ماڭعىستاۋ وبلىسىنىڭ بەينەۋ اۋدانىندا جانارماي قۇيۋ بەكەتىندە جارىلىس بولىپ, ءبىر ادام اۋىر كۇيىك الدى, دەپ حابارلايدى Egemen.kz.
وقيعا 10 ناۋرىز كۇنى ستانتسيا اۋماعىندا تىركەلگەن. توتەنشە جاعدايلار دەپارتامەنتىنىڭ مالىمەتىنشە, وقيعا بويىنشا شاقىرتۋ تۇسپەگەن جانە ءورت فاكتىسى تىركەلمەگەن.
ء«ورت بولعان جوق. انىقتاۋشىلار پوليتسيانىڭ شاقىرۋىمەن اۋرۋحاناعا باردى. زارداپ شەككەن ادامعا ءورت قاۋىپسىزدىگى تالاپتارىن بۇزا وتىرىپ جۇمىس ىستەگەنى ءۇشىن ەسكەرتۋ بەرىلدى», دەپ حابارلادى ۆەدومستۆو.
الدىن الا مالىمەتتەرگە سايكەس, جۇمىس بارىسىندا كولەمى 200 ليترلىك مەتالل بوشكە جارىلعان. سونىڭ سالدارىنان جانارماي قۇيۋ بەكەتىنىڭ قىزمەتكەرى زارداپ شەگىپ, ونىڭ بەتى مەن دەنەسىنىڭ جوعارعى بولىگى كۇيىپ قالعان. قازىرگى تاڭدا ول ەم قابىلداپ, وڭالتۋ كۋرسىنان ءوتىپ جاتىر.
ەڭبەك ينسپەكتسياسى وكىلدەرىنىڭ ايتۋىنشا, زارداپ شەككەن ازامات رەسمي ەڭبەك شارتىنسىز جۇمىس ىستەگەن. ال ىقتيمال جۇمىس بەرۋشى ەڭبەك قاتىناستارىنىڭ بولعانىن جوققا شىعارىپ وتىر.
اباي وبلىسىنداعى شاحتادا جۇمىسشى قازا تاپتى
زارداپ شەككەن ازاماتتىڭ تۋىستارى وقيعاعا قاۋىپسىزدىك تالاپتارىنىڭ ساقتالماۋى سەبەپ بولۋى مۇمكىن دەپ ساناپ, جان-جاقتى تەرگەۋ جۇرگىزۋدى تالاپ ەتۋدە. قازىرگى ۋاقىتتا قوسىمشا تەكسەرىس ءجۇرىپ جاتىر. ونىڭ ىشىندە جاسىرىن ەڭبەك قاتىناستارىنىڭ بولۋى دا قاراستىرىلۋدا. ماتەريالدار كومپانيا تىركەلگەن الماتى قالاسىنا جولدانىپ, ءارى قاراي قارالاتىن بولادى.