قامتاماسىز ەتۋ – نەگىزگى ماسەلە, كەزەك كۇتتىرمەيتىن مىندەت. بۇل سالاداعى جۇمىستىڭ ءبارى ناتيجەلى بولسىن دەسەك, ينۆەستورلاردى كوپتەپ تارتۋ كەرەك بولادى, ال ول ءۇشىن قولايلى ورتا جاساۋىمىز كەرەك جانە ءتيىمدى ەكوجۇيەنى قۇرۋىمىز قاجەت. بۇل, ارينە, وتە اۋقىمدى شارۋا. سوندىقتان الدىمەن وزەكتى, ياعني باسىمدىققا يە باعىتتارعا ايرىقشا ءمان بەرۋ كەرەك: IT, ونەركاسىپ, كولىك جانە لوگيستيكا, تۋريزم, مەديتسينا, ءبىلىم بەرۋ سالالارىن دامىتۋ وتە ماڭىزدى», دەدى مەملەكەت باسشىسى.
مەملەكەت باسشىسى: Alatau city جوباسىنا زور ءۇمىت ارتىپ وتىرمىز
سونىمەن قاتار, پرەزيدەنت وتاندىق بيزنەس وكىلدەرى قالانى دامىتۋدىڭ بەل ورتاسىندا ءجۇرۋى قاجەت ەكەنىن ايتتى.
«ماعان بۇگىندە 50-دەن استام ينۆەستيتسيالىق جوبادان تۇراتىن پۋل جاساقتالعانى جونىندە مالىمدەدى. جالپى كولەمى ەكى تريلليون تەڭگەگە جۋىق قارجى قۇيىلعان باستامالار اياسىندا 50 مىڭنان اسا جۇمىس ورنى اشىلادى. الداعى ءبىر-ەكى جىل ىشىندە باسىم سالالارعا ينۆەستورلار تارتا وتىرىپ, اتالعان پورتفەلدى كەڭەيتە ءتۇسۋىمىز كەرەك», دەدى مەملەكەت باسشىسى.
قاسىم-جومارت توقاەۆتىڭ سوزىنشە, اسىرەسە, وتاندىق بيزنەستى ىنتالاندىرۋعا باسا نازار اۋدارىلعانى ءجون. بيزنەس وكىلدەرى سىرتتان باقىلاۋشى بولماي, قالانى دامىتۋدىڭ بەل ورتاسىندا ءجۇرۋى قاجەت.
«مۇنىڭ ماڭىزى زور. ويتكەنى, شەنچجەن سەكىلدى قالالاردىڭ تاجىريبەسى العاشقى ونجىلدىقتا شاھاردىڭ وركەندەۋىنە جۇمسالعان ينۆەستيتسيانىڭ باسىم بولىگىن سىرتقى ەمەس, ىشكى سالىمدار قۇراعانىن كورسەتىپ وتىر. شەنچجەن, حاينان, دۋباي, سينگاپۋر سياقتى قالالاردىڭ بارىندە مەملەكەت العاشقى ينۆەستور رەتىندە بازالىق ينفراقۇرىلىم قالىپتاستىرىپ بەردى. وسىلايشا, بيزنەستە تاۋەكەل ازايىپ, ءتيىستى جاعداي جاسالاتىن ورنىقتى ينۆەستيتسيالىق تسيكل ىسكە قوسىلدى», دەدى پرەزيدەنت.
پرەزيدەنت: Alatau City العاشقى تولىق تسيفرلى قالا بولادى
سونداي-اق, قاسىم-جومارت توقاەۆ ۇكىمەت باستاپقى كەزەڭدە قالانىڭ نەگىزگى ينفراقۇرىلىمىن دامىتۋ ماقساتىندا تۇراقتى تۇردە قارجى ءبولىپ وتىرۋى كەرەكتىگىن اتاپ ءوتتى.
«جالپى, مۇنداي ينۆەستيتسيالىق ءتاسىل – ابدەن ورىندى جانە ويعا قونىمدى. مەملەكەت ينفراقۇرىلىمعا ينۆەستيتسيا سالسا, جەكە كاپيتال دا كەلە باستايدى. سونىڭ ارقاسىندا سالىق ءتۇسىمى ارتادى, جاڭا ينفراقۇرىلىم پايدا بولادى. وسىلايشا, قولعا الىنعان جۇمىستىڭ اۋقىمى كەڭەيە بەرەدى. ال نەگىزگى ينفراقۇرىلىمعا باستاپقى ينۆەستيتسيا سالۋ مىندەتى تەك جەكە سەكتورعا عانا جۇكتەلسە, جوبالاردىڭ ينۆەستيتسيالىق تارتىمدىلىعى السىرەيدى. مۇنداي جاعداي ءتاريفى جوعارى مونوپوليا قۇرىلىمدارىنىڭ پايدا بولۋىنا اكەپ سوقتىرادى جانە اقىر سوڭىندا دامۋدى تەجەيدى», دەدى قاسىم-جومارت توقاەۆ.
پرەزيدەنت اتاپ وتكەندەي, سوندىقتان ۇكىمەت باستاپقى كەزەڭدە قالانىڭ نەگىزگى ينفراقۇرىلىمىن دامىتۋ ماقساتىندا تۇراقتى تۇردە قارجى ءبولىپ وتىرۋى كەرەك. باسقا جول جوق.
«قاجەت بولسا, ورنىقتى كىرىس قورى قالىپتاسقانشا الاتاۋعا قوسىمشا ليميتتەردى جانە مەملەكەتتىڭ كەپىلدىگىمەن قارىز الۋ قۇقىعىن بەرۋگە بولادى. دەگەنمەن بيۋدجەت قارجىسى تەك ينۆەستيتسيالىق ماقساتقا ساي جۇمسالۋعا ءتيىس. قالانىڭ ۇزاقمەرزىمدى دامۋ باعدارى باستى نازاردا بولۋى كەرەك», دەدى مەملەكەت باسشىسى.
ەسكە سالايىق, بۇگىن پرەزيدەنت جۇمىس ساپارىمەن الماتى وبلىسىنا باردى.