قوستاناي وبلىسىندا پوليتسيا قىزمەتكەرىنە كۇش قولدانعان ءۇش ازاماتقا قاتىستى ءىس قوزعالىپ, ولار 2 اي مەرزىمگە قاماۋعا الىندى. ءىس باستاپقىدا جەڭىل باپپەن تىركەلگەنىمەن, كەيىننەن قىلمىستىڭ سيپاتى ەسكەرىلىپ, اسا اۋىر قىلمىس ساناتىنا قايتا سارالانعان, دەپ حابارلايدى Egemen.kz.
وقيعا 28 ناۋرىز كۇنى قوستاناي قالاسىنىڭ «بەرەكە» شاعىن اۋدانىندا بولعان. الەۋمەتتىك جەلىلەردە تاراعان مالىمەتكە سايكەس, ءبىر توپ ازامات قوعامدىق ءتارتىپتى بۇزعانى ءۇشىن ەسكەرتۋ جاساعان پوليتسيا قىزمەتكەرىنە شابۋىلداعان. پوليتسيا قىزمەتكەرلەرى كۇدىكتىلەردى جەدەل انىقتاپ, ۇستادى.
باتىس قازاقستان وبلىسىندا پوليتسياعا باعىنباعان ءبىر توپ ازامات ۇستالدى
العاشىندا ءىس «ومىرگە قاۋىپتى ەمەس زورلىق-زومبىلىق قولدانۋ» بابىمەن قوزعالعان. الايدا كەيىن تەرگەۋ بارىسىندا ءىس قىلمىستىق كودەكستىڭ 380-بابى 6-بولىگى 4-تارماعىنا («بيلىك وكىلىنە قاتىستى, توپ بولىپ جاسالعان جانە ءومىرى مەن دەنساۋلىعىنا قاۋىپتى زورلىق-زومبىلىق») اۋىستىرىلدى. بۇل باپ بويىنشا ايىپتالۋشىلار 10 جىلدان 15 جىلعا دەيىن باس بوستاندىعىنان ايىرىلۋى مۇمكىن.
سوت شەشىمىمەن ءۇش كۇدىكتىگە قاتىستى 2 اي مەرزىمگە قاماۋدا ۇستاۋ تۇرىندەگى بۇلتارتپاۋ شاراسى تاڭدالدى. قازىرگى ۋاقىتتا تەرگەۋ امالدارى جالعاسىپ جاتىر.
وقيعا 31 ناۋرىز كۇنى تاراعان ۆيدەودان كەيىن قوعامدا ۇلكەن رەزونانس تۋدىردى. جازبادا ماس كۇيدەگى بىرنەشە ادامنىڭ قىزمەتتىك كيىمدەگى پوليتسەيدى قورشاپ الىپ, سوققىعا جىققانى كورسەتىلگەن. زارداپ شەككەن قىزمەتكەر قازىرگى تاڭدا ەم قابىلداپ جاتىر.