«قامقورلىق» اتتى العاشقى بەيىمدەۋ جانە دامۋ ورتالىعى دامۋىندا اۋىتقۋشىلىعى بار بۇلدىرشىندەردىڭ كەسەلىن ەرتە باستان ەمدەپ, وڭالتۋدى كوزدەيدى.
وسى ورايدا الماتى قالاسىنىڭ اكىمى ەربولات دوساەۆ 2024 جىلدىڭ جەلتوقسانىندا كۇردەلى جوندەۋدەن وتكەن پەريناتولوگيا جانە بالالار كارديوحيرۋرگياسى ورتالىعىنىڭ بازاسىندا قۇرىلعان ورتالىققا ارنايى بارىپ, جۇمىسىمەن تانىستى. جاڭا ورتالىقتا دامۋىندا ءتۇرلى اۋىتقۋى بار جانە شالا تۋعان بالالارعا كەشەندى قولداۋ كورسەتىلەدى.
الماتى اكىمدىگى مەن «قازاقستان حالقىنا» قورى مۇرىندىق بولعان بىرەگەي جوبا مەديتسينالىق كومەكتەن بولەك, الەۋمەتتىك جانە ءبىلىم بەرۋ قولداۋىن دا قامتيدى.
مۇندا بالالاردىڭ ۇيلەسىمدى ءوسۋى مەن بەيىمدەلۋىنە جاعداي جاسالعان. ولارعا ابيليتاتسيا (جاڭا داعدىلاردى دامىتۋ), كوگنيتيۆتى, موتورلىق جانە كوممۋنيكاتيۆتى قابىلەتىن دامىتۋعا ارنالعان وقىتۋ جۇرگىزىلەدى.
ورتالىقتاعى 426 شارشى مەتر اۋماقتا بىرەگەي تەراپەۆتىك كەڭىستىكتەر قاراستىرىلعان: شۋنگيت جانە تۇزدى بولمەلەر, سەنسورلىق قابىلداۋدى جاقسارتۋعا ارنالعان يممەرسيالىق ۆاننا, سەنسورلىق بولمە بار. بالالاردى وڭالتۋعا ارنالعان جەكە باعدارلامالاردى كوپ سالالى ماماندار توبى ازىرلەيدى. ولاردىڭ قاتارىنا نەۆرولوگ, رەابيليتولوگ, نەوناتولوگ, فيزيوتەراپەۆت, ەدش دارىگەرى, لوگوپەد جانە دەفەكتولوگ كىرەدى.
ورتالىق كۇنىنە 50 بالا قابىلداي الادى, ال جىلىنا 600 بالاعا مىندەتتى الەۋمەتتىك مەديتسينالىق ساقتاندىرۋ ء(مامس) اياسىندا كومەك كورسەتىلمەك.
ەربولات دوساەۆ ورتالىقتاعى قۇرىلىس جۇمىستارىنىڭ ساپاسىن كورىپ, مەردىگەرگە كوزگە ۇرعان كەمشىلىكتەردى جويۋدى تاپسىرىپ, ورىندالۋى قاداعالاناتىنىن ەسكەرتتى.
اكىم سونداي-اق جاڭارتىلعان پەريناتولوگيا جانە بالالار كارديوحيرۋرگياسى ورتالىعىنىڭ ەمحاناسىنىڭ جۇمىسىمەن تانىستى. 1966 جىلى سالىنعان 1300,6 شارشى مەترلىك ەكى قاباتتى عيماراتتا كۇردەلى جوندەۋ جۇرگىزىلىپ, ينجەنەرلىك جۇيەلەر جاڭعىرتىلدى. مەديتسينالىق قىزمەتتى جىلدام كورسەتۋ ءۇشىن پاتسيەنتتەردىڭ باعىتى وڭتايلاندىرىلىپ, مۇمكىندىگى شەكتەۋلى ازاماتتار ءۇشىن قولجەتىمدىلىك ارتتى. اتاپ ايتقاندا, ەمحانانىڭ كەڭىستىگى ايماقتارعا ءبولىنىپ, كابينەتتەردىڭ ورنالاسۋى قايتا قارالدى, بۇل باسپالداقپەن كوتەرىلۋ نەمەسە ليفت پايدالانۋ قاجەتتىلىگىن ازايتتى.
الماتى اكىمى ەرەكشە نازار اۋدارعان نىساننىڭ ءبىرى – ەمحانا بازاسىندا ورنالاسقان ۇرىق قورعاۋ ورتالىعى. مۇندا تۋا بىتكەن دامۋ كەمىستىكتەرىن پرەناتالدى دياگنوستيكالاۋ جانە ولاردى تۇزەتۋگە ارنالعان جاتىرىشىلىك وپەراتسيالار جاسالادى. بۇل الماتى اكىمىنىڭ تاپسىرماسىمەن جانە قر دەنساۋلىق ساقتاۋ مينيسترلىگىنىڭ قولداۋىمەن 2024 جىلدىڭ 13 ماۋسىمىندا ىسكە قوسىلعان فەتالدى حيرۋرگيانىڭ ەرەكشە جوباسى. جىل سايىن بۇل ورتالىقتا 8 مىڭنان استام جۇكتى ايەل ۋلترادىبىستىق تەكسەرۋدەن وتەدى.
وسى ورايدا قالا باسشىسى پەريناتولوگيا جانە بالالار كارديوحيرۋرگياسى ورتالىعىنىڭ ءارى قاراي دامۋى جوسپارلانىپ وتىرعانىن اتادى. ونىڭ ىشىندە «اقىلدى» وپەراتسيالىق بولمەلەر قۇرۋ, جىلدىق قابىلداۋدى 17 500-دەن 19 500 ادامعا دەيىن ارتتىرۋ, جۇرەككە جاسالاتىن حيرۋرگيالىق وتالاردى قوسقاندا, وپەراتسيا تۇرلەرىن كوبەيتىپ, اكۋشەرلىك وتالار سانىن جىلىنا 3 500-دەن 4 500-گە دەيىن ارتتىرۋ قاراستىرىلعان.
قازىرگى تاڭدا پەريناتولوگيا جانە بالالار كارديوحيرۋرگياسى ورتالىعى – ايەلدەر مەن بالالارعا تولىق تسيكلدى مەديتسينالىق قىزمەت كورسەتەتىن ءىرى كلاستەر. ونىڭ ءارى قاراي جاڭعىرتىلۋى جاتىرىشىلىك وتاسىن كەڭەيتۋگە مۇمكىندىك بەرەدى, سونداي-اق دامۋ كەمىستىكتەرىنەن بولاتىن مۇگەدەكتىك پەن نارەستە ءولىمىن 35%-عا تومەندەتۋگە ىقپال ەتەدى.
ايتا كەتەيىك, پەريناتولوگيا جانە بالالار كارديوحيرۋرگياسى ورتالىعىندا جۇرگىزىلگەن كۇردەلى جوندەۋ جۇمىستارى – «الماتى قالاسىن 2025 جىلعا دەيىن دامىتۋ باعدارلاماسى جانە 2030 جىلعا دەيىنگى ورتا مەرزىمدى كەلەشەگى» اياسىنداعى ماڭىزدى كەزەڭدەردىڭ ءبىرى. عيماراتتىڭ جالپى اۋدانى – 24,1 مىڭ شارشى مەتردى الىپ جاتىر.