گرانت, سىيلىق, شاكىرتاقى: دارىندى جاستاردىڭ دامۋىنا جول اشاتىن باستامالار

بۇگىندە «دارىن» سىيلىقتىڭ لاۋرەاتتارى سانى 380 ادامعا جەتتى. سىيلىق يەگەرلەرىنە لاۋرەات اتاعىمەن بىرگە, ارنايى ديپلوم, توسبەلگى جانە 1 ميلليون تەڭگە كولەمىندە اقشالاي سىياقى تابىستالادى.

مەملەكەت باسشىسىنىڭ باستاماسىمەن 2021 جىلدان بەرى جىل سايىن 3 ميلليون تەڭگە كولەمىندەگى «تاۋەلسىزدىك ۇرپاقتارى» گرانتى بەرىلەدى. گرانت جاس قازاقستاندىقتاردىڭ تىڭ يدەيالارى مەن باستامالارىن قولداۋعا باعىتتالعان. وسى ۋاقىتقا دەيىن 153 جاس اتالعان گرانتقا يە بولدى. 

مادەنيەت پەن ونەرگە ەڭبەك ءسىڭىرىپ جۇرگەن ازاماتتار دا مەملەكەتتىك قولداۋدان تىس قالعان ەمەس. جىل سايىن مادەنيەت سالاسىنىڭ 75 وكىلىنە مەملەكەتتىك ستيپەنديا تاعايىندالادى. بيىلدان باستاپ ستيپەنديا كولەمى ەكى ەسەگە ۇلعايتىلىپ, 5 ميلليون تەڭگەگە جەتتى. سونىمەن قاتار مەملەكەت باسشىسىنىڭ تاپسىرماسىمەن ءداستۇرلى ونەردى دارىپتەپ جۇرگەن ونەرپازدارعا «اسىل مۇرا» ۇلتتىق سىيلىعى تاعايىندالادى. 

مادەنيەت جانە اقپارات مينيسترلىگى حالىقارالىق بايقاۋلار مەن فەستيۆالدەردىڭ جەڭىمپازدارى مەن جۇلدەگەرلەرىن ىنتالاندىرۋدىڭ جاڭا تەتىكتەرىن ازىرلەپ جاتىر. جوسپارعا سايكەس, مۋزىكا, تەاتر, حورەوگرافيا مەن بالەت, بەينەلەۋ جانە ساندىك-قولدانبالى ونەر, سونداي-اق كينو جانە انيماتسيا سالالارى بويىنشا سىيلىق يەگەرلەرىن ارنايى ساراپتاما كوميسسياسى ايقىندايدى.

دارىندى جاستاردى قولداۋعا ارنالعان پلاتفورما ىسكە قوسىلادى

قوعامدا دارىندى جاستاردىڭ حالىقارالىق دەڭگەيدە تانىلۋىنا دا ەرەكشە كوڭىل بولىنەدى. وتاندىق ستۋدەنتتەر, ماگيسترانتتار, وقىتۋشىلار مەن مادەنيەت سالاسىنىڭ قىزمەتكەرلەرى «بولاشاق», Erasmus+, DAAD, Fulbright, Chevening جانە وزگە دە باعدارلامالار ارقىلى ءبىلىم الىپ, تاعىلىمدامادان وتە الادى.

بۇگىندە «كرەاتيۆتى يندۋستريا, شىعارماشىلىق جانە ونەر» باعىتى بويىنشا «بولاشاق» باعدارلاماسىنىڭ ستيپەندياتتارى Royal Conservatoire of Scotland, University of Reading, Stanford University جانە New York Film Academy سەكىلدى جەتەكشى شەتەلدىك جوعارى وقۋ ورىندارىندا ءبىلىم الىپ جاتىر. 

سونىمەن قاتار بىرقاتار بەدەلدى حالىقارالىق شىعارماشىلىق بايقاۋلاردىڭ جەڭىمپازدارىنا گرانتتار بەرىلىپ, شىعارماشىلىق باعىتتاعى جوعارى وقۋ ورىندارىنا كونكۋرسسىز ءتۇسۋ مۇمكىندىگى قاراستىرىلعان. وعان مۋزىكا, ۆوكال, بالەت, حورەوگرافيا جانە ورىنداۋشىلىق ونەر سالالارىنداعى حالىقارالىق دەڭگەيدەگى جارىستاردىڭ جەڭىمپازدارى قاتىسا الادى.

دارىندى جاستار كونفەرەنتسياسى

دارىندى جاستاردى قولداۋ تەك مەملەكەتتىك باعدارلامالارمەن عانا شەكتەلمەيدى. بۇل باعىتتا شىعارماشىلىق مەكتەپتەر, فەستيۆالدەر, بايقاۋلار, ءبىلىم بەرۋ جوبالارى, قوعامدىق جانە قايىرىمدىلىق قورلار دا بەلسەندى تۇردە جۇمىس اتقارىپ جاتىر. سونىڭ جارقىن مىسالدارىنىڭ ءبىرى – 2024 جىلى قۇرىلعان BIRLIK كوپۇلتتى ءان-بي ءانسامبلى. ىرىكتەۋ قورىتىندىسى بويىنشا انسامبل قۇرامىنا قازاقستانداعى ءتۇرلى ەتنوس وكىلدەرىنەن قۇرالعان 20 ۇزدىك ءبيشى مەن مۋزىكانت قابىلداندى.

جاس تالانتتارعا جاڭا مۇمكىندىكتەر ۇسىنۋ تۇرعىسىندا كرەاتيۆتى يندۋستريالاردى دامىتۋ قورىنىڭ دا ءرولى ەرەكشە. قور دارىندى جاستاردى انىقتاۋعا جانە قولداۋعا, ينۆەستيتسيا تارتۋعا, سالالىق ينفراقۇرىلىمدى دامىتۋعا, سونداي-اق قازاقستاندىق كرەاتيۆتى ونىمدەردى حالىقارالىق نارىققا شىعارۋعا كۇش سالىپ كەلەدى.

ايتا كەتەيىك, جىل سايىن شىعارماشىلىق باعىتتاعى جوعارى وقۋ ورىندارىندا ءبىلىم الۋعا 1000-نان استام, ال كوللەدجدەردە وقۋعا 500-دەن استام گرانت بولىنەدى.

دارىندى جاستار دەبيۋتى