ءماجىلىس دەپۋتاتى ەرمۇرات باپي اقپاراتتىق كەڭىستىكتە ءدىني ۇستازداردىڭ كەيپىن جامىلىپ جۇرگەندەرگە قاتىستى كەسىمدى پىكىرىن ءبىلدىردى. ول قازاقتىڭ عاسىرلار بويى قالىپتاسقان رۋحاني قۇندىلىقتارىن مەنسىنبەيتىن, وزگە ەلدىڭ يدەولوگياسىن تاڭعان توپتاردىڭ ارەكەتىنە توسقاۋىل قويۋ كەرەكتىگىن العا تارتتى, دەپ حابارلايدى Egemen.kz.
ەرمۇرات باپي جەلىدەگى «دۇمشە» ءدىندارلاردىڭ حالىق اراسىنا ىرىتكى سالىپ, ءداستۇرلى يسلام قاعيدالارىن بۇرمالاپ جاتقانىن العا تارتتى.
«بۇگىندە ءوزىنىڭ ساندىراعىن رەسمي يسلام مەن شاريعاتتىڭ نورماسىنا اينالدىرعان, ءدىني ءبىلىمى كەندە, ءدىني ستاتۋسى كۇدىكتى دۇمشەلەر الەۋمەتتىك جەلىلەردە ءورىپ ءجۇر. ولار قوعامدى راديكالدىق وي-ارەكەتكە جەتەلەپ, ەلدەگى مۇسىلمان قاۋىمى اراسىنا ىرىتكى سالىپ, ءبىزدىڭ حالىق ەجەلدەن تابىناتىن ءداستۇرلى يسلامنىڭ ءدىني قاعيدالارىن بۇرمالاۋدا», دەدى ول.
«مالشى مەن ۆەتەرينار جوق»: دەپۋتات ازىق-ت ۇلىك قاۋىپسىزدىگىنە قاۋىپ ءتونىپ تۇرعانىن ايتتى
حالىق قالاۋلىسى بۇگىنگى قوعامدا «اقپاراتتىق تەرروريزم» دەپ اتاۋعا بولاتىن قاۋىپتى ءۇردىستىڭ بەلەڭ العانىنا نازار اۋداردى. ول مۇنى حالىقتىڭ تانىم-تۇيسىگىن ادەيى تەرىس ارناعا بۇرىپ, اگرەسسيۆتى يدەولوگيانى كۇشتەپ تاڭۋ ارەكەتى دەپ باعالادى.
«شىن مانىندە ءبىزدىڭ بۇگىنگى قوعام اداسۋ الاياقتىعى شىلاۋىنا شىرمالىپ, «اقپاراتتىق تەرروريزم» دەپ اتاۋعا بولاتىن قياناتتى قۇبىلىسقا تاپ بولدى. بۇنى قوعامدىق جۇيەنىڭ قۇندىلىقتارىن ناقاق قيراتۋ, تۇسىنىك پەن تۇيسىكتى تەرىس جولعا سالۋ, ادامدار ساناسىنا ماڭىزى وزگەرگەن ءمان-ماقساتتى اگرەسسيۆتى تۇردە ءسىڭىرۋ قۇبىلىسى دەپ قابىلداۋ قاجەت!», دەدى دەپۋتات.
سونىمەن بىرگە ەرمۇرات باپي بۇگىندە جاستاردىڭ ءدىني تانىمى مەشىتتە ەمەس, نەگىزىنەن الەۋمەتتىك جەلىلەردە قالىپتاسىپ جاتقانىنا الاڭداۋشىلىق ءبىلدىردى. ول رەسمي ينستيتۋتتاردىڭ بۇل كەڭىستىكتەگى بەلسەندىلىگىنىڭ تومەندىگى قاۋىپتى پروپاگانداعا جول اشىپ وتىرعانىن ايتتى.
«سەبەبى, بۇگىندە اسىرەسە جاستاردىڭ سەنىم-تانىمى مەن قوعامدىق كوزقاراسى ءداستۇرلى ءدىننىڭ مەشىتتەرىندە ەمەس, الەۋمەتتىك جەلىلەردە قالىپتاسۋدا. ەگەر بۇل رەسۋرستاردا رەسمي ينستيتۋتتاردىڭ جۇيەلى, اۆتوريتەتتى جانە زاماناۋي ۇستانىمى تاپشى بولسا, بۇل بوس قالعان كەڭىستىكتى قارابايىر جانە قاۋىپتى پروپاگاندا تولتىرادى», دەپ ناقتىلادى باپي.
دەپۋتات سوڭعى ۋاقىتتا الەۋمەتتىك جەلىدە قىزۋ تالقىلانعان «جالعان ءدىندارلاردىڭ» «ايەلىن شاكىرتىنە سىيعا تارتۋ» جانە «ناۋرىز – ءبىزدىڭ مەرەكە ەمەس» دەگەن سياقتى تەرىس ارەكەتتەرى مەن ۇندەۋلەرىنە دە توقتالىپ ءوتتى. ونىڭ پايىمداۋىنشا, مۇنداي جات تۇسىنىكتەردى ناسيحاتتاۋ – مەملەكەتتىڭ كونستيتۋتسيالىق قۇرىلىمىنا قارسى شىعۋمەن تەڭ بۇل باعىتتاعى تەرىس دوگمالارعا قازىردەن باستاپ قاتاڭ تويتارىس بەرۋ قاجەت.
«مورالدىق قۇقىعىمىز جوق»: دەپۋتات ماس جۇرگىزۋشىلەرگە راقىمشىلىق جاساۋعا قارسى شىقتى
ء«ىس جۇزىندە حالىقتىق, قازاقتىق ۇلتتىق داستۇرلەرگە قارسى شىعۋ – قازاقستاننىڭ كونستيتۋتسيالىق قۇرىلىسىنا قارسى شىعۋ دەگەن ءسوز! «قازاقستان – زايىرلى مەملەكەت» دەپ, اتا زاڭدا اتاپ كورسەتىلگەن قاعيداتقا ءدىني داڭعازامەن قارسى شىعۋ – قىلمىس. ەگەر ءبىز بۇل تەرىس دوگماعا بۇگىن وتە قاتاڭ جانە جۇيەلىك تويتارىس بەرمەسەك, ەرتەڭ تىزەمىزدى تىستەلەپ, قاپىدا قالۋىمىز ابدەن مۇمكىن. ونىڭ كۇرت كەرەعار ناتيجەسى بىزگە ادام ايتقىسىز اۋىر تيەرى كادىك! ءبىز قىر ارقاسى قىرقىلعان, ىشكى دۇنيەسى تۇلداي, تانىم-تۇيسىگى بىت-شىت بولۋى شىنايى ىقتيمال قوعامدى قۇتقارۋعا ءدال بۇگىن كىرىسپەسەك, بۇل كەرەعار جاعدايدى تۇزەۋ ارەكەتىنەن كەش قالامىز», دەدى ول.
دەپۋتاتتىڭ ايتۋىنشا, ەلىمىزدىڭ زاڭىن سىيلامايتىن جانە ۇلتتىق ءداستۇردى جات سانايتىنداردىڭ ۇستانىمى ەل بولاشاعىنا بالتا شابادى.
«قۇندىلىقتاردى عاسىردان عاسىرعا ساقتاپ قالعان قازاقتىڭ قاسيەتتى دالاسى سىزدەرگە اتامەكەن ەمەس بولار؟! ەندەشە, حارامى جوق, سىزدەر قوش كورەتىن ەلگە نەگە قونىس اۋدارىپ كەتپەسكە؟! الدى-ارتىڭا ءبىر ۋىس توپىراق!», دەدى ەرمۇرات باپي.
ءسوز سوڭىندا دەپۋتات باس پروكۋراتۋرا مەن مەملەكەتتىك ورگاندارعا ونلاين ورتاداعى باقىلاۋدى كۇشەيتۋدى ۇسىندى.