جامبىل وبلىسىندا ادام ولىمىنە اكەپ سوققان ءىرى جول-كولىك وقيعاسى بويىنشا قىلمىستىق ءىس قوزعالدى. وڭىرلىك پوليتسيا دەپارتامەنتىنىڭ ءباسپاسوز قىزمەتى حابارلاعانداي, قايعىلى جاعداي قورداي اۋدانىندا بولىپ, ەكى جەڭىل كولىكتىڭ سوقتىعىسۋى سالدارىنان ءبىر جۇرگىزۋشى وقيعا ورنىندا كوز جۇمعان, دەپ جازادى Egemen.kz.
اپات قورداي اۋدانى اۋماعىنداعى تاسجولدا بولعان. مۇندا «Lexus» پەن «Tank 500» ماركالى اۆتوكولىكتەرى سوقتىعىسىپ, سوققى سالدارىنان ءبىرىنشى كولىكتىڭ تىزگىندەۋشىسى قايتىس بولدى.
جانتۇرشىگەرلىك جول اپاتىنان شىعىس قازاقستاندا ءۇش جىگىت كوز جۇمدى
قازىرگى ۋاقىتتا ءتارتىپ ساقشىلارى وقيعانىڭ ءمان-جايىن انىقتاپ جاتىر.
«الدىن الا مالىمەتتەر بويىنشا, «Lexus» جۇرگىزۋشىسى جول جيەگىندەگى قيسىق سىزىقتى قورشاۋعا (برۋس) جاناي سوعىلىپ, سودان كەيىن كولىگى اينالىپ كەتىپ, جولدىڭ ءجۇرۋ بولىگىنە توقتاعان. وسى مەزەتتە ارتتا كەلە جاتقان «Tank 500» اۆتوكولىگىنىڭ جۇرگىزۋشىسى تەجەگىشتى باسىپ ۇلگەرمەي, «Lexus»-قا سوقتىعىسقان», دەلىنگەن رەسمي حابارلامادا.
قۇزىرلى ورگان وكىلدەرى جول اپاتىنىڭ تولىق سەبەپتەرىن انىقتاۋ ءۇشىن بارلىق قاجەتتى ساراپتامالاردى تاعايىندادى. تەرگەۋ امالدارى جالعاسىپ جاتىر.
بۇعان دەيىن الماتىدا ءال-فارابي داڭعىلىندا بولعان جول اپاتىنا بايلانىستى بىرنەشە پوليتسيا باسشىسىنىڭ قىزمەتىنەن بوساتىلعانىن حابارلاعانبىز.