ۇلتتىق قۇرىلتاي – ەلىمىز ءۇشىن اسا ماڭىزدى باسقوسۋ. بۇعان دەيىن وتكەن ءۇش قۇرىلتاي جيىنى سونى دالەلدەدى. ءبىز ۇزاق جىلدان بەرى قوردالانعان, كۇرمەۋى كوپ كۇردەلى ماسەلەلەردى وسى باسقوسۋ بارىسىندا تالقىلاپ, زاڭنامالىق تۇرعىدان دا, ونىڭ ورىندالۋ تۇرعىسىنان دا ءتيىستى شەشىمدەر قابىلدادىق.
ارينە, مۇنىڭ ءبارى باستاپقىدا وڭاي بولمادى. بىراق پرەزيدەنت باستاعان قۇرىلتاي مۇشەلەرىنىڭ بارلىق باستاماسى دۇرىس ەكەنىن ۋاقىت ءوزى دالەلدەپ كەلەدى. مىسالى, لۋدومانياعا قارسى كۇرەستەگى جەتىستىكتى ايتساق بولادى. مەملەكەتتىك قىزمەتشىلەر مەن اسكەردە بورىشىن وتەۋشىلەر اراسىندا مۇنداي زياندى كەسەلدىڭ تارالۋىنا توسقاۋىل قويۋ, جالپى وسى ويىن بيزنەسىنە مۇلدەم تىيىم سالۋ تۋرالى شەشىم قابىلداندى. سونىمەن قاتار عيماراتتار قابىرعالارىندا ويىن بيزنەسىن جارنامالاۋعا تىيىم سالىندى.
سونىمەن بىرگە ايەلدەردىڭ قۇقىقتارىن قورعاۋ مەن بالالاردىڭ قاۋىپسىزدىگىن ساقتاۋ تۋرالى زاڭ قابىلداندى. بۇل زاڭ 2017 جىلدان باستاپ كوپ تالقىلانعان زاڭ ەدى. ونىڭ ىشىندە, مىسالى, دەنساۋلىققا قاساقانا جەڭىل زيان كەلتىرۋ, ۇرىپ-سوعۋ باپتارى كريميناليزاتسيالاندى. شىنىن ايتۋ كەرەك, وسى زاڭ قابىلدانعاننان كەيىن قوعامدا زاڭ جانە ءتارتىپ قاعيداتى جۇزەگە اسىرىلا باستادى. كەيىنگى جىلدارى بالالار اراسىنداعى بۋللينگ, ءبىر-ءبىرىن اياۋسىز ۇرۋ, باسقا دا كەلەڭسىزدىكتەردى كورىپ, جالپى ادامگەرشىلىك قۇندىلىقتارىمىزدىڭ قانشالىقتى سارقىلعانىن بايقاپ ءجۇرمىز. سوندىقتان زاڭ اياسىندا جاستارىمىزدى تارتىپكە شاقىرۋ ءۇشىن وسى قۇجاتتار قابىلداندى.
بۇعان قوسا ەسىرتكىگە قارسى, ۆەيپتىڭ ساتىلىمىنا مەن اينالىمىنا, جارناماسىنا تىيىم سالۋ تۋرالى زاڭ قابىلداندى. جالپى العاندا, قۇرىلتايدىڭ وتىرىستارىندا كوتەرىلگەن ماسەلەلەردىڭ ناتيجەسىندە 10 زاڭ جوباسىنا باستاماشىلىق جاسالىپ, 9 زاڭ قابىلداندى.
ۇلتتىق قۇرىلتايدىڭ ءبىر ەرەكشەلىگى – بۇل جەردە الەۋمەتتىك-ەكونوميكالىق ماسەلەلەردەن بولەك, يدەولوگيالىق جانە تاربيەگە قاتىستى ماڭىزى جوعارى ماسەلەلەر تالقىلانادى. ءبىز جۇيەلى تۇردە سەكتسيالىق وتىرىستاردا باس قوسىپ, كوتەرىلگەن ماسەلەلەردىڭ شەشىمىن تابۋى ءۇشىن كەڭەسىپ وتىرامىز. ول جەردە ۇلكەن پىكىرتالاس بولادى, قارسى پىكىرلەر ايتىلادى. مۇنىڭ ءبارى بۇگىنگى تاڭدا ۇلكەن تاجىريبەگە اينالدى. ءتۇرلى پىكىرلەردىڭ اراسىنان جول تاۋىپ, مامىلەگە كەلۋ مادەنيەتى دە قالىپتاسىپ كەلەدى.
ال بۋراباي تورىندە وتكەن ۇلتتىق قۇرىلتايدىڭ ءتورتىنشى وتىرىسىندا پرەزيدەنت ەل كۇتكەن كەلەلى ماسەلەلەردى كوتەرىپ, بىرقاتار تاپسىرما بەردى. قاسىم-جومارت كەمەل ۇلى بيىلعى جۇمىسشى ماماندىقتارى جىلىنىڭ ماڭىزىنا ايرىقشا توقتالدى. ءبىز, شىنى كەرەك, ەڭبەك ادامىنا دەگەن قۇرمەتتى كەيىنگى ءۇش جىلدا عانا ايتا باستادىق. مىسالى, كوشەمىزدىڭ, جۇمىس ورنىنداعى تازالىق, مەكتەپتەگى تازالىقتى كىم جاسايدى دەگەن ماسەلەگە قاتتى كوڭىل اۋدارا بەرمەيتىنىمىز راس. ءبارى وزىمەن-ءوزى جاسالىپ جاتقان سياقتى. بىراق سول ءاربىر جۇمىستىڭ ارتىندا قانشاما ادامنىڭ ادال ەڭبەگى, اۋىر ەڭبەگى تۇر. وسى ەڭبەكتى باعالاۋ ءۇشىن ەڭبەك ادامىنا, ونىڭ بۇگىنگى زاماناۋي تۇرعىداعى تانىمالدىلىعىنا ايرىقشا نازار اۋدارىلعانى ابزال. مەملەكەت باسشىسىنىڭ باستاماسىمەن جاريالانعان جۇمىسشى ماماندىقتارى جىلى ەل ءۇشىن ەڭبەگىن اياماي جۇرگەن قاراپايىم جۇمىسشىلاردىڭ دارەجەسىن كوتەرۋگە ىقپال ەتەدى.
سونداي-اق مەملەكەت باسشىسى شالعايداعى, شەكاراداعى اۋىلدار ماسەلەسىنە دە نازار اۋداردى. پرەزيدەنت بولىپ سايلانعاننان كەيىنگى العاشقى جارلىعى دا اۋىلدى دامىتۋعا ارنالعان ەدى. ءبىز «ديپلوممەن – اۋىلعا!» باعدارلاماسىن جاڭارتۋ, اۋىلعا باراتىن كادرلارعا ۇستەمەاقىنى كوبەيتۋ تۋرالى ۇسىنىس ءبىلدىرىپ كەلەمىز. دارىگەر, مۇعالىم, اۋىل شارۋاشىلىعىنىڭ مامانى, تەمىرجولشى دەگەن سەكىلدى كەز كەلگەن ەلدى مەكەننىڭ تىنىس-تىرشىلىگىنە قاجەتتى, اۋىلدىڭ ءومىرىنىڭ ساپاسىن جاقسارتاتىن ماماندارعا كوڭىل بولىنگەنى ءجون.
ءبىراۋىز ءسوز, كىتاپ وقۋ ماسەلەسى تۋرالى. ءبىز كەيىنگى ءۇش جىلدا كىتاپحاناشى دايارلاۋ, كىتاپ وقۋ ماسەلەسىن جۇيەلى كوتەرىپ كەلەمىز. مەملەكەت باسشىسى بۇعان دا كوڭىل ءبولدى. بۇگىنگى تاڭدا كىتاپتىڭ اۆتورى بولۋ, كىتاپ جازۋ سانگە اينالدى. اقپاراتتىق تەحنولوگيالار دامىپ, ءتۇرلى ۆيرتۋالدى قاۋىپ-قاتەر كوبەيىپ تۇرعان زاماندا بالالارىمىزدىڭ مورالدىق دەگراداتسياعا تۇسپەۋى ءۇشىن ولاردىڭ اراسىندا كىتاپ وقۋ مادەنيەتىن قالىپتاستىرۋىمىز قاجەت. سوندىقتان كىتاپ وقۋعا بايلانىستى مەملەكەتتىك باعدارلاما قابىلدايتىن ۋاقىت جەتتى.
جۇلدىز سۇلەيمەنوۆا,
ۇلتتىق قۇرىلتاي مۇشەسى, ءماجىلىس دەپۋتاتى