شاحتاداعى جارىلىس

وقىس وقيعا ايماعىندا «سەرىكتەس اقق» جشس-نىڭ قۇتقارۋ بولىمشەلەرى اپاتتىق-قۇتقارۋ جۇمىستارىن جۇرگىزدى. ۇلىتاۋ, قاراعاندى وبلىستارىنىڭ توتەن­شە جاعدايلار دەپارتامەنتى كۇش­تەرى مەن قۇرالدارى جۇمىلدى. ونىڭ ىشىندە كينولوگيالىق توپتار, توتەنشە جاعدايلار مينيسترلىگى اپاتتار مەديتسيناسى ورتالىعىنىڭ مەديتسينا قىزمەتكەر­لەرى مەن پسيحولوگتەرى بارىنشا جەدەل جەتتى. توتەنشە جاعداي­لار مينيستر­لىگى كوماندالىق ورتالىعىندا, ۇلىتاۋ وبلىسىنىڭ تجد بازاسىندا جەدەل شتابتار جۇمىس ىستەپ جاتىر. توتەنشە جاعدايلار مينيستر­لىگىنىڭ كوماندالىق ورتالىعىندا بەينەكونفەرەنتسيا بايلانىسى ارقىلى اپاتتىق-قۇتقارۋ جۇمىستارى جونىندەگى جەدەل شتابتاردىڭ ءىس-قيمىل­دارى ۇيلەستىرىلدى. توتەنشە جاع­داي­لاردىڭ الدىن الۋ كوميتەتىنىڭ تور­اعاسى سەرىك جۇنىسبەكوۆ, ۇلىتاۋ وبلىسى تجد باستىعى ەسەن بايىروۆ, ونەر­كاسىپتىك قاۋىپسىزدىك كوميتەتى توراعاسى­نىڭ ورىنباسارى كەڭگىرباي ەسەنەەۆ­تار دا وقيعا ورنىنا جەتتى. امال نە, ءۇيىندى استىنان 7 كەنشىنىڭ دە ءمايىتى شىعارىلدى.

پرەزيدەنت قاسىم-جومارت توقاەۆ «قازاقمىس» كورپوراتسياسىنىڭ ۇلىتاۋ وبلىسىنداعى كەنىشىندە تاس-توپىراق قىرتىسىنىڭ وپىرىلۋى سالدارىنان قازا بولعان جۇمىس­شىلاردىڭ وتباسى مەن تۋعان-تۋىستارىنا كوڭىل ايتۋ جەدەلحاتىن جولدادى. مەملەكەت باسشىسى ۇكىمەتكە توتەنشە جاعدايدىڭ ءمان-جايىن مۇقيات تەكسەرۋ جونىندە مىندەت جۇكتەدى. سالالىق ۆەدومستۆولار مەن ءوڭىر اكىمدىگىنە مارقۇمداردىڭ وتباسىلارىنا بارلىق قاجەتتى كومەك كورسەتۋ تۋرالى تاپسىرما بەردى.

پرەمەر-مينيستر ولجاس بەكتەنوۆتىڭ تاپسىرماسىمەن ۇلىتاۋ وبلىسى جاڭاارقا اۋدانىنداعى شاحتانىڭ وپىرىلۋى سەبەپتەرىن انىقتاۋ, زارداپ شەككەندەرگە كومەك كورسەتۋ جونىندەگى ارنايى كوميسسيا قۇرىلدى. كوميسسيانى پرەمەر-ءمينيستردىڭ ورىنباسارى قانات بوزىمباەۆ باسقارادى. وقيعا ورنىندا تج قىزمەتى, ءىىم, ونەر­كاسىپ­تىك قاۋىپسىزدىك كوميتەتىنىڭ شۇعىل تەرگەۋ توبىمەن قاتار ەڭبەك جانە حالىقتى الەۋمەتتىك قورعاۋ مينيسترلىگى, ونەركاسىپ جانە قۇرىلىس مينيسترلىگىنىڭ قىزمەتكەرلەرى جۇمىس ىستەپ جاتىر. كوميسسيا مۇشەلەرى وقيعا ورنىندا بولىپ, تەرگەۋ بارىسىمەن تانىستى. قازا تاپقانداردىڭ وتباسىلارىنا ءبىرىنشى كەزەكتە كومەك كورسەتۋ جونىندە تاپسىرما بەرىلدى. وسىدان سوڭ پرەمەر-ءمينيستردىڭ ورىنباسارى شتاب وتىرىسىن وتكىزىپ, قازا تاپقانداردىڭ تۋىستارىمەن كەزدەستى.

توتەنشە جاعدايلار مينيسترلىگى ءباسپاسوز قىزمەتىنىڭ حابارلاۋىنشا, قايتىس بولعان 7 ادامنىڭ دەنەسى سوت-مەديتسينالىق ساراپتاما جۇرگىزۋ ءۇشىن پوليتسيا قىزمەتكەرلەرىنە تاپسىرىلدى. قازا تاپقان كەنشىلەر:

1) اقشالوۆ قايرات امانبەك ۇلى, 1975 جىلى تۋعان, سورعى قوندىرعىلارىنىڭ ءماشينيسى.

2) جاقۇباەۆ ارداق بورانباي ۇلى, 1998 جىلى تۋعان, جەراستى ۋچاسكەسىنىڭ تاۋ-كەن شەبەرى.

3) جۇمادوللاەۆ باقىتبەك نىشان ۇلى, 1975 جىلى تۋعان, سورعى قوندىرعىلارىنىڭ ءماشينيسى.

4) كەنجەبەكوۆ ورىنبەك ءامىرحان ۇلى, 1991 جىلى تۋعان, تيەۋ-جەتكىزۋ ماشينا­سىنىڭ ءماشينيسى.

5) مولدابەكوۆ عالىمجان ەسەنبەك ۇلى, 1978 جىلى تۋعان, سورعى قوندىرعىلارىنىڭ ءماشينيسى.

6) نۇرولداەۆ ولجاس جاعالباي ۇلى, 1979 جىلى تۋعان, جەراستى ۋچاسكەسىنىڭ ەنەرگەتيگى.

7) روجكوۆ كونستانتين ۆلادي­ميرو­ۆيچ, 1992 جىلى تۋعان, جەراستى تاۋ-كەن قازۋ جابدىقتارىنىڭ ەلەكتر سلەسارى.

ۇلىتاۋ وبلىسىنىڭ اكىمدىگى كەن ورنىندا قازا تاپقان جۇمىسشىلاردىڭ وتباسىلارى مەن جاقىندارىنا پسيحولوگيالىق جانە الەۋمەتتىك تۇرعىدان قاجەتتى قولداۋدىڭ بارلىعى كورسەتىلەتىنىن حابارلادى. قايعىلى وقيعاعا بايلانىستى ءوڭىر باسشىسى د.رىسپەكوۆ: «قايعىلى وقيعا بارشامىزدىڭ جۇرەگىمىزگە اۋىر ءتيدى. بۇل جاعداي – وتباسى ءۇشىن ورنى تولمايتىن قازا. قايتىس بولعان كەنشىلەردىڭ تۋعان-تۋىستارىنا, جاقىندارىنا شىن جۇرەكتەن كوڭىل ايتامىن. قازا تاپقانداردىڭ وتباسىلارىنا قاجەتتى كومەك كورسەتۋ ءۇشىن بارلىق ءتيىستى شارا قابىلدانادى», دەپ مالىمدەدى.

«قازاقمىس كورپوراتسياسى» سەرىكتەستىگى ۇجىمدىق كەلىسىمشارتتا كوزدەلگەندەي, كەنىشتە قازا تاپقانداردىڭ وتباسىلارىنا بارلىق قاجەتتى كومەك كورسەتىلەتىنىن حا­با­ر­لادى. الەۋمەتتىك, ماتەريالدىق قول­­داۋ, سونىڭ ىشىندە مورالدىق زياندى وتەۋ ماقساتىندا قازا تاپقانداردىڭ وتبا­سى­لارىنا جۇمىسكەردىڭ ورتاشا جىل­دىق جالاقىسىنىڭ 10 ەسەلەنگەن مولشەرى بەرى­لەدى. 2 ملن تەڭگەدەن استام سوما جەرلەۋ راسىمدەرىن ۇيىمداستىرۋعا تولەنەدى. وسىعان قوسا, اسىراۋشىسىنان ايىرىلۋ جاعدايىنا باي­لانىستى اي سايىنعى تولەمدەر, بالا­لار­دىڭ وقۋ اقىسىن تولەۋ, قازا تاپقان جۇمىس­شى­لاردىڭ نەسيە قارىزدارىن جابۋ, سونداي-اق وتباسى مۇشەلەرىنىڭ ءوتىنىشى بويىنشا باسقا دا كومەك تۇرلەرى قاراستىرىلادى.

اپاتتىڭ ناقتى سەبەپ-سالدارى الداعى كۇندەرى انىقتالادى. قالاي دەگەندە دە كەيىنگى جىلدارى ەلدەگى ءىرى وندىرىستىك كومپانيا­لاردا ادام ولىمىنە الىپ كەلگەن وقىس, قايعىلى وقيعالاردىڭ ءجيى تىركەلىپ كەتكە­نى قاتتى الاڭداتادى. بۇل تاۋ-كەن سالاسىن­داعى جۇمىسشىلاردىڭ قاۋىپسىزدىگى ماسە­لەسى ءالى دە بولسا وڭ شەشىمىن تاپپاي كەلە جاتقانىن بىلدىرەدى. قايعىلى وقيعا­عا قاتىستى قىلمىستىق كودەكستىڭ 277-بابى­نىڭ 3-بولىگى, «تاۋ-كەن نەمەسە قۇرى­لىس جۇ­مىس­تارىن جۇرگىزۋ كەزىندە قاۋىپسىز­دىك ەرەجەلەرىن بۇزۋ» فاكتىسى بويىنشا ءىس قوز­عالدى. وقيعا ورنىندا ۇلىتاۋ وبلىسىنىڭ پوليتسيا دەپارتامەنتىنىڭ جەدەل-تەرگەۋ توپتارى جۇمىس ىستەپ جاتىر.