وقۋ-اعارتۋ ءمينيسترى عاني بەيسەمباەۆ 100 جىلدان استام ۋاقىت شاكىرت تاربيەلەپ كەلە جاتقان مەكتەپتەردىڭ پەداگوگيكالىق ۇجىمدارىمەن ونلاين فورماتتا كەزدەسىپ, سۇحباتتاستى, دەپ جازادى Egemen.kz.
ەلىمىزدە قىزمەتىن 19-20 عاسىرلاردا باستاپ, بۇگىنگى كۇنگە دەيىن اعارتۋشىلىق ءداستۇردىڭ ساباقتاستىعىن ۇزبەي كەلە جاتقان 97 مەكتەپ, 12 كوللەدج بار.
ماسەلەن, باتىس قازاقستان وبلىسىنداعى جاڭگىر حان مەكتەبى 184 جىلدان بەرى ۇزدىكسىز بالا وقىتىپ كەلەدى. 1841 جىلى قازاقستان اۋماعىنداعى العاشقى باستاۋىش مەكتەپ بولىپ اشىلعان بۇل قاراشاڭىراقتا تۇڭعىش قازاق عالىمدارىنىڭ ءبىرى مۇحاممەد-سالىق باباجانوۆ, اعارتۋشى ماقاش بەكمۇحامبەتوۆ, سونداي-اق «مۇعالىم» جۋرنالىنىڭ العاشقى رەداكتورى عۇمار قاراش سياقتى تۇلعالار ءبىلىم العان. قىزىلوردا وبلىسىنداعى 164 جىلدىق تاريحى بار №16 مەكتەپ-ليتسەي, اقتوبە وبلىسىنداعى 162 جىلدىق تاريحى بار ى.التىنسارين اتىنداعى ورتا مەكتەپ, اتىراۋ وبلىسىنداعى 144 جىلدىق تاريحى بار قىزىلۇي ورتا مەكتەبى - ۇلتتىق ءبىلىم بەرۋ ءداستۇرىن جالعاستىرىپ كەلە جاتقان ءبىلىم وردالارى. اقمولا وبلىسىنداعى جوعارى ورمان شارۋاشىلىعى, ەكولوگيا جانە تۋريزم كوللەدجى 129 جىلدان بەرى ەلىمىزدىڭ ەكونوميكاسىن نىعايتۋعا ۇلەس قوسقان كاسىبي ماماندار دايارلاپ كەلەدى.
كەزدەسۋ بارىسىندا مينيستر عاسىردان اسا شاكىرت تاربيەلەپ كەلە جاتقان مەكتەپتەردىڭ ارقايسىسىنىڭ ەلىمىزدىڭ تاريحى ءۇشىن عانا ەمەس, بولاشاعى ءۇشىن دە ءرولى ەرەكشە ەكەنىن اتاپ ءوتىپ, ولاردى ساقتاۋ جانە جاڭعىرتۋ باعىتىندا بىرقاتار تاپسىرمالار بەردى. «قازاق دالاسىندا اعارتۋشىلىقتىڭ قالىپتاسۋى مەن دامۋى ونداعان عاسىرلاردان باستاۋ الادى. وڭىرلەردىڭ قولداۋىنىڭ ارقاسىندا عاسىردان استام تاريحى بار مەكتەپتەر جابىلماي, ءبىلىم شىراعىن سوندىرمەي, ساباقتاستىقتى ساقتاپ كەلەدى. ءبىز عاسىرلىق تاريحى بار ءبىلىم وشاقتارىنىڭ ارنايى كاتالوگىن جاساۋدى قولعا الۋىمىز كەرەك. بۇل ەلىمىزدىڭ ءبىلىم تاريحىنىڭ تەرەڭدىگىن دالەلدەيتىن ماڭىزدى قۇجات بولماق. سونىمەن قاتار, مەملەكەت باسشىسىنىڭ تاپسىرماسىنا سايكەس, بۇل مەكتەپتەر دە قاجەتتىلىگىنە قاراي تولىقتاي رەنوۆاتسيادان ءوتىپ, ماتەريالدىق-تەحنيكالىق تۇرعىدا جاڭارتىلۋى ءتيىس. سونداي-اق مۇندا ەڭبەك ەتىپ جۇرگەن پەداگوگتەردىڭ الەۋەتى دە ءجىتى زەردەلەنىپ, ولارعا جۇيەلى قولداۋ كورسەتىلۋى قاجەت», دەدى عاني بەيسەمباەۆ.
مينيستر تاريحي ءبىلىم وردالارىنىڭ تاجىريبەسىن زەرتتەپ, ۇزدىكتەرىن ەل كولەمىندە تاراتۋ قاجەت ەكەنىن اتاپ ءوتتى. سونىمەن قاتار ول عاسىرلىق مەكتەپتەردى ءبىلىم بەرۋ ءىسىنىڭ قۇندىلىعى رەتىندە ساقتاپ قالۋ جانە دامىتۋ ماقساتىندا 100 جىلدىق مەكتەپتەر قاۋىمداستىعىن قۇرۋدى, ولاردى قولداۋ مەن دامىتۋدىڭ ستراتەگياسىن ازىرلەۋدى تاپسىردى.
ايتا كەتەيىك, بۇل - عاسىرلىق تاريحى بار ءبىلىم وشاقتارىنىڭ باسىن قوسقان العاشقى جيىن.